852
Ородой Холбоото Уласай Юрэнхылэгшын Федеральна суглаанда хандалгада Буряад Уласай Толгойлогшо Алексей Цыденов, Арадай Хуралай түрүүлэгшэ Цырен-Даша Доржиев Буряадай делегаци түлөөлбэ.
БАМ болон Транссибай хүгжэлтэ хадаа Буряад Уласай хүгжэлтын шэнэ арга болоно гэжэ уласай хүтэлбэрилэгшэ Алексей Цыденов Ородой Холбоото Уласай Юрэнхылэгшын Федеральна суглаанда хандалгын үнгэрһэнэй удаа хэлэбэ.
Ородой Холбоото Уласай Юрэнхылэгшын Федеральна суглаанда хандалгада Владимир Путин: «…хото, һууринуудые хүгжөөхэ, албан хэрэгэй эдэбхи үүсхэл дээшэлүүлхэ болон гүрэн түрын можо нютагуудай нягта холбоотой байхын тула Ород гүрэнэй хизаар дайдада мүнөө үеын харилсаанай зам байгуулха шухала. Зургаан жэлэй хугасаада БАМ болон Транссибай замаар 180 сая тонно хүрэтэр ашаа шэрэлгэ дээшэлхэ. Владивостокһоо Ород гүрэнэй баруун хилэ хүрэтэр долоон үдэрэй туршада ашаа тээһэн контейнернүүд хүрэхэ. Энэ хадаа эдэй засагай һалбарида ашаг үрэ түргэн оруулха хангалгын байгууламжануудай түсэлнүүдэй нэгэн юм. Ашаа шэрэлгэдэ оруулагдаһан мүнгэн аша харюутай байха, эдэ газарнуудай хүгжэлтэдэ нүлөөлхэ.
Манай түмэр замай харгыда транзидаар ашаа шэрэлгын хэмжээн дүрбэ дахин ехэ болохо ёһотой. Европо болон Азиин хоорондо транзидаар ашаа шэрэлгээр Ород гүрэн дэлхэйдэ түрүүшүүлэй тоодо орохо».
Тиихэдэ Владимир Путинай хэлэһээр, Байгалай онсо шуха байгаали сахин харууһалха талаар түсэлнүүд бүгэдэ бэелүүлэгдэхэ.
«Транссибай хүгжэлтэ хадаа хари гүрэнүүдэй дэлгүүртэ гараха арга болоно. Энээнһээ уламжалн, үйлэдбэри хүгжэжэ, ажалай һууринууд байгуулагдажа, бүхы гүрэн түрымнай олзо дээшэлхэ. Энэ түсэл Буряад Уласай хүгжэлтын шата болоно, тиимэһээ тэрэниие бэелүүлхэ талаар уласта ажал ябуулагдаха. Буряад Улас Транссибай логистикын түб болохо хүсэлтэй. Энэ талаар мүнгэ хүрэнгэ оруулалгын түсэлнүүд бэлдэгдэжэ эхилэнхэй.
Удаадахи зургаан жэлдэ хото, һууринуудые хүгжөөлгэдэ мүнгэ һомололго хоёр дахин дээшэлүүлхэ, харгы барилга болон заһабарилгада, нэн түрүүн можо нютагуудай харгынуудта, 6 триллионһоо 11 триллион хүрэтэр мүнгэ һомололго дээшэлүүлхэ тухай юрэнхылэгшэ даабари үгэбэ. Эдэ түсэлнүүд Буряад Уласта хабаатай, тиимэһээ эдэ түсэлнүүдые бэелүүлхэбди», - гэжэ Алексей Цыденов тэмдэглэбэ.
«Ородой Холбоото Уласай Юрэнхылэгшын Федеральна суглаанда хандалгада Байгал далайда, тэндэ ажаһуугшадта анхарал хандуулагдаһаар байһандань Юрэнхылэгшэдэ баяраа мэдүүлнэб. Байгалай хизаарай байгаали хамгаалгын болон эдэй засагай түсэлнүүдые бэелүүлгэ хадаа манай холын хараата түсэбүүд болоно. Юрэнхылэгшын хандалга хадаа урма зориг ургуулаа. Илангаяа сэрэгэй һалбариин туйлалтанууд далижуулна», - гэжэ интернет сүлжээндэ уласай хүтэлбэрилэгшэ бэшэһэн байна.
Заншалта ёһоор Ородой Холбоото Уласай Юрэнхылэгшын Федеральна суглаанда хандалгада Федерациин Зүблэлэй, Засагай газарай гэшүүд, Гүрэнэй Дүүмын һунгамалнууд, Үндэһэн хуулиин болон Верховно сүүдэй хүтэлбэрилэгшэд, Ород гүрэнэй можо нютагуудай хүтэлбэрилэгшэд, Федерациин можо нютагуудай хуули тогтоолгын түрүүлэгшэнэр, шажан мүргэлэй конфессинүүдэй хүтэлбэрилэгшэд, можо нютагуудай Олониитын танхимай болон олондо мэдэсэл тараадаг хэрэгсэлнүүдэй хүтэлбэрилэгшэд хабаадаа. Энээнһээ урид гүрэнэй хүтэлбэрилэгшын хандалга Кремлиин Георгиевска танхимда үнгэргэгдэдэг байгаа. Хэмжээ ябуулгада оньһон технологи хэрэглэгдэжэ, томо экрануудые үлгэхэ шалтагһаа боложо, талмай һэлгэгдээ гэжэ Ородой Холбоото Уласай Юрэнхылэгшын пресс-секретарь Дмитрий Песков хэлэһэн байна. Тиихэдэ Юрэнхылэгшын хандалгада хабаадагшадай тоо олошоруулагдаа.
Владимир Путин 14-дэхиеэ энэ хэмжээ ябуулга үнгэргөө. Буряад Уласай Толгойлогшын тушаалда Алексей Цыденов түрүүшынхиеэ Ородой Холбоото Уласай Юрэнхылэгшын Федеральна суглаанда хандалгада уригдаһан байна.
Ородой Холбоото Уласай Юрэнхылэгшын Федеральна суглаанда хандалга хадаа бодолго-хуулиин данса болоно. Энэ дансада Ородой Холбоото Уласай хүгжэлтын шухала һалбаринуудай холын хараата түсэбүүд тухай хэлэгдэдэг. Тиихэдээ бодолгын, эдэй засагай, үзэл сурталай байдал болон парламентын хуули тогтоолгын ажалаар тусхай дурадхалнууд оруулагданхай. Хандалгада хэлэгдэһэн шиидхэхэ асуудалнуудай ехэнхинь Ородой Холбоото Уласай Юрэнхылэгшын тогтоолоор хүсэндэнь оруулагдадаг.
kremlin.ru сайтһаа гэрэл зураг абтаба
