Түргэн шатараар заншалта мүрысөөн Ивалгын дасанай дэргэдэхи Буддын шажантанай дээдэ һургуули соо мартын 9-11-эй үдэрнүүдтэ болобо. Энэ хадаа Ородой Кубогта хүртэхын түлөө нэгэ шата болоно гээд һануулая. Мүнөө жэлэй мүрысөөндэ 615 хүн наадаба.
Нээлгын баяр ёһололой үедэ хабаадагшадые Бандида Хамба лама Дамба Аюшеев һайхан үгэнүүдээр амаршалаа. Мүрысөөндэ хабаадажа байһан уласхоорондын гроссмейстер гэжэ үндэр нэрэ зэргэтэй 19 шатаршан хэмжээ ябуулгые шэмэглээ гэжэ абаһаар лэ тэмдэглээ.
- Жэл бүри ерэдэг гроссмейстернүүдтэ баярые хүргэхэ байнаб. Юуб гэхэдэ, шатарша бүхэн тэдээнтэй хюлгын саана уулзаха һанаатай эндэ ерэнэ. Мүн ургажа ябаа залуу хүбүүд, басагаднай түрүү шатаршадай наада өөрын нюдөөр харахадаа, дүй дүршэл абана ха юм, - гэжэ Дамба Аюшеев хэлэбэ.
Нохой жэлэй гараад байхада, мүрысөөнэй үнгэргэгдэжэ байһые Дамба Аюшеев һануулаа. Тэрэ дооромбо лама Эрдэни Хайбзуун Галшиевай үгэнүүдые сугларагшадта тайлбарилжа үгэһэн байна.
- Хүн бүхэндэ гэртээ нохой бариха хэрэгтэй. Юуб гэхэдэ, муу байдалай тохёолдоод байбал, маанадые нохой һэргээжэ шадаха. Тиимэһээ мүнөө жэл нохойн ашаар һэргэг байжа, шэнэ нюдөөр ажабайдалаа хаража байхамнай болтогой, - гэжэ Дамба Аюшеев хөөрөө.
Буряад Уласай Засагай газарай Түрүүлэгшын орлогшо Баир Цыренов, Буряадай Арадай Хуралай Түрүүлэгшын орлогшо Вячеслав Ирильдеев, эгээл үндэр наһатай хабаадагша Сергей Гончикович Санжиев гэгшэд сугларагшадые амаршалһан байна.
- Буряад орондомнай шатар һайнаар хүгжэжэ байна гэжэ хэлэхээр. Юуб гэхэдэ, аймаг бүхэндэ, Улаан-Үдэдэ олон хүнүүдэй хабаадалгатай тулалдаанууд үдэр бүри үнгэргэгдэнэ. Мүн манай ургажа ябаа залуу халаан һайн дүнгүүдые харуулна. Апрель һара соо Ородой чемпионадта аяар 11 эдиршүүлнай хабаадахань, - гэжэ Буряадай шатарай федерациин хүтэлбэрилэгшэ Вячеслав Ирильдеев омогорхон хэлээ.
Олон мэдээжэ шатаршад Ивалга ерэхэһээнь урид Эрхүү хото айлшалаад гараа. Тэндэ түргэн шатараар Эрхүү можын Амбан захирагшын шангуудта хүртэхын түлөө мүрысөөн болоһон байна. Буряадайшье шатаршад амжалтатайгаар тэндэ хабаа- дажа ерээ. Шангай 7-дохи һуури уласхоорондын мастер Жамсаран Цыдыпов эзэлээ. 19 наһа хүрөөдүй эхэнэрнүүдэй дунда Арюна Дашдорж ба Екатерина Гыргенова гэгшэд нэгэдэхи-хоёрдохи һууринуудта гараа. 19 наһа хүрөөдүй эрэшүүлэй дунда Кирилл Базырцыренов мүнгэн медальда хүртөө. 15 наһа хүрөөдүй хүбүүд, басагадай дунда Кира Турусова 1-дэхи болон Данил Алексеев 2-дохи һууринуудые эзэлээ.
Ивалгын дасанда Монголой тамиршан, уласхоорондын мастер Сумья Билгүүн бүхы гроссмейстернүүдые хойноо үлөөжэ, чемпионой нэрэ зэргэдэ хүртөө. Тэрэ 13 шатада 11 очко абаа. Дүрбэн шатаршан 10,5 очкотойгоор мүрысөөгөө түгэсхөө. Эрхүү хотодо түрүүлһэн Новосибирскын гроссмейстер Сергей Юдин хоёрдохи һуурида гараа. Мүн талмайн эзэн Жамсаран Цыдыпов гурбадахи һуури эзэлээ.
Эхэнэрнүүдэй дунда уласхоорондын гроссмейстер Инна Ивахинова түрүүлжэ гараа. Инна хадаа энэ мүрысөөндэ өөрын шатарай һургуулиин 30 шатаршадые асаржа хабаадуулһан байна. Тиимэһээ Инна өөрөө наадахаһаа гадна, үхибүүдэйнгээ хойноһоо хаража үрдеэ.
Монголой шатаршад Бямбацырен Гаримагнай болон Очирхуяг Үлзыхэшэгжаргал эдиршүүлэй дунда шалгараа. Эндэ Кирилл Базырцыренов болон Екатерина Гыргенова гэгшэд гурбадахи һуури эзэлээ гээд хэлэхэ хэрэгтэй.
Хори аймагай Юрий Хагоев, Улаан-Үдын Константин Балханов, Виктор Шарыпов болон Светлана Жеребцова гэгшэд аха захатанай дунда түрүү һууринуудые эзэлээ.
Хабаадагшадай тэмдэглэһээр, заншалта ёһоороо мүрысөөн үндэр хэмжээндэ эмхидхэгдээ. Шата бүхэндэ 10 наада шатарай федерациин сайт дээрэ сэхээр хараха арга олгогдоо.
Авторай гэрэл зурагууд