​Буряадай филармони 80 жэлэйнгээ ойн баяр угтана

1938 оной мартын 19-дэ Буряад-Монгол АССР-эй тогтоолоор Буряад-Монголой гүрэнэй филармони байгуулагдаһан юм. Соёлой шэнэ эмхиие даагшаар Ленинград хотоһоо хүгжэмшэн, дирижёр, хүгжэм шүүмжэлэгшэ Яков Геншафт уригдаһан байна. Тэрэнэй хүтэлбэри доро филармониин эгээл түрүүшын зохёохы бүлгэм – симфоническа оркестр байгуулагдаа һэн. Оркестр ехэнхидээ Ленинградай консерватори дүүргэгшэдһээ бүридхэгдөө бэлэй. 1938 оной ноябриин 25-да шэнэ оркестр Бетховеной Табадахи симфони гүйсэдхэжэ, эгээл түрүүшынгээ тоглолто табиһан байха юм.

Буряадтаа мэдээжэ артистнар хэзээ нэгэтэ Филармониһоол зохёохы замаа эхилһэн байдаг. Энэ гуламтын үндэһэн дээрэ хүгжэмэй, дуу хатарай “Байгал” ансамбль 1942 ондо байгуулагдаһан юм. Дирижёр Жигжит Батуев эгээл түрүүшын уран һайханай талые даагша болоһон байна. Мүнөө дуу болон хатарай “Байгал” театр Буряад ороной нюур шарай, һүлдэ тэмдэг болонхой.

Филармони хадаа алишье үе сагта Буряадай тоглолтонуудай гол талмай боложо үгэдэг һэн. Соёлой талаар гэгээрүүлгын ехэ үүргэ дүүргэжэ, дэлхэйн эрхим хүгжэмтэй арад зониие танилсуулдаг һэн. Мүнөөшье энэ үүргэнь хуушараагүй.

Һүүлэй жэлнүүдтэ Буряадай филармони фестивалиин хүдэлөөнэй түб болонхой. Эмхидхэн үнгэргэһэн ехэ хэмжээнэй фестивальнуудыень нэрлэбэл, Байгалай Рождествогой, камерна хүгжэмэй “Pizzicato”, намарай джазай, шэнэ дуунай “Индиклассика”, “Нүүдэлшэдэй ая дуун” болон бусад болоно.

- Буряадай Гүрэнэй филармони 80 жэлэйнгээ ойн баярта дашарамдуулан, хэдэн тоглолто үнгэргэнэбди. Мартын 19-дэ “Үнөөхил зандаа” гэһэн нааданда филармониин ветеранууд ехэ тоглолто харуулаа. Эндэ Буряад Уласай габьяата артистнар Михаил Фатеев, Светлана Халбаева, Елизавета Осеева, Ородой Холбоото Уласай соёлой габьяата хүдэлмэрилэгшэ Сергей Раднаев, Ородой Холбоото Уласай габьяата артистка Софья Данзанэ, Буряад Уласай соёлой габьяата хүдэлмэрилэгшэ Буда-Ханда Дашиева болон бусад бэлигтэй артистнар хабаадаа юм, - гэжэ соёлой сайд Соёлма Дагаева мэдээсэбэ.

Ойн баярай хэмжээнүүд мартын 23 болотор үнгэргэгдэхэ. Түгэсхэлэй үдэр Филармониин тайзан дээрэ Эрхүү можын филармониин оркестр түүхэтэ Бетховеной 5-дахи симфони гүйсэдхэхэ юм.

Буряадай Гүрэнэй филармониин уран һайханай талые даагша Наталья Улановагай тэмдэглэһээр, өөһэдын симфоническа оркестр байгуулха ажал шухала болонхой.

Апрелиин 8-да “Солисты Москвы” гэһэн камерна оркестр болон мэдээжэ хүгжэмшэн Юрий Башмет Н. Бестужевай нэрэмжэтэ Ород драмын театрай тайзан дээрэ тоглолто үгэхэ юм. Эндэ Буряадай филармониин солист, альтист Владимир Ткаченко хабаадалсаха.