Бүхы эхэнэрнүүдэй Мартын 8-ай һайндэр тэмдэглэжэ байхада, бүхэшүүл хибэс дээрэ гаража, Сагаан һарада зорюулагдаһан заншалта мүрысөөндэ хабаадаба.
Тус барилдаан жэл бүхэндэ Буддын шажанай заншалта Сангхын бүхы дасануудай шэрээтэнүүдэй тоосоото уулзалгын үедэ болодог юм.
Энэ удаа 600 гаран тамиршад барилдаанай һайндэртэ хабаадаһан байна. Үхибүүдэй дунда эгээл бүхэ 9 чемпион элирээ. Мүн 2006 оной хүбүүд бэе бэетэеэ мүрысөө. Тиихэдэ ехэшүүл гурбан шэгнүүртэ барилдаба.
Санагын дасан түлөөлһэн Евгений Аюшеев өөрын шэгнүүртэ түрүү һуури эзэлжэ шадаа. Тэрэ Сахирай интернат һургуулиин шаби юм.
- 1-дэхи ангиһаа барилдажа эхилээб. Тиихэдэ Үлэгшэн нютагта Бальжин Доржиевичай ударидалга доро һорилго хэжэ захалаа һэм. Минии аха Руслан бэрхэ барилдадаг юм. Тиимэһээ ахаяа һажаажа, барилдаанда орооб, - гэжэ Евгений Аюшеев хэлэнэ.
Баргажан аймагай Лугшахан һууринай Игорь Пилданов аяар 9 жэл соо бэеэ барилдаагаар һорино. Энэ мүрысөөндэ Игорьтэй тэмсэхэ хүн олдобогүй. Тиигэжэ тэрэ түрүү һуурида гараа.
- Үшөө бага байхадамни, түрэлхидни барилдаанда эльгээгээ. Мүнөө болотор Александр Ильич Эрхитуевай ударидалга доро һорилго хэнэб. Бидэ долоон хоногой зургаан үдэр һорилго хэнэбди. Иигээд лэ Борис Будаевтай адли шанга барилдааша болохо һанаан байна, - гэжэ Игорь Пилданов хөөрэнэ.
Аюр Гомбоев (Баргажан дасан), Арсалан Халзанов (Загастайн дасан), Чингис Николаев (Санагын дасан), Зорикто Доржиев (Чисаанын дасан), Бавасан Буянтуев (Атаган дасан), Сандан Гармаев (Сээжэ-Бургалтайн дасан) болон Буянто Шадапов (Хурамхаан дасан) гэгшэд түрүү һууринуудые эзэлһэн байна.
12 жэлэй саада тээ түрэһэн нохой жэлтэй хүбүүдэй мүрысөөндэ 30 гаран тамиршад хибэс дээрэ гараа. Эндэ Санагын дасанай жиндаг Артур Аюев түрүү һуури эзэлээ. Угданай дасанай Алексей Намнанов болон Табангут-Үшөөтын дасанай Түмэн Дондоков хоёр шангай һууринуудта гараһан байна.
Ехэшүүлэй дунда һонирхолтой тулалдаанууд болоо гэжэ тэмдэглэхээр. Монгол ороной барилдааша Гончиктапхай сугларагшадай дура буляагаа. Тэрэ уулзалга бүхэндэ һонирхолтой барилдаа харуулжа, шанга бүхэшүүлэй нюрга шоройдуулһан байна. Батор Цыренов, Ринчин Санжиев, Мунко Бадмаев болон бусад энэ монгол тамиршанда шүүгдээ һэн. Оройдоол финалда Цыбик Максаровта тэрэ диилдээ.
63 килограмм хүрэтэр шэгнүүртэ Баргажан дасанай Алексей Монтоев Сартуул Булагай дасанай Евгений Гармаевые илажа гараа. Хурамхаанай дасанай Арсалан Биликтуев финалда Артём Раднаев нүхэртэеэ гаража, нэгэдэхи һуури эзэлээ.