791
Байгалай эрьедэ загаһа барилгаар мүрысөөн Байгал шадарай аймагай Түрхэ һууринай «Байкальская гавань» гэһэн эдэй засагай онсо газарай талмайда мартын 30-31-нэй үдэрнүүдтэ үнгэргэгдэхэ юм. Тус мүрысөө Буряад Уласай Толгойлогшо Алексей Цыденов дэмжэжэ хабаадаха юм.
2018 оной хэмжээ ябуулгада Ородой Холбоото Уласай загаһа барилгын талаар агентствын хүтэлбэрилэгшэ Илья Шестаков, ВТБ банкын ахалагша вице-президент Руслан Еременко, «Особенности национальной рыбалки» гэһэн кинодо гол рольнуудай нэгые гүйсэдхэһэн, мэдээжэ зүжэгшэн Виктор Бычков гэгшэд хабаадаха. Тиихэдэ загаһа барилгаар мүрысөөндэ Ородой Холбоото Уласай можо нютагуудай, Хитад, Монгол болон Евросоюзай гүрэнүүдэй 900-гаад түлөөлэгшэд, 220 команданууд хабаадаха тухай мэдүүлгэ орууланхай.
Мартын 30-да, үдэрэй 12 сагһаа хабаадагшад бүридхэлдэ оруулагдажа, 15 сагһаа мүрысөөнэй шүүгшэдэй суглаан үнгэргэгдэжэ, хэн, хаана загаһа барихаб гэжэ элирхэйлэгдэхэ. Удаань 16 сагта мүрысөөнэй нээлгын баяр ёһолол үнгэргэгдэхэ гэжэ түсэблэгдэнхэй. Мартын 31-дэ мүльһэн дороһоо загаһа барилгаар мүрысөөн үглөөнэй 8 сагһаа эхилхэ, 16 сагта дүнгүүд согсологдохо. Загаһа бариха мүрысөөндэ түрүү һуури эзэлһэн командада кубок, баярай бэшэг, медальнууд болон гол шан - «Рено-каптюр» автомашина барюулагдаха юм.
Анна Огороднигой гэрэл зураг
