671
Буряад Уласай Толгойлогшо Алексей Цыденов улас дотор түймэрэй аюултай хаһа эхилээ гэжэ тэмдэглэжэ, ажаһуугшадые хагда ногоо, бог шорой галдахагүй гэжэ уряалба.
«Зарим аймагуудта һалхин секундын 27 метр хүрэтэр эршэтэй болоно. Нёдондонойхидо адли байдал тохёолдожо магадгүй. Үнгэрһэн жэлдэ түймэр ехэнхидээ бог шорой галдаһан ушарһаа болоо. Газаа гансата дулаан боложо, һалхин эршэдээ, тиимэһээ хагда ногоо, бог шорой бү галдытдаа гэжэ уряалнаб», - гэжэ Алексей Цыденов ажаһуугшадта хандаба.
Буряад Уласай Засагай газарай Түрүүлэгшын аюулгүй байдалай талаар орлогшо Пётр Мордовскойн хэлэһээр, Ородой Холбоото Уласай Засагай газарта түймэрэй аюулгүй байдалай талаар хэмжээнүүд шангадхагдаа. Хэмжээнүүдэй ёһоор, хагда ногоо галдаха, харгын, түмэр харгын хажуугаар ногоо галдаха, түүдэг носоохо, модо отолһоной һүүлээр үлэһэн гэшүүһэ галдаха, хатанхай ой модо, һөөг бургааһа орхихо баһал хоригдоно.
Һууринуудта, дачануудта газартай хүнүүд тэрэнээ саг соогоо бог шоройһоо арилгажа, ногоо сабшаха уялгатай болоо. Энэ ажалнуудые хээгүй һаа, захиргаанай протокол абтаха юм.
Тиихэдэ 2018 онһоо хойшо хүүргын хажууда 50 метрһээ бага зайда, ой модон, холбоо бариһан һужаануудһаа 15 метрһээ бага зайда үбһэ, һолоомо обоолхо хоригдоно. Хүдөө ажахын газарнуудые буртаг үбһэнһөө арилгаагүй, үбһэ ногоо саг соогоо сабшаагүй һаа, захиргаанай хэрэг абтаха юм. түмэр харгыда, харгы замда ябахада унтараагүй тамхи, зуруул хаяха баһал хоригдоно.
Эдэ дүримүүдтэ хайша хэрэгээр хандабал эрхэтэд 2 мянганһаа 3 мянган түхэриг хүрэтэр, албанай түлөөлэгшэд 6 мянганһаа 15 мянган хүрэтэр, хуулита нюурнууд 150 мянганһаа 200 мянган түхэриг хүрэтэр ялада тохогдохо юм.
