Үнгэрһэн долоон хоногто зургаан үдэрэй туршада Буряадай арад зон эхэнэрнүүдэй бокстой танилсаһан байна. Уласаймнай ниислэл Улаан-Үдэдэ үнгэргэгдэһэн Ородой чемпионадта үдэр бүри залаар дүүрэн хүн сугларжа, шанга тулалдаануудые хараба. Тус мүрысөөндэ Буряадай тамиршад хоёр алтан, хоёр мүнгэн медаль абажа, хүндэтэ харагшадаа баярлуулһан байна.
Энэ мүрысөөнэй эбээн тэдхэгшэдэй нэгэн - “Номто” гэһэн бүлгэмэй хүтэлбэрилэгшэ, Буряад Уласай Арадай Хуралай һунгамал Валерий Доржиев тон ехээр баярлажа байһанаа мэдүүлнэ.
- Манай ажаһуугшадта ёһотой боксын һайндэр болобо гээшэ. Юуб гэхэдэ, боксоор нэгэшье мүрысөөндэ иимэ олон хүнүүдые хараагүйб, - гэжэ Валерий Доржиев хэлэнэ.
Үнэхөөрөөшье, олон хүн зоной хабаадалгатайгаар, иимэ үндэр хэмжээндэ мүрысөөн болохо юм гэжэ Ородой боксын федерациин хүтэлбэрилэгшэд һанаагүй байһанаа абаһаар лэ мэдүүлнэ. Улаан-Үдэ зорюута ерэһэн Ородой боксын федерациин генеральна секретарь Умар Кремлев эмхидхэгшэдтэ баярые хүргөө.
- 2017 оной эсэстэ Буряад Уласта тус мүрысөө эмхидхэхэбди гэжэ тон зүб шиидхэбэри абаһан байнабди, - гэжэ Умар Кремлев хэлэнэ. - Буряад орон ерээд, олон тоото уулзалгануудые үнгэргөөб, боксын талмайнуудые ябажа харааб. Эндэхи ажаһуугшад буряад арадай наадануудта тон дуратай гэжэ намда хүнүүд хөөрэһэн байна. Минии һанахада, боксдо баһал нилээд олон зон дуратай.
Буряад Уласай Толгойлогшо Алексей Цыденов Москвагай айлшадые угтан абаа. Эндэ хэдэн шухала асуудалнууд хэлсэгдээ.
- Мүрысөөнэй эхиндэ өөрөөшье ойлгонгүй, “дэлхэйн чемпионат нээгдэбэ” гэжэ хэлэжэрхиһэн байнаб. Харин үндэр хэмжээндэ мүрысөө эмхидхэһэнһээмнай боложо, үнэхөөрөө дэлхэйн чемпионат Буряадта үнгэргэе гэжэ Умар Назарович Кремлев дурадхаа. Тиимэһээ 2021 оной бүхэдэлхэйн мүрысөөн Улаан-Үдэдэ боложо магадгүй, - гэжэ Алексей Цыденов хэлэнэ.
Олимпиин наадануудта хараатай
Ородой боксын федерациин генеральна секретариин хэлэһээр, Буряад орон мүнөөшье ехэ мүрысөө угтан абахаар бэлэн. Энэ ушарһаа уламжалан, 2020 ондо болохо Олимпиин наадануудта бэлэдхэлэй хэмжээ ябуулгануудые баһал манай уласта үнгэргэхөөр хаража үзэхөө мэдүүлээ.
- Токио хототой Буряад орон нэгэ сагай хэмжээндэ байна. Мүн тиихэдэ байгаалиин байдал нэгэ адлишуу. Танай эндэ һорилго хээд ошобол, тамиршан һайн дүн харуулха гэжэ һанагдана. Тиимэһээ Байгал далайн эрье дээрэ һорилгын бааза бариха тухай хэлсээбди, - гэжэ Умар Кремлев хөөрэнэ.
Бүхы дээрээ мүрысөөндэ 43 можо, хизаарай 153 тамиршан хабаадаһан байна. Тэдэ 10 шэгнүүртэ шаасалдажа, алтан медальнуудта хүртэхын түлөө шамдаба.
Ородой суглуулагдамал командын ахамад һоригшо Александр Черноивановай хэлэһээр, тус мүрысөөн ехэ удха шанартай байгаа.
- 2018 ондо Европын чемпионат Польшодо, харин дэлхэйн чемпионат Энэдхэгтэ болохо юм. Эдэ мүрысөөнүүдтэ хабаадаха тамиршадые Улаан-Үдэдэ шэлэн абаһан байнабди. Түрүүшын һорилгын хэмжээ ябуулгада 40 тамиршан уригдаха. Эдэмнай шангай һуури эзэлһэн боксёр басагад болоно гээшэ, - гэжэ Александр Черноиванов хөөрэнэ. - 2020 ондо үнгэргэгдэхэ Олимпиин нааданууд дүтэлжэл байна. Тиимэһээ мүнөө жэлэй ехэ мүрысөөнүүдтэ Ородой ямар тамиршад Олимпиадада хабаадаха аргатайб гэжэ хаража эхилхэбди.
Эхэнэрнүүдэй бокс Олимпиин наадануудай программада 2012 ондо оруулагдаһан байна, гурбан шэгнүүртэ тамиршад мүрысэнэ. Ородой тамиршад Олимпиадануудта гурбан медаль абажа шаданхай. Лондондо Софья Очигава болон Надежда Торлопова мүнгэн медальнуудта хүртөө һэн. Мүн Рио-де-Жанейро хотодо Анастасия Белякова хүрэл медаль абаа.
Рингын эзэд хэд бэ?
Өөрын ринг дээрэ Буряадай тамиршад дүрбэн медальда хүртэһэн байна. Тэдээн сооһоо Дарима Сандакова болон Кристина Ткачева гэгшэд чемпионой нэрэ зэргэдэ хүртэбэ.
75 килограмм хүрэтэр шэгнүүртэ Мухар-Шэбэрһээ уг гарбалтай Дарима Сандакова 2016 болон 2017 онуудай Ородой чемпионадуудта хоёрдохи һуури эзэлээ һэн. Мүнөө жэлэй мүрысөөндэ тэрэ заал һаа түрүүлхэ гэһэн зорилго урдаа табиһан байна. Энэ һанал бодолыень Севастополь хотын Елена Гапешина һалгааха һанаатайгаар финалда гараа. Энэ ана-мана тэмсээнэй удаа Дарима Сандакова түрүү һуури эзэлээ гэжэ тодороо.
Дарима Сандакова
Шэнэ чемпионой хэлэһээр, түрэл Улаан-Үдэдөө шаалдахада хүнгэн байха гэжэ һанажа ябаа.
- Гансал ринг дээрэ гарахадаш, шүүгдэхэ ёһогүйш гэһэн бодол түрэнэ. Юуб гэхэдэ, шамайе ганса харагшад харана бэшэ, мүн түрэлхидшни, нүхэдшни ерэнхэй байна ха юм. Тэдэниие баярлуулха гэжэ оролдонош. Энээнһээ боложо, олон алдуу хэһэн байнаб. Хэды тиигэбэшье, олон тоото харагшадые баясуулһандаа баяртайб, - гэжэ Дарима Сандакова финалай һүүлдэ һанамжаараа хубаалдаа.
81 килограммһаа үлүү шэгнүүртэ Кристина Ткачева финальна уулзалгада Краснодарай хизаарай Анна Ивановатай уулзаа. Түрүүшын раундые айлшан шадамараар үнгэргөө. Кристинын һоригшо Бадма Бадмаев энэ үедэ шабидаа зүб заабаринуудые үгэжэ шадаа. Саашадаа Бэшүүр аймагһаа уг гарбалтай тамиршан шанга шангаар шаажа, илалта туйлажа гараба.
Кристина Ткачева
57 килограмм хүрэтэр шэгнүүртэ Зэдэһээ уг гарбалтай Людмила Воронцова финалда орожо шадаа. Гэбэшье Европын чемпион, дэлхэйн чемпионадай хүрэл медаль абаһан Дарья Абрамоватай уулзалгань болобогүй. Шалтагаан гэхэдэ, хахад финалай шатада Людмила нэгэ бага гэмэлтээд ябаа. Тиимэһээ һоригшод болон мүрысөөнэй эмшэд финал болохогүй гэжэ шиидхэбэри абаа юм.
Людмила Воронцова
60 килограмм хүрэтэр шэгнүүртэ Наталья Шадрина мүрысөөнэй эгээл суутай тамиршантай финалда уулзаа. Олимпиин наадануудай хүрэл медаль абаһан Анастасия Беляковатай Буряадай тамиршан Ородой чемпионадуудай финалнуудта хэдэн дахин уулзаһан намтартай. Энэшье удаа Челябинск хотын түлөөлэгшэ илажа гараа.
Наталья Щадрина
- Мүнөөдэр илалта туйлааб гэжэ һананаб. Харин шүүгшэд ондоо һанамжатай байгаа. Ходо энэ басагантай уулзахадамни, шүүгшэд намайе дарана, - гэжэ уур сухалтай Наталья Шадрина хэлэжэрхёод, саашаа ябашана.
Анастасия Беляковагай хэлэһээр, тэрэ урдаа табиһан зорилгонуудаа хүсэд дүүргэжэ шадаагүй.
- Түрүү һуури эзэлбэшье, бүхы зорилгонуудтаа хүрөөгүйб. Мүрысөөнэй үедэ оло дахин алдуу гаргааб. Бүхы уулзалгануудаа шэнээр хаража шүүмжэлээд, тэдэнээ усадхахаб. Урдамни харюусалгатай мүрысөөнүүд болохоо байна. Тиимэһээ тэндэ иимэ алдуунуудые гаргабал, алтан медаль тухай мартаха хэрэгтэй, - гэжэ Анастасия Белякова хэлэнэ.
Олимпиин наадануудта хабаадаһан Ярослава Якушина табадахи жэлээ удаа дараалан чемпионой нэрэ зэргэдэ хүртөө. Финалда тэрэ залуу Наталья Сычуговатай уулзаһан байна. Хоёрдохи раундын үедэ Наталиин хамарһаа шуһан гоожожо, уулзалгын түгэсэтэр болибогүй. Тиигэжэ Ярослава илажа гараа.
- Ородой боксёрнуудай түрүү тамиршадта ехэ харюусалгатай мүрысөөн болоо. Юуб гэхэдэ, урдаа хараха тамиршаднай яагаад шаалданаб гэжэ ганса һоригшод хараа бэшэ, мүн ургажа ябаа залуу хүбүүд, басагад шэртэн һуугаа. Бишье баһа бүри һайнаар, бүхы шадал соогоо шаалдахаа оролдооб. Тиимэһээ һайн бэлэдхэл энэ мүрысөөндэ хэһэн байнаб. Олон һайн боксёр басагад ургажа ябана гэжэ чемпионат харуулаа, - гэжэ Ярослава Якушина хөөрэнэ.
Буряадһаа уг гарбалтай Екатерина Пинигина юундэб даа жэл болоод лэ, можо нютагаа һэлгэжэл байдаг. Энэ удаа тэрэ Мордови Уласай түлөө шаалдаа. Хэды тиигэбэшье, тэрэ Ородой түрүү тамиршадай тоодо оролсоно. Финалда тэрэ Екатерина Пальцевада шүүгдэжэ, хоёрдохи һуури эзэлээ.
Зал соо сугларһан харагшад Хакаси Уласай түлөөлэгшэ Саяна Сагатаевагай түлөө һанаагаа зобоһон байна. Теэд Саяна финалда Виктория Кулешовада шүүгдэбэ.
Бусад алтан медальнуудта Светлана Солуянова, Екатерина Дынник, Мария Урокава гэгшэд хүртөө.
Командна тоосоондо Московско можын түлөөлэгшэд түрүүлээ. Тэндэхи тамиршад табан алтан болон гурбан хүрэл медальнуудые абажа шадаа. Буряадай суглуулагдамал команда хоёрдохи һуурида гараа.
Борис Балдановай гэрэл зурагууд