616
Ородой Холбоото Уласай Юрэнхылэгшын Федеральна суглаанда хандалга Түбэй үзэсхэлэнэй «Манеж» танхимда мартын 1-дэ үнгэргэгдэбэ. Энэ хэмжээ ябуулгада Буряад Уласай Толгойлогшо Алексей Цыденов уригдаа гэжэ Буряад Уласай Толгойлогшын болон Засагай газарай хэблэлэй албанда мэдээсэнэ.
Энээнһээ урид гүрэнэй хүтэлбэрилэгшын хандалга Кремлиин Георгиевска танхимда үнгэргэгдэдэг байгаа. Хэмжээ ябуулгада оньһон технологи хэрэглэгдэжэ, томо экрануудые үлгэхэ шалтагһаа боложо, талмай һэлгэгдээ гэжэ Ородой Холбоото Уласай Юрэнхылэгшын пресс-секретарь Дмитрий Песков хэлэһэн байна. Тиихэдэ Юрэнхылэгшын хандалгада хабаадагшадай тоо олошоруулагдаа.
Заншалта ёһоор Ородой Холбоото Уласай Юрэнхылэгшын Федеральна суглаанда хандалгада Федерациин Зүблэлэй, Засагай газарай гэшүүд, Гүрэнэй Дүүмын һунгамалнууд, Үндэһэн хуулиин болон Верховно сүүдэй хүтэлбэрилэгшэд, Ород гүрэнэй можо нютагуудай хүтэлбэрилэгшэд, Федерациин можо нютагуудай хуули тогтоолгын түрүүлэгшэнэр, шажан мүргэлэй конфессинүүдэй хүтэлбэрилэгшэд болон олониитын ажаябуулагшад хабаадаа.
Владимир Путин 14-дэхиеэ энэ хэмжээ ябуулга үнгэргэбэ. Буряад Уласай Толгойлогшын тушаалда Алексей Цыденов түрүүшынхиеэ Ородой Холбоото Уласай Юрэнхылэгшын Федеральна суглаанда хандалгада уригдаһан байна.
Ородой Холбоото Уласай Юрэнхылэгшын Федеральна суглаанда хандалга хадаа бодолго-хуулиин данса болоно. Энэ дансада Ородой Холбоото Уласай хүгжэлтын шухала һалбаринуудай холын хараата түсэбүүд тухай хэлэгдэдэг. Тиихэдээ бодолгын, эдэй засагай, үзэл сурталай байдал болон парламентын хуули тогтоолгын ажалаар тусхай дурадхалнууд оруулагданхай. Хандалгада хэлэгдэһэн шиидхэхэ асуудалнуудай ехэнхинь Ородой Холбоото Уласай Юрэнхылэгшын тогтоолоор хүсэндэнь оруулагдадаг.
Анна Огороднигой гэрэл зураг
