764
Үсэгэлдэр, мартын 15-да, Буряад Уласай Толгойлогшо Алексей Цыденов худалдаа-наймаанай Capital Mall түбтэ уласай залуушуултай уулзаба.
Асуудал-харюу маягаар үнгэргэгдэһэн уулзалгада, уласай хүтэлбэрилэгшэ залуушуулай асуудалнуудта харюусажа, Засагай газарай түлөөлэгшэдтэ даалгабаринуудые үгэһэн байна. Алексей Цыденовэй хэлэһээр, иимэ маягаар үнгэргэгдэһэн уулзалга ехэ удха шанартай юм, хэмжээ ябуулгын үедэ саашадаа бэелүүлэгдэхэ һонирхолтой дурадхалнууд ородог.
«Залуушуултай уулзахадаа, хүн залуу болоно. Тэдэнэй шухала асуудалнуудта анхарал хандуулха хэрэгтэй гэжэ ойлгохо ёһотойбди», - гэжэ уласай хүтэлбэрилэгшэ тэмдэглэбэ.
Уулзалгын үедэ ТОСуудта залуушуулай хүдэлөө хүгжөөхэ, Сэлэнгэ голой эрьедэ зайн галай станци баригдаха талаар, ой модоной ехээр отоглогдохо, улас дотор газ дэмжэхэ, залуушуулые ажалаар хангаха гэһэн асуудалнуудаар хэлсэһэн байна. Тиихэдэ шэнэ юумэ нэбтэрүүлгэ болон эрдэм ухаанай хүгжэлтын талаар асуудалнуудые залуу зон табиба. Залуу мэргэжэлтэд уласай түрүү түсэлнүүдтэ хабаадаха ёһотой гэжэ Алексей Цыденов тэмдэглэжэ, залуу эрдэмтэдэй зүблэлдэ хониной нооһо элдүүрилхэ технологи бэлдэхэ тухай дурадхал оруулба.
«Бүд бараагай кластер байгуулжа, оймһонһоо хибэс хүрэтэр үйлэдбэрилхэ аргатайбди. Утаһа ээрэхэ хэрэгсэлнүүд бии, харин нооһо ондоо тээһээ асарнабди. Бүдүүн, нарин нооһо илгаруулха технологи хэрэгтэй», - гэжэ Алексей Цыденов хэлэбэ.
Залуушуулай олзын хэрэг эрхилэлгын һалбарида холын хараата түсэбүүд тухай хэлсэжэ, уласай хүтэлбэрилэгшэ залуушуулай эдэбхи үүсхэл дэмжэхэ ниитэ нэгэ түб тухай тэмдэглэбэ.
Алексей Цыденовэй хэлэһээр, залуушуултай уулзалга аша үрэтэйгөөр үнгэрөө.
«Манай залуушуул эдэбхитэй, урагшаа һанаатай гэжэ харабаб. Тэдэнэр хүдэлмэрилхэ хүсэлтэй, тиимэһээ залуушуулай һанаһанаа бэелүүлхэ оршон байгуулха - манай зорилго», - гэжэ уласай хүтэлбэрилэгшэ уулзалгын дүн согсолоо.
Буряад Уласай Засагай газарай хэблэлэй албанай гэрэл зураг
