​Вип-пенсинүүд бага болохо

Анна Огороднигой гэрэл зураг

Үсэгэлдэр Буряад Уласай Арадай Хуралай сесси үнгэргэгдэбэ. Хүн зоной ажабайдал һайжаруулха зо­рилготой хэдэн шиидхэбэринүүд абтаа.

Хуралай сессидэ 45 шухала асуудал зүбшэн хэлсэгдэбэ. “Засагай газарта үг­тэһэн сагта” Буряадта хүдөө ажахын һал­бариин хүгжэлтэ болон бэрхэшээлнүүд тухай хэлсэгдээ. Буряад Уластахи Дотоо­дын хэрэгүүдэй талаар яаман гэмтэ яба­далнуудтай тэмсэхэ талаар ажал тухайгаа һунгамалнуудта хөөрэжэ үгөө.

ТОС хүдэлөөн тухай хуулиин түлэб хэлсэгдэнэ. Арадай һунгамалнууд тэрээ­ниие түрүүшын уншалгада хаража үзэбэ. Буряад Уласай Засагай газарай захиргаанай хүтэлбэрилэгшын орлогшо Баяр Жамбаловай хэлэһээр, һүүлэй үедэ ТОС-ой хүдэлөөн аргагүй ехэ ажал ябуулна гээшэ.

- 2017 ондо бидэ ТОС-уудай түрүүшын хуралдаа эмхидхээ һэмди. Тэдэнэй хэжэ байһан ажалтай танилсаһан Буряад Уласай Толгойлогшо Алексей Цыденов тон ехээр һайшаагаа бэлэй. ТОС-уудые дэмжэхын түлөө уласай хуули абаха тухай дурадхал оруулаа һэн, - гэжэ Баяр Жамба­лов һануулна.

ТОС тухай хуулиин түлэб нэгэдэхи уншалгаар абтаа. Апрель һарын сессидэ хоёрдохи уншалгада хэлсэгдэжэ, хуули баталагдаха түсэбтэй.

Мартын 18-да бүхы Ород гүрэн дотор Юрэнхылэгшын һунгуули үнгэргэгдэхэнь гэжэ мэдэнэбди. Һунгуулиин шэнэ Хуулиин ёһоор, эрхэтэн али нэгэ хото һуу­ринда, гэрһээ холо байгаашье һаа, һун­галтада хабаадаха аргатай. Буряад Уласай Толгойлогшын һунгуулида хабаадаха ду­ратайшуул баһа байһан газартаа һунгал­тада оролсохо эрхэтэй болобо.

Декабрь һарын һүүлшын амаралтын үдэр Буряад Уласта Эсэгын үдэр тэмдэглэхээр һунгамалнууд хараалба.

Һүүлэй хэдэн жэлдэ Засагай газарай тушаалнуудта хүдэлжэ, наһанай амарал­тада гараһан хүнүүд пенсиһээнь гадуур нэмэлтэ мүнгэ абана гэжэ шууяан гарана. Вип-пенси бага болгохо гэһэн асуудал сес­си бүхэн дээрэ табигдана. Үсэгэлдэр энэ асуудал хэлсэгдэжэ, тэдхэмжэ бага болго­хо тухай шиидхэбэри одоошье абтаба.

Үндэр тушаалда хүдэлһэн зоной пенси 50-70 процентээр бага болгогдоо. Хэды саг соо тэндэ хүдэлһэнһөөнь хүн бүхэнэй нэмэлтэ мүнгэн мүнөө дулдыдаха юм.

Буряад Уласые толгойлжо ябаһан хүнүүдэй пенси 40-55 процентээр доошо­луулагдаа. Арадай Хуралай һунгамалнууд 30 процентээр бага пенси абаха. Гүрэнэй албанай тушаалнуудта хүдэлһэн зоной пенси зунай арбан хубяар бага болгогдо­хоор хараалагдана.

Вип-пенси бага болгоходо, алмаг­даһан мүнгэн 6-һаа олон үхибүүтэй гэр бүлэнүүдтэ гэр байра абалгада һомолог­дохоор түсэблэгдэнхэй. 2018 ондо алмаг­даһан мүнгэнэй хэмжээн 12,32 сая түхэ­ригтэ хүрэнэ.