Ангелина Ивановна, Галина Аркадьевна басаганиинь, Аркадий Антонович Алганаев нүхэрынь
Дашарабдан Батажабайн «Адуушанай дуун» туужаар найруулагдаһан киногой 1956 ондо буулгагдаhаар 62 жэлэй үнгэрбэшье, огсом солгёон аялгань эршэ дэлисэеэ мүнөөшье hуладуулаагүйл.
Үльгэртэл һайхан үе саг
Интернедэй дэлгэрhэн оршон сагта тус киное хараха гэhэн хүн бүхэн гэрhээн гарангүй, энэ хүсэлөө бэлэхэнээр лэ хүсэлдүүлхэ аргатай. Мүнөө хаража байхада, үнэхөөрөөл hайхан удхатай үльгэртэл үзэгдэнэ. Совет засагай үедэ эды шэнээн hайхан эрхэ байдалда ажаhууhанаа хүсэд ойлгодогшьегүй байhан байналди даа.
Тэрэл 1956 ондо мантан СССР орондо буулгагдаhан алдар суута фильмүүдэй дунда «Мосфильм» студида режиссёр Андрей Фроловой табиhан «Адуушанай дуун» - түрүүшын буряад-монгол фильмүүдэй нэгэн мүн.
Үнгэрэгшэ намар, «Буряад үнэн» сониной 2017 оной ноябриин 22-ой дугаарта «Адуушанай дуун» үргэн ехэ Совет ороной уудамаар зэдэлээ һэн» (https://burunen.ru/site/ news?id=20415) гэhэн минии статья толилогдожо, уншагшадта яhала hайшаагдаа hэн. Тэрэ тоодо Буряадай Гүрэнэй университедэй Хэлэ бэшэгэй болон олондо мэдээсэлгын факультедэй дэргэдэ хүдэлдэг буряад хэлэнэй дугыланай гэшүүд тэдэнэй багша, лингафонно кабинедые даагша Соёлма Цыбандоржиевна Ломпоевагай ударидалгаар энэ бэшэлгэ ехэтэ hонирхожо уншаhан, хэшээл дээрээ тэрэниие хэhэг хэhэгээр шудалжа гараhан байна. Тиихэдээ шабинарай нэгэн - Ангелина Ивановна Алганаева тухай энэ бэшэлгэ соо хэлэгдэhэн байшоо. Нэрэнь Геля – зүбөөр аад, харин үхин ябахынь фамили Афанасьева гэхын орондо Сафронова гээд буруу бэшэгдэшэhэн байна.
Юундэб гэхэдэ, почто зөөдэг эдир адуушан Доржо боложо наадаһан, мүнөө Сэлэнгынгээ аймагай түрэл Тохой нютагтаа һууһаар байдаг Александр Чимитович Дамбиев (1956 ондо 14-тэй Саша Дамбиев) 60 гаран жэлэй үнгэрһэн хойно Гелиин фамили мартаһан ушарһаа Афанасьева гэхын орондо Сафронова гэжэ эндүүрэн һагад хэлэһэн байна. Ангелина Ивановнагай дүү, Наталья Ивановна, тус бэшэлгэ уншахадаа, сохом “манай Геля” тухай хэлэгдэнэ гэжэ абаһаар ойлгоо. Тиимэһээ тэрэ “Буряад үнэнэй” редакциһаа минии телефон һурагшалаад: “Би Гелиин дүүнь бэ. Харин фамилинь Сафронова бэшэ, Афанасьева байһан, мүнөө Алганаева юм”, - гэжэ тододхобо. Яахаб теэд, хүлисэл гуйгаад, “Геля олдоо, харин Сафронова бэшэ, Афанасьева-Алганаева” гэһэн удхатай заһабари-мэдээсэл сониндоо дары гаргаа һэмби.
Геля кинодо буулгагдахын урда тээ, 1956 оной хабар
Удаань БГУ-гай буряад хэлэнэй дугыланда Соёлма Цыбандоржиевна багшынь урилгаар ошожо, Ангелина Ивановнатай, бусад гэшүүдтэйнь танилсажа, һонирхолтой хөөрэлдөө ябуулаа һэмди.
Һануулаадхия, Гелиин хабаадаһан киногой тэрэ хэһэгые. Фильмын гол герой, колхозой адуушан Түмэн Жаргалов (Владимир Манкетов) Малаадай гэжэ нэрэтэй унагаханиие һүрэг сооһоо шэлээд, холын хотодо һуража байгаа дуратай басаган Сэсэгтээ бусахадань бэлэглэхэ гэжэ шиидэһэн байна. Теэд инаг басагандань баһал һанаархадаг адуушан Шагта (Буянта Аюшин) һүниин аадарай үедэ шононуудай добтолоод, мэгдээн, һагдаан болошоходо, һамбаашалаад, унагыень хорёо сооһоо газаашань зорюута табижархина. Тиин Сэсэгээ угтахын орондо унагаяа бэдэржэ ябатарнь, Малаадайнь түмэр харгын далан дээрэхи рельсын хоорондуур орошоод, һанаа амар шогшон үзэгдэбэ. Харин араһаань уруудам уруу поезд шууд дүтэлжэ ябана. Түмэн огтошье маргангүй, морёо гүйдэлдэнь шууд табяад, поездые ахиһан бэеэрээ унагаханаа түмэр харгыһаа зайлуулжа үрдибэ. Энэл поездоор нютагаа бусажа ябаһан Сэсэгынь (Дилорам Джурабаева) вагоной сонхоор Түмэнэйнгээ поездые ахин оодоргожо ябаһыень обёоржорхёод, ухаа алдаад, ябадал дундань поездһоо дэбхэржэ буушаба.
Буряад басаганай дабташагүй һайхан дүрэ, маяг
Үнэн дээрээ Д. Джурабаева бэшэ, харин Улаан-Үдын 1-дэхи дунда һургуулиин 10-дахи класста гараад ябаһан Геля Афанасьева поездһоо һүрэжэ бууһан байгаа. Тиимэһээ тэрэмнай буряад эхэнэрнүүдэй дунда буряадай түрүүшын дублёр гү, али каскадёршье гэбэл, алдуу болохогүй. Яагаад та шэлэгдээ юмта гэжэ асуухадамни: “Режиссёрой туһалагша эхэнэр 1-дэхи дунда һургуулида гимнастикын секци бии гэжэ дуулаад, һурагшалһаар Каландаришвилиин гудамжадахи манай модон гэртэ ерэбэ ха юм. Тэрэ үеэр би 2-дохи разрядаар мүрысөөнүүдтэ хабаададаг һэм. Кинодо буулгуулха дуратай гүш гэжэ тэрэ эхэнэрэй асуухадань, дуратайгаа мэдүүлээ һаабзаб даа. Аба, эжымнишье арсаагүй. Харин юу хэхэ, яахаяа би огтошье мэдээгүйб, энээн тушаа тодорхойгоор хүн намда ойлгуулаашье бэшэ”, - гэжэ Ангелина Ивановна дурсана.
Кино буулгадаг бүлэг тэрэ үедэ Сэлэнгын аймагай Харганаа һууринай Бүхэн (Убукун) станцида вагон соо байрлаһан юм. Киногой хэһэгүүд Харганаагай баруун тээхи Алтан хүтэл дээрэ, Харганаагай зүүн тээхи Доодо Бүхэн һуурин шадар буулгагдаа юм. Владимир Манкетовэй (Түмэн) орондо Сэлэнгын Сталин колхозой 19-тэй адуушан Юрий Жамсуев морёор гүйлгэһэн байна. Тиин Түмэнэй инаг Сэсэгтээ бэлэглэхэ гэһэн Малаадайе абархаяа Юрий Жамсуев түрүүшын кадрнуудта Абрам нуурай урдахи Алтан хүтэл дээгүүр поездые хүсэхэ гэжэ оодоргоно. Удаадахи кадртань тэрэ зүүлжээ 10 километрэй саанахи газарта хүрэшоод, одоол поездые ахяад, урдань оодоргоно. Мүн лэ энэ шадар Геля Афанасьева поездһоо һүрэнэ. “Айгаа һэн гүб? – гэжэ Ангелина Ивановна дабтажа асууна. - Үгэйл хаш даа. Аюултай гү, бэшэ гү гэжэ толгой соогоо бодожошье үрдеэгүй ха юмбиб, - гэжэ өөрөө харюусана. - Эмхидхэлынь ехэ муу байгаа һэн. Яагаад дэбхэрхые хүн намда огтошье ойлгуулаа бэшэ. Һүрэ гээд лэ дүүрээ. Араһаамни түлхихэһоо нааша гэхээр. Түрүүшынхеэ һүрэхэдэмни, операторнууд буулгажа хүсэд үрдеэгүй. Хоёрдохёо баһа юун болоо һэм гэжэ хүсэд һананашьегүйб, хии һүрэлгэ болошоо. Гурбадахяа тамбурай подножкые доошонь буулгаад үгэхэдэнь, нэгэ бага бэлэншэг боложо үгөө. Би харгын далан руу урбалдан шахуу һолжороод, хүл дээрээ бодоодхибоб. Дэрһэн соо орондоглошоод хэбтэһэн Түмэн тээшэ гүйдэлөөрөө шуумайн гэһээм, улаан толботойхон Сэсэгэй сагаан плати һалхинда хөөрэн гэхэдээ, толгойемни орёожо байгаа һэн. Араһаа харахада, Джурабаеваһаа ямаршье илгаагүй гэхээр. Ута хара гэзэгэнүүднайшье адлихан. Эдэ гэзэгэнүүдээрни намайе кинодо шэлээ һэн ха. Үндэр набтарнай, бэеымнай хэлбэришье тэнсүү”.
Узбек яһанай Дилорам Джурабаевагай хэды һайхан байбашье, сэлмэг сарюун шарайтай, жүрэгэр тэгшэ бэетэй, нахис хотос гэшхэлһэн буряад басаган Геля Афанасьева Дунда Азиин сэбэр басаганһаа юугээршье дутаагүйл даа!
- Энэ дублиин хангалтатай байһаниинь болоо, - гэжэ Ангелина Ивановна жара гаран жэлэй саана бэшэ, харин мэнэ һаяхан болоһон ушар тухай мэтээр хэлэнэ. – Дахин һүрэ гэбэлнь, зүрхэлхэгүй байгааб. Гар, хүл, бэемни шуһа лэбшэһэн зурлаануудаар хээлэгдэнхэй, шулгаранхай. Халуундань үбшэнтэйень ойлгоошьегүйб. Харин гэртээ харяад, эжыдээ яһала аргалуулаа һэмби. Хуушан мүнгөөр зуун түхэриг гонорар түлөө. Тэрэ үеэр дан голохоор бэшэ мүнгэн һэн ха.
Намтарһаань
Ангелина Ивановна 1940 ондо Эрхүү можын Эхирэд-Булгадай аймагай Хара-Азарга һууринда түрэһэн юм. Иван Степанович эсэгынь Эрхүүгэй университедтэ һуража байтарнь, дайн эхилээд, фронтдо эльгээгдэбэ. Тэрэ үеэр бүлэнь Улаан-Үдэдэ ажаһуудаг һэн ха. 1943 ондо эсэгэнь шархатаад, гэртээ табигдаба. Иван Степанович ойро зуура оперо, баледэй театрай хатарша солистааршье туршаад үзоо. Буряадай багшанарай училищидэ физкультурын багшаар, завучаар ажаллаһан юм. Галина Степановна нүхэрынь статуправленидэ, шэлэй заводто, Горпромторгдо экономистаар ажаллаһан байна. Удаа удаагаар Маргарита, Наталья, Татьяна басагад һубарилдаба.
Һургуулиин һүүлээр 1957 ондо Геля Афанасьева Москвагай Г.В. Плехановай нэрэмжэтэ Арадай ажахын институдта ороод, «Ниитын эдеэ хоолой технологи» гэһэн мэргэжэлээр 1962 ондо дүүргэһэн байна. Ниислэл хотодо үлэхэ аргатай байбашье, Улаан-Үдэеэ бусажа ерэбэ. Дивизионно станциин Военторгдо столовын технологоор, директорээр ажаллаба. 1970-аад онуудта Железнодорожно районой Столовонуудай 2-дохи трестын директорээр хүдэлжэ байха үедөө Ангелина Ивановна “Дружба” кафе үндэһэн буряад эдеэ хоол бэлдэдэг шэглэлтэй болгохо талаар ехэ оролдолго гаргаһан байна. Гомбо Цыдынжапов, Екатерина Бадуева гэгшэдэй “Буряад эдеэ хоол” гэжэ суутай номдо бууза, хуушуур, орёомог, эреэлжэ гэхэ мэтын үндэһэн эдеэ хоолой бүридүүлхы хубинуудые грамм граммаар тооложо гаргаһан хүниинь эдеэ хоолой дээдэ гарай мэргэжэлтэн Ангелина Ивановна мүн болоно.
Москвада һуража байха үедөө Ангелина Ивановна ород хүндэ хадамда гараад, Сергей гэжэ хүбүүнтэй болоо һэн. Мүнөө хүбүүниинь өөрөө хоёр хүүгэдтэй, Москвада ажаһуудаг. Хоёрдохёо Ангелина Ивановна Алайрһаа гарбалтай технологическа институдай багша Аркадий Антонович Алганаевта хадамда гараад, Галина басагантай болоо һэн. Галина Аркадьевна мүнөө Шэтэдэ юристаар хүдэлдэг, мүн гурбан хүүгэдтэй.
1980-яад-1990-ээд онуудта А.И. Алганаева худалдаа наймаанай 12- дохи СПТУ-гай директорэй орлогшоор, пенсиин урда тээ “Бурятия” ресторанай үйлэдбэриие даагшаар 5 жэл соо хүдэлөө. 1982 ондо “Совет худалдаа наймаанай отличник”, 1984 ондо “Ажалай ветеран” хүндэтэ зэргэнүүдтэ хүртэһэн байна. Ажаллажа байха үедөө ниитын ажалда эдэбхитэйгээр хабаададаг, коммунис намын гэшүүнэй уялгаар парторгоор хэдэн удаа һунгагдаһан юм. Совет засаг ажалша арадай тала харадаг энэрхы удха шэглэлтэй, харин мүнөө сагай капиталис байгуулалтын журам олон түмэндэ харша гэжэ Ангелина Ивановна шиидэмгэйгээр тоолодог. Габьяата амаралтада гараад байхадаашье, тэрэ гараа һула табижархёод һуудаггүй, Буряадай Пенсионно жасын хоорто дуулалсадаг. “Динамо” бүлгэмэй тамирай танхим соо алдарта һоригшо Валерий Сыдеевэй ударидадаг элүүржүүлгын бүлэгтэ хэдэн жэлэй урда тээ дуратайгаар ябалсаа һэн. Тэрэ үедэнь журналист Владимир Буяхаев “Информ Полис” сониндо А.И. Алганаева тухай “Прыжок длиною в жизнь” гэһэн гаршагтайгаар бэшэхэдээ, “Адуушанай дуун” кино буулгахада, Гелиин дублёр боложо, поездһоо һүрэһыень бэшэлгынгээ гол болгожо дурдаһан байгаа.
БГУ-гай дэргэдэ һайн дуранай гуримаар хүдэлдэг буряад хэлэнэй дугылан, тэрэнэй ударидагша багша, Яруунаһаа гарбалтай Соёлма Цыбандоржиевна Ломпоева тухай тусгаар хэлэлтэй. Дугыланда ябагша пенсионернүүд Ангелина Ивановна гэжэ нүхэр тухайнь “Буряад үнэн” сониндо толилогдоод байхадань, ехэтэ даган баясаһан, өөһэд дундаа нүхэрөө туха соонь хүндэлһэн, тэмдэглэһэн, хүхилдэһэн байна.
Апрелиин 13-ай 16 сагта Ородой Пенсионно жасын Буряадай таhагта (Коммунистическая, 45а, «Бурятия» зошод буудалай арада) «Адуушанай дуун» кинодо (1956 он) буулгагдаhан хүнүүдтэй, буулгагдагшадай түрэл удамуудтай уулзалга болохонь гэжэ сониндоо соносхоо һэмди. Александр Дамбиев (почтальон Доржо), МВД-гэй полковник Ким Зодоев гэгшэдтэй зэргэлээд, Ангелина Ивановна Алганаева-Афанасьева үнэн бэеэрээ һуухал гээшэ. “Морилжо хайрлыт!” - гэжэ уншагшадаа уулзалгада уринабди.
Гэр бүлын альбомһоо
Николай БАДМАРИНЧИНОВ