Буряад Уласай Арадай Хуралай Түрүүлэгшэ Цырен- Даша Доржиев албанай хэрэгээр Ярууна аймаг ошожо ерээ. Хоёр хоногой туршада тэндэхи нютагуудаар ябажа, арад зонтой уулзажа хөөрэлдөө юм. Тиихэдээ Эгэтын дасан орожо, Буддын шажантанай нангин шүтөөн Зандан Жуу бурхандаа мүргөөд, Гоондодо баригдажа байһан соёлой байшан, Тэлэмбэдэ табигдажа байһан һэеы гэр хараад, Нарһатада хүсэд баригдаадүй байгаа эмнэлгын комплексто ороод, Иисэнгэдэ ажаһуудаг малшанай бүлэтэй золгоод, түрэл һургуулидаа орожо, багшанар болон һурагшадай ажабайдалтай танилсаад, Буряад Уласай Арадай Хуралай Түрүүлэгшэ ниислэл хотоёо бусаба.
Хүдөө нютагуудаар ябахадаа, Цырен-Даша Доржиев һүүлэй үедэ бэелүүлһэн ехэ ажал тухайгаа тодорхойгоор тоособо. Ородой Холбоото Уласай Федерациин Зүблэлдэ январиин хуушаар Буряад Уласай үдэрнүүд яагаад үнгэрөөб гэжэ Арадай Хуралай Түрүүлэгшэ нютагаархидтаа хөөрэжэ үгэбэ. Мүн тиихэдэ гүрэнэймнай Юрэнхылэгшын жэлдээ нэгэ дахин Федеральна Суглаанай гэшүүдтэ элидхэдэг хандалгань уласаймнай ажабайдалда ямар нүлөө үзүүлхэ байнаб гэжэ тайлбарилаа. Мүнөөдэр Буряад орондо арад зоной ажабайдалда аша туһатай ямар ажал ябуулагдажа байнаб, хожом хойшодоо юу хэхэ тухайгаа мүн лэ элидхэбэ. Уулзалгын удаа Ярууна аймагай түлөөлэгшэд иигэжэ тэмдэглэнэд:
- Телевизорээр хараһамнай, сонин сэтгүүлнүүд соо уншаһамнай, нэгэ хэрэг байна. Харин улаан нюураараа уулзажа, Москвада болоһон үйлэ хэрэгүүдтэ өөрөө хабаадаһан хүнэй хөөрөөе хоёр шэхээрээ шагнажа, толгойдоо шэнгээжэ абаха гээшэмнай тад ондоо юм байна. Цырен-Даша Эрдынеевичнай манай, хүдөөдэ ажаһуугаа арад зоной, ажабайдалда сэхэ хабаатай зүйлнүүдые бултандамнай ойлгосотойгоор, ехэ зохидоор хөөрэжэ үгөө».
Буряад Уласай Арадай Хуралай Түрүүлэгшэ олон зоной һанаа зобоодог хурса-хурса асуудалнуудһаа далтирбагүй, бэеэ зайлуулбагүй. Тэсэмгэйгээр, хооһон үгэгүйгөөр харюусаба. Хүдөөгөөрхин мүнөө сагта элүүрые хамгаалгын, хүдөө ажахы хүгжөөлгын бэрхэшээлнүүдтэ хабаатай, мүн салин хүлһэн тухай асуудалнуудые олоор табина. «Багшада, тэрэнэй хэды залуушье һаань, шала аршадаг ажалшанһаа бага салин түлэхэнь гажа буруу ябадал», - гэжэ Буряадай парламентын хүтэлбэрилэгшэ батаар сэдьхэнхэй. Ушар иимэһээ мүнөө дутаад байһан мүнгэ заабол оложо, салингай тон доодо захын хэмжээнһээ дутаахагүйе оролдохобди гэжэ үгэеэ үгэбэ.
Иисэнгын залуушуул нютаг нуга руугаа бусахые эрмэлзэнэ гэжэ «Буряад үнэн» сонимнай үе-үе болоод лэ бэшэжэл байдаг гээшэ ааб даа. Буряад Уласай Арадай Хуралай Түрүүлэгшэ манай сониной бэшэһэн мүрнүүдэй яаха аргагүй үнэн байһанииень хоёр нюдөөрөө хараа. Залуу наһан сог залитай, шадал шандааһатайл ха юм даа. Тиимэһээ нютагаа заабол бусаха гэжэ шиидэһэн залуу иисэнгээрхин хүбшэ тайгадаа гаража, барилгын модо бэлдээд, унгигүй һүхэнүүдээ дуугаргажа, түргэн сагай туршада модон гэрнүүдээ барина. Тиин мүнөө дээрээ шэб шэнэхэн 7 иимэ байшан Иисэнгын сэргэдэ буужа ерэһэн айлшадайшье, нютаг зонойшье нюдэнэй хужар боложо үгэнэл. Зай, иимэ оршон байдалда нютагаа бусаһан залуушуул юугээрээ хоолойгоо тэжээхэнь гээшэб гэжэ буряад хүнэй хара, сагааншье һанаанда орохо гүб даа. Ушарынь иимэ. Иисэнгэ нютагнай мал ажахы эрхилхэдэ тааруу байгаалитай. Тиимэһээ Ярууна аймаг соогоо тэдэ хамагһаа олон бодо малтай боложо, баян бүдүүн ажаһууна. 1962 ондо Хальмагһаа асарагдаһан буха, үнеэдынь мүнөөшье бии зандаа. Буряад үүлтэрэй морид эндэмнай мүн лэ олон.
«Үүлтэртэ мал үсхэбэрилдэг зэргэеэ алдаһантнай харамтай байна. Гүрэнһөө мүнгэ абадаг байгаа ха юмта, - гэжэ Цырен-Даша Доржиев мал ажахышадтай золгохо зуураа хэлэбэ. - Саашаа юуншье болог, тэрэнээ бусаажал һалаха хэрэгтэй. Жэшээнь, мүнөө үүлтэртэ мал үсхэбэрилэгшэдэй тоосооной эрилтэнүүд хүнгэдхэгдөөд байна».
Хүдөө ажахы эрхилхэдээ, нютаг нютагай шэнжэдэ тааруу ажал ябуулбал зүйтэй гэжэ Арадай Хуралай Түрүүлэгшэ үшөө дахин малшадта һануулба. Аймаг бүхэн хүдөө ажахыгаа өөр өөрынгөө һалаагаар, байгаалидаа тааруугаар эрхилхэ болоно. Улаан-Үдэ хотодо дүтэ оршодог нютагуудта һаамхай үнеэдые олоор барибал, һайн байха. Захаамин, Бабанта, Түнхэн, Ярууна аймагуудта мяхалиг үүлтэрэй мал зохихо. Мүн энэ нютагуудта адуу үдхэхэдэ таарамжатай.
«Зүблэлтэ гүрэндэ байгаалиин шэнжэнүүдые шудалаад, хаана, ямар ажахы байгуулбал, тон таарамжатайб гэжэ элирүүлээд, тэдэнь урагшатай һайн хүдэлдэг байгаа. Сагай ябаса эгээл тэрээндээ бусаха шухала гэжэ харуулба ха юм даа. Урданай юумэн ула болоо гэжэ һанахамнай буруу бэшэ гү?» – гэжэ Цырен-Даша Эрдынеевич нютагаархидайнгаа һанамжаар һонирхобо. Гадна Буряад Уласай Толгойлогшын малшадтай ехэ уулзалга бүтээһэн тухайнь тодорхойгоор хөөрэбэ. Буряадай Засагай газарай гэшүүд, Арадай Хуралай һунгамалнууд, хүдөөдэ сагаан болон мяхан эдеэ бэлдэгшэд, арһа шүрбэһөөрнь эд бараа үйлэдбэрилдэг олзын хэрэг эрхилэгшэд нэгэ газарта нам һуужа, саашаа ямар ажал бүтээбэлнай, хэрэг болохоб гэжэ ухаан бодолоо гүйлгөө ха юм. Тиигээд мүнөө ургамал таригшад эгээл иимэ уулзалгада бэлдэжэ байна.
Эгэтын Адаг нютагтамнай гэр бүлын һаали байгуулагдаад байна. Теэд тэдэнээ тэжээхын тула үбһэ хулһан, талха таряан, шэмэтэ тэжээлшье хүрэтэрөө хэрэгтэй ха юм даа. Эгэтын Адагай аха захатан, бүхы наһаараа агрономоор хүдэлһэн Батор Цыреновтэй Арадай Хуралай Түрүүлэгшэ ганзага нэгэн байһанаа мэдүүлжэ, хүдөөдэ ажал хэхэ зон үсөөн болоод байна гэһэн бодолыень зүбшөөбэ. Хүдөөгэй бэрхэшээлнүүдые нэгэ нэгээр шиидхэжэ байхагүй, нэгэн доро олоорнь шиидхэбэл зүб байха гэжэ Цырен-Даши Доржиев бодомжолно.
Ярууна аймагай ажаһуугшад олон жэлэй туршада шиидхэжэ ядаһан орёо бусад асуудалнуудаа табиһан байна. Буряад Уласай мэдэлдэ байһан замай шанар һайжаруулха, Иисэнгэ һууринда харанхы гудамжануудые гэрэлтүүлхэ, Нарһатада баригдажа байһан аад, 2009 ондо зогсошоһон эмнэлэгэй барилга үргэлжэлүүлхын хажуугаар, тэндэ шэнэ котельнэ бариха, бүхэдэлхэйн нангин шүтөөн Зандан Жуугай хадаглагдагша Эгэтын дасан һэльбэн шэнэлхэ гэхэ мэтэ. Ярууна аймагта интернетгүй нютагууд бии. Жэшээнь, тэлэмбээрхин мүнөө энэ асуудалые дары шиидхэгдэхэ зэргэтэй амин шухала асуудал болоо гэнэ. Буряад Уласай Арадай Хуралай Түрүүлэгшэ хүн бүхэниие анхаралтайгаар шагнаад, табиһан асуудал бүхэнииень дэбтэр соогоо бэшэжэ абаба.
Марина ХАМНАЕВА, Баяр ЖИГМИТОВ