Эдир драматургнуудые һурган хүмүүжүүлхэ Владимир Турненковай «Эдир драматург» гэһэн түсэл 15 жэлэй саана мүндэлһэншье һаа, Буряад драмын театрта анха түрүүшынхиеэ үнгэргэгдэнэ.
«Буряад хэлэ сахин хүгжөөлгэ» гэһэн уласай программын хэмжээндэ энэ түсэл түрүүшынхиеэ эмхидхэгдэнэ гэжэ тэмдэглэлтэй. Тиихэдэ Буряад драмын театрай үүсхэл Буряад Уласай болбосоролой болон эрдэм ухаанай яаман дэмжэһэн байна.
Найман үдэрэй туршада Буряад Уласай болон Үбэр Байгалай хизаарай 17 үхибүүд драматургиин нюусатай танилсажа, зүжэгүүдые бэшэжэ туршана. Мартын 28-30-най үдэрнүүдтэ эдир драматургнуудай багахан зүжэгүүдые Буряад драмын театрай найруулагшад - Саян Жамбалов, Виктор Жалсанов, Артем Баскаков, Сойжин Жамбалова болон зүжэгшэд тайзан дээрэ харуулха юм.
Мартын 31-дэ «Эдир драматург» лабораториин түгэсхэлэй шата мэдээжэ драматург болон сценарист Вячеслав Дурненков, Анастасия Букреевагай ударидалга доро үнгэргэгдэхэ юм. Энэ үдэшэ үдэрэй 15 сагта харагшад түрэл хэлэн дээрэ бэшэдэг эдир драматургнуудай бүтээлнүүдтэй танилсаха аргатай.