Буряадай Үндэһэтэнэй номой санда февралиин 22-рой үдэрэй 15 сагта «Сагаалганай уулзалганууд» гэһэн уран зохёолой-хүгжэмэй үдэшэ үнгэргэгдэхэ. Энэ хэмжээ ябуулгын хүндэтэ айлшаар Доржо Осорович Эрдынеев бууха гэжэ Үндэһэтэнэй номой сангай хэблэлэй албан мэдээсэнэ.
Уран зохёолой-хүгжэмэй үдэшэдэ «Аза хүсэл», «Амар сайн» гэһэн ансамбльнууд, Буряадай арадай артистнар, Буряадай оперо болон баледэй театрай дуушад Билигма Ринчинова, Баир Цыденжапов, Буряадай арадай артистка, «Байгал» театрай дуушан Сэсэгма Сандипова, энэл театрай дуушан, Буряадай габьяата артист Болот Сандипов гэгшэд хабаадаха юм. Хэмжээ ябуулгын үедэ Доржо Эрдынеевэй намтар болон зохёохы замда зорюулагдаһан «Аша габьяань асари ехэ» гэһэн номуудай үзэсхэлэн дэлгэгдэхэ.
Доржо Эрдынеев олон тоото рассказ болон туужануудые ород, буряад хэлэн дээрэ Москва болон Улаан-Үдэ хотонуудта хэблэн гаргаһан юм. «Газарай амисхаал», «Талын туужанууд», «Энэ наһан», «Эсэгын дуран», «Сагай хоёр шэнжэ» рассказ болон туужанууд, «Хүлэг инсагаална», «Ехэ уг» романууд болон бусад зохёолнуудынь олондо мэдээжэ. «Дружба народов», «Дальний Восток», «Заря Востока», «Лооминг», «Полярная звезда» сэтгүүлнүүдтэ Доржо Эрдынеевэй зохёолнууд хэблэгдэһэн юм. Тиихэдэ уран зохёолшын бүтээлнүүд монгол, болгар, узбек, эстон, яхад хэлэнүүдтэ оршуулагданхай.
Доржо Эрдынеев бэлигтэй уран зохёолшо, драматург юм. Тэрэнэй «Эрэ хүн зориһондоо», «Эртын хюруу», «Адууһан төөлэй» зүжэгүүд Хуса Намсараевай нэрэмжэтэ Буряад драмын театрта, Ага болон Хэжэнгэ аймагуудай арадай театрнуудта амжалтатай табигдаһаар.
Доржо Осорович Эрдынеев ажабайдалай үргэн харгыда ажал хэрэгүүдээ эрхилһээр ябана. Уран зохёолшын хэлэһээр, һаяхана «Литературная газетын» редакциһаа хонходожо, зохёолнуудаа хэблэхымнай эльгээгыт гэжэ дуулгаһан байна. Мүнөө уран зохёолшо хоёрдохиёо хэблэгдэһэн «Хүлэг инсагаална» роман дээрэ хүдэлжэ байна. Тиихэдэ Доржо Эрдынеев олон жэлэй туршада «Великая степьи Святая русь» гэһэн түүхэтэ-баримтата зохёол бэшэжэ, ажалаа дүүргэхэ туйлдаа хүрэнхэй.
Хүгжэмэй-уран зохёолой үдэшэ мэдээжэ уран зохёолшо, драматургтай уншагшад уулзаха аргатай.
Рыгзема Батомункуева