​Холын Холбоото Штадуудта – ялас гэмэ амжалта

Үсэгэлдэр Америкын Холбоото Штадуудай Янгтон хотодо Буряадай һур харбагшад ялас гэмэ амжал­та туйлаба. Тэдэ гурбан медаль абажа, буряад угса­ата арад зоноо гараад байгаа Сагаан һараар иигэ­жэ амаршалба гээшэ.

Үбэлэй хэмжээнэй дэл­хэйн чемпионадуудта Буряадай залуушуул үшөө иимэ ехэ амжалта туйлаагүй бай­гаа. Ганса Эрдэм Жигжи­тов 2005 ондо ехэшүүлэй дунда түрүү һуури эзэл­жэ, өөрынгөө нэрэ түүхэдэ бэшүүлһэн намтартай.

Мүнөө жэлэй мүрысөөндэ Буряад Уласые дүрбэн та­миршан түлөөлжэ, Ородой суглуулагдамал командын бүридэлдэ оруулагдаһан байна. Эдэ хэд бэ гэбэл, Баир Цыбекдоржиев, Эрдэм Ир­дынеев, Ариуна Будаева, Светлана Гомбоева гэгшэд болоно.

Манай басагад 1998- 2002 онуудай наһанай бүлэгтэ харбаһан байна. Америкын Янгтондо Свет­лана Гомбоева Америкын Катерина Ву (7:1), Фран­циин Матильда Луис (6:5, 10:9), Австралиин Сара Хоу­вуд (7:3), Мексикын Сандра Ванесса Гарза Гарсиа (6:2) гэгшэдые шүүжэ гараа.

Ариуна Будаева финалай урдахана Америкын Ким Джениффер (7:3), Украи­нын Дидуш Орусиа (6:4) болон Шэтэ хотын Татьяна Плотниковае (7:3) илажа гараа.

Буряад басагадай дэлхэйн чемпионадай гол уулзалгада хабаадажа байхадань бахархамаар байгаа, манай зосоо омогорхол түрүүлээ. Эндэ ана-мана тулалдаан боло­жо, олоной һонирхол татаа. Һүүлэй һүүлдэ 6:4 (27-30, 30- 29, 28-29, 30-29, 30-28) гэһэн тоотойгоор Ариуна Будаева амжалта туйлажа, дэлхэйн чемпион боложо тодороо.

Ариуна Будаева мүнөө Москва хотодо оюутан юм. Түнхэн аймагай уг гарбал­тай чемпионой түрүүшын һоригшо Софья Гомбоевна Халудорова болоно.

Ариуна Будаева - дэлхэйн абарга, Светлана Гомбоева - 2-дохи һуури эзэлбэ

worldarchery.org гэһэн сайтһаа гэрэл зураг абтаба 

Мүнгэн медальда хүртэгшэ Светлана Гомбоева Константин болон Гэрэлма Эрдыниевтэнэй хүтэлбэри доро һорилго хэнэ. 2017 ондо Светлана Аргентинэдэ болоһон зунай дэлхэйн чем­пионадта баһа шангай һуури эзэлһэн намтартай.

Командна тоосоондо Ари­уна Будаева, Светлана Гом­боева болон Шэтэ можын Татьяна Плотникова гэгшэд мүнгэн медаль абаһан бай­на. Финалда тэдэ 0:6 гэһэн тоотойгоор Италиин тамир­шадта шүүгдээ.

Эрдэм Ирдынеев болон Баир Цыбекдоржиев гэгшэд командна тоосоондо 4-дэхи һуури эзэлээ.

Ородой эхэнэрнүүдэй суглуулагдамал команда ехэшүүлэй дунда шангай хоёр­дохи һуури эзэлжэ шадаа. Үбэр Байгалай хизаарай Туяна Дашидоржиева, Са­яна Цыремпилова болон Ростовско можын Елена Осипова Ородой командын бүридэлдэ оруулагдаа.

Блочно номо һуршаар харбалгада Захаамин аймагһаа гарбалтай, мүнөө үедэ Ямало-Ненецкэ тойрогой түлөө харбадаг Виктория Бальжанова бүхы Буряадай спортдо дуратайшуулые ба­ясуулба. Ородой командатай суг хамта тэрэ шангай хоёр­дохи һуури эзэлээ.