Үглөөдэр, мартын 8-да, Буряадаймнай түрүү эхэнэрнүүдэй нэгэн, ниитэ ажалай эдэбхитэн, Буряадай телевидениин түрүүшын диктор, арадаймнай эгээл хүндэтэй эгэшэнэрэй нэгэн Валентина Зондуевна Жалсараева 90 наһанайнгаа ойн баяр тэмдэглэхэнь. Иимэ арюухан, сэбэрхэн, сэдьхэл сагаахан, гүн ухаатай, нигүүлэсхы сэдьхэлтэй Эхэнэр юрын үдэр бэшэ, ёһотойл сэсэг мэтэ бадаржа, Уласхоорондын эхэнэрнүүдэй баярта үдэр мүндэлөөл ёһотой.
Боди сэдьхэлээ хүйтэрүүлээгүй
Мүнөө үеын үндэр наһатайшуулай хуби заяан Ород гүрэнэй шэрүүн хатуу үйлэ хэрэгүүдэй түүхэтэй нягта холбоотой байдаг. Хооһо нойтониие үзэжэ, хамалган хашалганда зүдэрөөшье һаа, зүрхэеэ хүйтэрүүлээгүйнь, нигүүлэсхы һайхан, сагаан сэдьхэлтэй зандаа үлэһэниинь гайхамшаг.
Валентина Зондуевнагай абань хасагай албатан байһан, шадамар бэрхэ ажалаараа эд зөөритэй, хубяа хааха байдалтай ажаһуугаа. Оройдоол 32 наһатайдаа хамалганда абтажа, ами наһантаяа хахасаһан юм. Ангиин дайсанай эхэ гэжэ 70 наһатай хүгшэн эжыень тушаагаа. Табадахи үхибүүгээ һаял түрөөд байһан хайрата эжынь ангиин дайсанай һамган гүүлэжэ, баһал тушаагдаа. Һүүлдэ хүгшэн эжынь гэртээ табигдажа, аша хүүгэдтээ бусаһан юм. Нялха нарай үхибүүн эхэгүй үлэбэ гэжэ хэншье ухаалдихагүй, нарайлһан эхэнэрые ЛВРЗ-гэй барилгада абаашаа бэлэй. Эжынь хүйтэ нойтоор, үлэн хооһоор ажаллаад лэ, тэндэһээ табигдажа, хэдэн һара ябагаар, хоёр мүрэн гаталжа, гэртээ бусаһан. Валентина Зондуевнагай бага балшар наһан тэрэ хатуу сагта үнгэрөөл даа. Хайрата эжыень янгинама хүйтэн январь һарада хони харахыень хүдөө бууса эльгээһэн юм. Хүнгэн хубсаһатай, хара ажалһаа бэень муудаһан байгаал хаш, оройдоол гурбан хоногой туршада эжынь уушханай хадхаляагаар үбдэжэ, наһа барашоо юм.
Ашата эгэшэ хуряйхайн үргэмжөөр
Хүдөө нютагтаа “арадай дайсанай” хүүгэд гэжэ этэрүүлэн, баһуулан үндыхэдэ бэлэн бэшэ ха юм даа. Эгээл ехэ Цыпелма эгэшэнь хори нэгэтэйхэн болоходоо, хадамда гаража, дүүнэрээ гэртээ асарһан юм.
- Улаан-Үдэ руу нэгэ полуторка ашаанай машинаар хоёр үдэрэй туршада хүрэжэ ерээ бэлэйбди. Хуряахайтамнай газар доро землянка баряад ажаһуугаа. Хотые тойроод тэрэ үедэ гэрнүүд байгаагүй, эды олон зондо хэн гэр барихаб даа. Аргатайшуулынь нүхэ малтаад, өөрын байрануудтай ажаһуугаа, - гэжэ Валентина Зондуевна хөөрэнэ.
Хуряйхайтаниинь өөһэдөө залуухануудшье һаа, үншэрһэн дүү басагадаа абажа, тэрэ багахан землянка соо ажаһуугаа. Улаан-Үдэ тойроод, элһэтэ газар малтахада бэлэн, хёосоор хана хэжэ, хүсэд гэрхэнүүдые бодхоодог һэн. Тэрэ сагта өөрын “гэртэй” хэбэртэй ехэл сэдьхэл амар байдаг бэлэй.
Хуряйхайнь, Дамби Дашимолонович Гомбоев, сэрэгэй моридто үбһэ бэлдэлгын алба хааха. Мүнөөнэй Улаан-Үдын 19-20-дохи кварталнуудай газарта үбһэнэй ехэ складууд байһан. Хүдөөгүүр үбһэн бэлдэгдээд, иишээ асарагдаад, тюк болгогдожо хуряагдаад, түмэр замаар морин сэрэг руу эльгээгдэдэг һэн. Гурбан дүү басагадтайгаа хотодо ажаһуухань хэсүүшэг байжа, хуряйхайтаниинь Зэдэ, Сэлэнгэ аймагууд руу үбһэ бэлдэлгын ажалаар нүүжэ ошоһон юм.
Артистын харгы шэлээ
Валентина басагахан Дэрэстэйн дунда һургуули дүүргэжэ, Улаан-Үдэ медтехникумдэ һуража эхилһэн юм. Нүхэр басаганиинь театральна училищида һуража байгаа, тэрээнтэеэ хоюулаа хамтын байрада байдаг бэлэй. Эмшэлэгшын һуралсал гэжэ ганса госпитальнуудтал ажаллаха, даабари гэжэ байхагүй. Харин нүхэр басаганиинь үдэшэ бүри ехэ һонин даабаринуудые дүүргэхэ, дуулаха, хатарха, элдэб зүжэгэй үйлэнүүдые наадаха. Буряад театрай үдэшэ бүри дэлгэдэг наадануудые ямаршье түлбэригүйгөөр харадаг бэлэй. Тиигэһээр Валя басаган театрай-хүгжэмэй һургуулида орохо һаналтай болоод лэ, үбэлдөө захиралдань ошожо, “намайе абагты” гэһэн юм. Теэд жэлэй тэгэн дунда хэн хүниие һургуулида абахаб даа. Һураһан газартаа хуу “таба” сэгнэлтээр һуралсалай жэл дүүргээд, хойто жэлынь дахин театрай-хүгжэмэй училищи ерэжэ ороһон юм. РСФСР-эй арадай артист Владимир Халматовай бүлэгтэ һуража гараад, буряад театрта хүдэлжэ эхилээ.
Хуби заяа хубилгаһан инаг дуран
1946 ондо хилэ хамгаалагша залуу офицертэй уулзаһан юм. Тэрэ сагта хилэдэ дүтэ оршодог Сэлэнгэ, Зэдэ аймагууд руу паспортын журам гэжэ байгаа. Амаралта болоходонь, Валентина Зондуевна хуряйхайндаа ошодог һэн. Нэгэтэ залуухан басаганда сэрэгэй офицер дүтэлжэ, удаан саг соо паспортыень шалгаад, юундэб даа үнэмшэлгыень абаад ябашоо. Һөөргэнь бусаахадань, эдэ хоёр танилсаһан юм. Тэрэ сэрэгэй офицер хэн байгааб гэхэдэ, залуу Дамба Зодбич Жалсараев мүн. Дайнда ябажа ерээд, хилын сэрэгтэ алба хаажа байгаа. Һаргама һайхан Валентина басаганда дурлажа, хуби заяагаа ниилүүлһэн.
- Манай аба “шэмэглэгдэһэн хасуури шэнги түрүүшынхиеэ гэртэнь ерээ һэм” гээд хөөрэдэг һэн. Дайшалхы сэрэгшын орден, медальнуудаа ялалзуулһан, сэрэгэй офицерэй ялас гэмэ хубсаһан, зэбсэгэй портупей болон һанжалдаһан планшет. Багахан хаамаг хорёо дээгүүр һүрөөд лэ буужа ерээ хаш даа, - гэжэ Рада Дамбаевна басаганиинь хөөрэнэ.
Сэрэгэй албатанда хадамда гарахадаа, өөрынгөө ажал тухай мартажа, нүхэрэйнгөө алба хааһан газартань ошожо, ара талань боложо үгэхэ - эхэнэр хүнэй үүргэ ха юм даа.
Дамба Зодбич сэрэгэй албанһаа капитан зэргэтэй табигдаад, Обкомдо хүдэлжэ эхилээ. Тэрэ үедэ гэр байрашье гэжэ байхагүй, Дээдэ Онгостойдо “Уран зохёолшодой зуһалан” гэжэ нэгэ томо гэгшын модон гэрэй нэгэ таһалгада байрлаһан юм. Энэ гэртэ Буряадаймнай элитэ уран зохёолшод ажаһуугаа. Зайн гал гэжэ байхагүй, газаагаа гал түлижэ, шэрэм табяад лэ, хамта эдеэгээ шанадаг бэлэй. Үдэшэндөө булта сугларжа, уран шүлэг, хөөрөөнүүдээ дэлгэхэ, дуугаашье дуулалсадаг һэн.
Тиигэһээр үхибүүдшье үндыжэ, Валентина Зондуевна Буряад радиодо дикторээр хүдэлдэг болоо. “Улаан-Үдэ хэлэнэ” гээд тоб гэмэ һайхан хоолойгоор хэлэһэн үгэнүүд бүхы Буряадые һэрюулэн баясуулдаг бэлэй. Тэрэ үедэ сонин радио хоёр бүхы дэлхэй дүүрэн мэдээсэл тараадаг тон шухала хэрэгсэлнүүд байгаа бшуу.
Телевидениин түрүүшын диктор
1961 ондо Буряадай телевидени байгуулагдаа. Энэ талаар бэлдэлгын ехэ ажал ябуулагдажа эхилээ. Буряад хэлэн дээрэ хэлэдэг диктор Валентина Жалсараева, харин ород хэлэн дээрэ Алла Болдогоева олон зон сооһоо шэлэгдээ. Редактораар Иван Шалимов, сурбалжалагшаар Иван Миронов томилогдоо. Тиин эдэ дүрбэн Эрхүү хото дүршэл гарахаяа эльгээгдэһэн юм.
Тэрэ сагта телевидени гээшэ эгээл харюусалгатай хэрэгшье һаа, оньһото хэрэгсэлэй байдал орёохон һэн. Хэрбэеэ мүнөө сагта эртэ үглөөгүүр гараха дамжуулга буулгабари дээрэ уридшалан бэшэгдэдэг һаа, тэрэ үеын хүдэлмэрилэгшэд ажалдаа хоножо, хара үглөөгүүр “амиды” хоолойгоор дуугарха баатай һэн.
1968 онһоо Валентина Зондуевна һөөргөө радиодоо бусажа, наһанайнгаа амаралтада гаратараа тэндээ хүдэлһэн юм.
Буряад радиодо суг хамта олон жэлнүүдэй туршада хүдэлһэн нүхэдөө дулаахан үгэнүүдээр дурсадаг. Мүнөө болотороо ажаллажа байһан Батор Цыбенов, редактор Владимир Лубсанов, хүгжэмэй талаар редактор Даши Самбоцыренов гээд “Баян талын аялга” гэһэн дамжуулга байгуулһан юм. Энэ дамжуулга мүнөөшье болотороо шагнагшадаа хужарлуулжа байдаг.
Уран шүлэгүүдэйнь сахюусан
Дамба Жалсараев сэрэгшэ байхадаашье, Обкомой болон бусад харюусалгата ажалда хүдэлхэдөөшье, Уран зохёолшодой холбооной түрүүлэгшэ, Буряад Уласай соёлой сайдшье байхадаа, ходол шүлэгөө зохёожо ябаа. Наһанайнгаа амаралтада гараһаар, уран зохёолдоо бүхы сагаа зорюулдаг болоо һэн. Валентина Зондуевна олохон шүлэгүүдэйнь мүндэлхын гэршэ болоһон. Мүн радиодоошье хүдэлхэ үедөө уран һайхан шүлэгүүдыень уншадаг бэлэй.
Уран зохёолшоной ульгам харгы наһанайнь нүхэрһөө ехээр дулдыдадаг. Зохёохы замайнь сахюусан боложо, арюухан сэдьхэлэй байдал зохёожо, найдамтай түшэлгэ боложо үгэхэдэнь лэ, шүлэгшье ульгамаар мүндэлхэ, уран зохёолой бүтээлнүүдшье аржытар бии болохол ха юм даа. Дамба Зодбич жаргалтайл хүн байгаа даа. Нүхэрэйнгөө ажаһуудалай, сэдьхэлэй байдалай хамгаалагша болоһон Валентина Зондуевна зохёохы замайнь ульгам харгыда тон һайнаар нүлөөлөө. Ирагуу найрагша хамта дээрээ 40-өөд номуудые хэблүүлээ. Ганса манай гүрэндэ бэшэ, мүн хари гүрэнүүдтэшье хэблэгдээ. Тэрэнэй шүлэгүүд соо Буряад һайхан байгаали, Буряад талын амисхал, арюун Байгалай һүлдэ, хэр угһаа сахигдажа байһан нангин һургаал, буряад басаганай арюухан энеэбхил зураглагданхай. Мэдээжэ хүгжэмшэн, Дамба Жалсараевай нүхэр Анатолий Андреев буряад дайдаяа, тоонто Хори нютагаа түүрээжэ бэшэһэн “Минии дайда” гэжэ шүлэгтэнь хүгжэм бэшэһэн юм. Тиигэжэ тэрэ дууниинь түргэн дэлгэржэ, һүүлдэнь Буряад Уласай “Таежная, озёрная, степная” гэжэ гимн болоо.
Ажалша бэрхэ бэри
Үшөө Дамба Зодбичой сэрэгэй албанда байхадань, Валентина Зондуевна тэрэ хүшэр сагта бага үхибүүгээ абаад, Хори аймагай Доодогол гэжэ газарта хадамуудтаа ерэжэ, нэгэ хэды байрлаһан юм. Тэрэ жэл үбһэ ногоон муугаар ургаа. Нэгэтэ хадам эжынь: “Тэрээ тэрэ сабшаланда ехэ гоёор ногоон ургана, гансал набтар ха даа. Халаг, сабшажархидаг һаа, болохол байгаа”, - гэжэ юрэ хэлээ бэлэй. Городой бэринь хажуур баряад, тэрэ газарынь ошожо ерээд, бүхы сабшаланай ногоо унагаажархиһан юм. Һүүлдэнь хуряахаяа ошоһон хадамуудынь ямар бэрхээр, газарай мэлигэр болотор сабшажархёо гээшэб гэжэ ехэтэ гайхалдаһан байгаа. Хара багаһаа хүдөө ажалһаа далтираагүй, бүхы ажалда тэгшэ һураһан басаган ажалша бэрхээрээ нүхэрэйнгөө нютагта сууда ороһон юм. Ямаршье ажал тон һайнаар дүүргэжэ шададагынь ажабайдалдань хэрэгтэй байгаа. Мүнөөшье, үндэр наһатай болонхойшье һаа, гэртээ гараа хабсараад һуунгүй, зуһаландаа сэсэгүүдые, огородой эдеэ ургуулжа, аша гушанараа харалсажа ажаһууна.
Буянтай абгайн үршөөлдэ хүртэе
Үглөөдэр ашата абгайн түрэһэн үдэр. Валентина Зондуевна энэ ойнгоо баярта болон Уласхоорондын эхэнэрнүүдэй үдэрөөр бүхы эхэнэрнүүдые амаршалаад, һайн һайханиие хүсэнэ. Мүн жаргалтай эхэнэрэй нюусаар нээжэ:
- Эхэнэр хүн гээшэ эрэ нүхэрэйнгөө найдамтай дүнгэлтэ боложо үгэхэ ёһотой. Эрэ хүн һанаһан зориһондоо үнэн сэхэ ябажа, гэр бүлэеэ хангаха, харин эхэнэр хүн гэр байраяа зохёожо, гал гуламтаяа сахиха. Гэртээ ажал хэнэгүйш гэжэ эрэ нүхэрөө зэмэлжэ байхагүй, өөрөөл шадаха зэргээрээ зохёожол, арга боломжоороо бүтээжэл, бүһэтэй хүнэй нэрэ һүлдэ өөдэнь үргэжэл байхал даа.
Аха захатаниие, буурал сагаан толгойтониие дүү зон үреэлжэ болодоггүй юм. Тиимэһээ буянтай Эгэшын үршөөлдэ булта хүртэе.
Гэрэл зурагууд Жалсараевтанай бүлын альбомһоо