720
Буряад Уласай Толгойлогшо Алексей Цыденов Үдэ, Сэлэнгэ голнуудай эрье зубшаһан газар болбосон түхэлтэй болгохо талаар түсэлэй мүрысөөндэ илагшадые үнгэрһэн гарагай долоондо амаршалба. Энэ хэмжээ ябуулгада Улааан-Үдын захиргаанай түлөөлэгшэд, архитекторнууд, олониитын түлөөлэгшэд болон волонтёрнууд хабаадалсаа. Эрхим түсэл элирүүлгэдэ Улаан-Үдын 39 мянганһаа дээшэ ажаһуугшад дуугаа үгэһэн байна. Үдэ, Сэлэнгэ голнуудай эрье зубшаһан газар болбосон түхэлтэй болгохо талаар түсэл 2018 ондо бэелүүлэгдэжэ эхилхэ юм.
- Улаан-Үдэдэ Үдэ, Сэлэнгэ голнуудай эрье зубшаһан газар хэрэгтэй гэжэ мүрысөөн элирүүлээ. Ажаһуугшад эдэбхитэйгээр хабаадаажа, ехэтэ һонирхоһон байна, - гэжэ Буряад Уласай Толгойлогшо Алексей Цыденов амаршалгын үедэ хэлэһэн байна.
Үдэ, Сэлэнгэ голнуудай эрье зубшаһан газар болбосон түхэлтэй болгохо талаар мүрысөөн байгша оной январиин 15-да соносхогдоо гэжэ һануулнабди. Энэ мүрысөөндэ Буряадай, тиихэдэ Москва, Киров, Новосибирск, Томск хотонуудай түсэлэй болон архитектурын 22 эмхинүүдэй түлөөлэгшэд хабаадаһан байна. Түрүүшын һуури хизаарламал харюусалгатай «Творческая мастерская Улан-Удэархпроект» бүлгэм эзэлжэ, нэгэ сая түхэригэй шанда хүртэһэн байна. Тэдэнэй бэлдэһэн «Реки объединяют историю и культуру» гэһэн дизайн-түсэлэй түлөө хотын ажаһуугшадай 49 хубинь дуугаа үгөө. Хоёрдохи һуури Новосибирск хотын Сергей Бадархановай «Красные ворота к морю» гэһэн түсэл эзэлээ. Энэ түсэлэй түлөө ажаһуугшадай 35 хубинь һунгаһан байна. Автор 300 мянган түхэригэй шанда хүртэбэ. Хизаарламал харюусалгатай «Архитектурная студия» бүлгэм «Берега жизни» гэһэн түсэл бэлдэжэ, гурбадахи һуури эзэлээ. Энэ түсэлэй түлөө ажаһуугшадай 16 хубинь дуугаа үгэһэн байна. Тэдэнэр 100 мянган түхэригэй шанда хүртөө. Мүрысөөнэй шангай жаса бүхыдөө 1,4 сая түхэриг болоһон байна.
Буряад Уласай Толгойлогшо Алексей Цыденовэй тэмдэглэһээр, Үдэ, Сэлэнгэ голнуудай эрье зубшаһан газар болбосон түхэлтэй болгохо талаар түсэл 2018 ондо бэелүүлэгдэжэ эхилхэ: «Эндэ ажал шата шатаар хэгдэхэ. Голой эрье зубшаһан эрье болбосон түхэлтэй болгохо талаар гүрэнэй-хубиин талаһаа ажал суг ябуулагдаха. Мүрысөөндэ илаһан түсэлэй ёһоор, эндэ эдеэ хоол бариха кафе, ресторанууд байха. Тиимэһээ олзын хэрэг эрхилэгшэдые хабаадалсахыень һонирхуулхабди. Олониитын газар болбосон түхэлтэй болгохо хэрэгтэй уласай бюджетһээ мүнгэн һомологдохо». Тиихэдэ түсэл бэелүүлгэдэ федеральна засаг зургаан туһаламжа үзүүлхэ гэжэ Алексей Цыденов хэлэбэ.
- Богони болзорто түсэл бэелүүлэгдэхэ гэжэ найданаб. 2023 ондо Буряад Уласай байгуулагдаһаар 100 жэлэй ой тэмдэглэхэ тухай даабари Ородой Холбоото Уласай Юрэнхылэгшэ Владимир Путин даалгабари үгэһэн байна. Тиимэһээ тус хэмжээ ябуулга эмхидхэлгэдэ, голой эрье зубшаһан газар болбосон түхэлтэй болгохо талаар мүнгэ һомололго оруулха түсэбтэйбди, - гэжэ уласай хүтэлбэрилэгшэ хэлэбэ.
Буряад Уласай Засагай газарай хэблэлэй албанай гэрэл зураг
