584
Эхэнэрнүүдэй дунда Ородой Холбоото Уласай боксоор чемпионадта хабаадагшад һоригшодтоёо хамта Улаан-Үдын 40 дугаар һургуули ерэжэ, эрхэтэдэй уялга дүүргэбэ.
Эхэ оронойнгоо ажабайдалда хабаадаха зорилготой басагад һорилгын һүүлээр һунгуулиин газарта ерэһэн байна. Ород гүрэнэй ямаршье можо нютагта байһан хүнүүд, һунгалтада хабаадаха ёһотой гэжэ тамиршад тэмдэглэбэ.
– Би Ородой Холбоото Уласай эрхэтэн хадаа ерээдүйн ажабайдалай түлөө һунгахаа ерээб. Манай гүрэндэ шанга юрэнхылэгшэ хэрэгтэй. Тамиршад 18 наһа хүрэнхэй, өөдөө юумэ ойлгохо болонхой, тиимэһээ һунгалтада хабаадана, - гэжэ Буряадай эхэнэрнүүдэй суглуулагдамал командын ахалагша тренер, «Номто» гэһэн тамирай клубай захирал Бато-Мүнхэ Ванкеев хэлэбэ.
– Хүн бүхэн һунгалтада хабаадаха ёһотой. Гүрэн түрэеэ хүтэлбэрилхэ хүниие бидэ һунганабди. Энэ хадаа юрын хэмжээ ябуулга бэшэ, харин эрхэтэн бүхэнэй уялга болоно, - гэжэ Ородой Холбоото Уласай эхэнэрнүүдэй суглуулагдамал командын ахалагша һоригшо Александр Черноиванов хэлэбэ.
Мартын 19-дэ Буряад Уласта эхэнэрнүүдэй дунда боксоор Ородой чемпионат үнгэргэгдэхэ гэжэ һануулнабди.
Буряадай дэбисхэртэ түрүүшынхиеэ үнгэргэгдэхэ мүрысөөндэ Ородой Холбоото Уласай 50-һаа дээшэ можо нютагуудай түлөөлэгшэд хабаадаха юм. Ородой Холбоото Уласай чемпионадта гүрэнэй түрүү боксёрнууд сугларха гэжэ тэмдэглэлтэй. Тэдэнэй дунда 2016 оной Олимпиин наадануудай хүрэл медальда хүртэһэн Анастасия Белякова, Ородой хэдэн удаа чемпионой нэрэ зэргэдэ хүртэһэн Ярослава Якушина, Европын чемпионадай мүнгэн медальда, Европын түрүүшын наадануудай хүрэл медальда хүртэһэн Саяна Сагатаева, Европын чемпион Дарья Абрамова болон Александра Ордина гэгшэд.
