УРАН ЗУРААШЫН ХАРАСА: САГАЙ ХҮЛГӨӨН СОО

Цыренжап Сампиловай нэрэмжэтэ уран һайханай музейдэ Юрий Чирковай 90 жэлэй ойн баяртань зорюулагдаһан “Саг. Дүрэ зурагууд. Хуби заяан” гэжэ нэрэтэй хубиинь үзэсхэлэн нээгдээ.

Буряадай АССР-ай арадай уран зурааша, соёлой габьяата хүдэлмэрилэгшэ Юрий Чирков 1928 ондо Улаан-Үдэдэ юрын ажалша гэр бүлэдэ түрэһэн юм. Һургуулида һуража ябахадаа тэрэ зураха дуратай һэн. Байгаалиин табисуураар үгтэһэн бэлигээ хүгжөөхэёэ Эрхүү хотын урлалай тусхай дунда һургуули 1952 ондо түгэсхөөд, тоонто нютагаа бусажа, зохёохы замаа эхилһэн намтартай.

“Саг. Дүрэ зурагууд. Хуби заяан” (Время. Портреты. Судьбы) гэһэн үзэсхэлэндэ Буряад ороной байгаали, ажалша бэрхэ хонишодые, мүн Буряадай мэдээжэ зониие зураглаһан бүтээлнүүдынь дэлгэгдээ. Нэрлэбэл, эрхим һайнаар Будамшуугай роль гүйсэдхэһэн Михаил Елбоновай, арадай зүжэгшэн Нина Токуреновагай залуу наһанайнь, уран дархашуулай бүлгэмэй дүрэнүүд болон ажалша малша, адууша хонишо түрүү зоной дүрэнүүд дэлгэгдэжэ, олоной һонирхол татана.

Тус үзэсхэлэнэй нээлгэдэ уран зураашын түрэлхидынь, Буряад Уласай багшанарай дунда мэргэжэлэй һургуулиин оюутад болон мэдээжэ уран зураашад ерэжэ, уран һайхан үзэсхэлэнтэйнь танилсаа. Энэ үзэсхэлэн апрелиин 15 болотор Цыренжап Сампиловай нэрэмжэтэ музейдэ дэлгэгдэхэ.