667
Ородой Холбоото Уласай Юрэнхылэгшын һунгалтын дүнгүүд согсологдожо, уридшалһан тоо баримтанууд хэлэгдэбэ.
Буряадай һунгуулиин комиссиин мэдээсэһэнэй ёһоор, Буряад Уласай ажаһуугшадай 75 тухай хубинь һунгалтада хабаадаа. Тэдэнэй 74 хубинь Ородой Холбоото Уласай Юрэнхылэгшэ Владимир Путинай түлөө дуугаа үгэһэн байна.
Уласай һунгуулиин комиссиин түрүүлэгшэ Дмитрий Ивайловскиин хэлэһээр, Аха, Хори, Хэжэнгэ, Хурамхаан аймагуудта ажаһуугшадай 90 хубинь һунгалтада хабаадаа. Буряадай һунгагшадай бүридхэлдэ 601 мянганһаа дээшэ хүн оруулагдаһан байгаа, тиихэдэ һунгуулиин 446 мянган бюллетень хүсэтэй гэжэ тоологдоно.
- Үглөөнэй 8 сагһаа ажаһуугшад эдэбхитэйгээр һунгалтада хабаадажа эхилээ. Сибириин федеральна тойрогто манай улас һунгалтада ажаһуугшадай хабадалгаар гурбадахи һуури эзэлээ, - гэжэ Дмитрий Ивайловский хэлэбэ.
Буряадай һунгуулиин комиссиин түрүүлэгшын тэмдэглэһэнэй ёһоор, Ородой Холбоото Уласай Юрэнхылэгшын һунгалтын түүхэдэ энэ удаа эгээл олон хүн дуугаа үгэһэн байна. Тиимэһээ федеральна, уласай, нютагай засагай байгууламжануудай засаг зургаанай харюусалга дээшэлнэ. Залуушуулай эдэбхитэйгээр һунгалтада хабаадаһаниинь тэмдэглэлтэй гэжэ Дмитрий Ивайловский хэлэбэ. Юрэнхылэгшын һунгалтада 35 наһа хүрөөдүй, 130 мянганһаа дээшэ залуу зон дуугаа үгөө.
Һунгуулиин газарнуудта Ородой Холбоото Уласай Юрэнхылэгшын тушаалда бүхы зууршалагшадай түлөөлэгшэд адаглажа байгаа. Тиихэдэ Владимир Путин болон Павел Грудинин гэгшэдэй түлөөлэгшэд эгээл олон байба. Буряадай Олониитын танхимай 348 хүн, «Ниитэ нэгэ Росси» намай – 725 хүн, КПРФ-һээ 536 хүн һунгалтын ябаса хинаһан байна. Һунгалтын үедэ хуули эбдэһэн ушар байгаагүй, харин техническа асуудалнууд гарһан байна. Бүхыдөө эрхэтэдһээ 41 хандалганууд орожо, тэдэ асуудалнууд байра дээрээ шиидхэгдээ.
- Һунгуулиин комиссин гэшүүдтэ гурбан мэдүүлгэ ороһон байна, тэдэниие аяг ааша гаргаба гэжэ гомдол ороо. Һунгагшадай бүридхэлэй талаар асуудалнууд гаража, тэдэниие байра дээрээ шиидхээ. 602 наһа бараһан хүнүүд һунгагшадай бүридхэлдэ оруулагдаха ушар дайралдаа. Һунгуулиин ондоо газарта һунгахаб гэжэ мэдүүлгэ бариһан хүнүүд, өөрынгөө һунгуулиин газартаа дуугаа үгэхэеэ ерэжэ, бүридхэлһөө гарашаһан байха ушар тухай тэмдэглэгдээ. Эндэ гараһан асуудал бүхэниие хаража үзэжэ, саашадаа иимэ алдуу гаргахагүй гэжэ ажал ябуулхабди, - гэжэ Дмитрий Ивайловский тэмдэглэбэ.
Һунгалтын дүнгүүд Буряадта һаяын хоёр үдэртэ согсологдожо, баталагдаһан баримта бэшэг Москва хотын Түбэй һунгуулиин газарта дамжуулагдаха. Ородой Холбоото Уласай Юрэнхылэгшын һунгалтын тоо баримтанууд Буряадай һунгуулиин комиссиин сайтда толилогдохо.
