865
Үсэгэлдэр, мартын 19-дэ, Улаан-Үдэдэ эхэнэрнүүдэй дунда боксоор Ородой Холбоото Уласай чемпионадай нээлгын баяр ёһолол үнгэргэгдэбэ.
Анха түрүүшынхиеэ Буряадта эмхидхэгдэжэ байһан хэмжээ ябуулгада Буряад Уласай Толгойлогшо Алексей Цыденов, Буряад Уласай Арадай Хуралай түрүүлэгшэ Цырен-Даша Доржиев гэгшэд хабаадаба.
Эхэнэрнүүдэй дунда боксоор Ородой Холбоото Уласай чемпионат тамирай-спортын тамирай байшанда 6 үдэрэй туршада үнгэргэгдэжэ, мартын 24-дэ түгэсэхэ юм. Ородой Холбоото Уласай 43 можо нютагуудай 153 тамиршад Улаан-Үдэ ерэһэн байна.
- Үнгэрһэн жэлэй май һарада Ородой Холбоото Уласай Спортын яаман болон Боксын федерацитай хэлсэжэ, май һараһаа бэлэдхэл эхилээбди. Чемпионат дээдэ хэмжэендэ эмхидхэгдээ гэжэ мүнөө бидэ харанабди. Мүрысөөндэ хабаадагшадай байха байра, эдеэ хоол, транспорт, һорилгын талмай бэлэн, - гэжэ Алексей Цыденов хэлэбэ.
Нээлгын баяр ёһололдо уласай хүтэлбэрилэгшэ тамиршадта шанга тулалдаануудые, харин рингһээ гадуур эбтэй байхыень хүсэбэ.
Буряад Уласай Арадай Хуралай Түрүүлэгшэ Цырен-Даша Доржиевай хэлэһэнэй ёһоор, боксын һайхан заншалтай Буряадай дэбисхэртэ мүрысөөн үнгэргэгдэнэ.
- Саашадаа Олимпиин наадануудта, дэлхэйн, Европын чемпионадуудта хабаадаха боксёрнууд урган гараха гэжэ найданаб, - гэжэ Цырен-Даша Доржиев тэмдэглэбэ.
Ородой Холбоото Уласай боксоор чемпионат «Ариг Ус», «Бурятия» телеканалнуудаар, Ород гүрэнэй боксын федерациин, «Номто» гэһэн тамирай клубай сайтда, В контакте сүлжээнэй Ород гүрэнэй болон Буряад Уласай боксын федерациин бүлэгүүдтэ сэхэ дамжуулганууд харуулагдаха.
Буряадай тамиршад хэдэн жэлэй туршада Ород гүрэнэй болон уласхоорондын хэмжээнэй зуугаад медальда хүртэһэн гэжэ тэмдэглэлтэй. 2015 ондо «Кубок Наций» гэһэн уласхоорондын турнирта Наталья Шадрина Людмила Воронцова хоёр - алтан медаль, Кристина Ткачева мүнгэн медаль абаһан юм. 2017 ондо эдиршүүлэй дунда дэлхэйн чемпионадта Кристина Ткачева алтан медальда хүртөө.
Эхэнэрнүүдэй дунда боксоор һоригшодые нэрлэбэл, Бадма Бадмаев, Бато Батуев, Валерий Иванов болон бусад болоно. Эхэнэрнүүдэй дунда боксоор Ородой Холбоото Уласай чемпионадта Грати Екатерина (48 кг), Бадмаринчинова Эржена (51 кг), Серебрякова Кристина (54 кг), Воронцова Людмила (57 кг), Шадрина Наталья (60 кг), Лумбунова Дулма (75 кг), Сандакова Дарима (75 кг), Ткачева Кристина (свыше 81 кг) гэгшэд Буряадай суглуулагамал командада ороһон байна.
Анна Огороднигой гэрэл зурагууд
