Улаан-Үдэ хотын “Хяагта” гэжэ арадай аман зохёолой бүлгэм Казань хотодо үнгэрһэн “На крыльях таланта” гэһэн уласхоорондын мүрысөөндэ түрүүлжэ, нютагаа бусаба.
Мартын 22-һоо 25 болотор Казань хотодо олон түмэн хабаадагшад хатар, аялга дуун, хубсаһанай харалган, уран һайхан үгэ болон бусад шэглэлнүүдээр бэлигээ туршаһан байна. Эндэ арадай аман зохёолой бүлгэмүүдһээ гадна театрай бүлгэмүүд, радио болон телевидениин хүдэлмэрилэгшэд, оюутад, һурагшад эдэбхитэй хабаадаа. Москва болон Санкт-Петербургһаа нэрэ солотой соёлшод ерэжэ, энэ һайхан мүрысөөнэй хабаадагшадые сэгнээ юм.
- Мүрысөөнэй түрүүшын шата Улаан-Үдэ хотодомнай үнгэрһэн юм. Тиин манай бүлгэм өөрын шэглэлээр түрүү һуури эзэлжэ, Казань ошохо эрхэдэ хүртөөбди, - гэжэ “Хяагта” бүлгэмэй хүтэлбэрилэгшэ, Буряад Уласай соёлой габьяата хүдэлмэрилэгшэ Гэрэлма Дашипылова баяраараа хубаалдана. - Бүлгэмһөөмнай юһэн хүн хабаадаа. Тэндэ буумсаарнай, ехэ дулааханаар угтажа, гоё һайхан зошод буудалда байрлуулаа. Мүрысөөн үндэр хэмжээндэ үнгэрөө. Бидэ буряад арадайнгаа дуунуудые дуулаабди. Тиигэжэ 10 бүлгэмэй дунда түрүү һуури эзэлээб- ди. Жюриин гэшүүд бидэнэй бэлиг үндэрөөр сэгнэжэ, магтаа бэлэй. Гадна һониншье, туһатайшье мастер-классууд үнгэрөө.
«Хяагта» бүлгэмэй зохёохы ажалай намтар
2012 ондо Хяагта аймагһаа гарбалтай улаан-үдөөрхин түрэл һайхан нютагайнгаа арадай аман зохёол хүгжөөхэ зорилготойгоор “Хяагта” гэжэ бүлгэм байгуулһан юм. Харин 2014 онһоо Улаан-Үдэ хотын “Рассвет” гэһэн соёлой байшанай дэргэдэ ажалаа ябуулдаг болоо. Тиигэжэ буряад арадайнгаа ёһо заншал, урданайнгаа дуунуудые һэргээжэ, дэлгэрүүлжэ, арадай аман зохёолой баян уута уудалан, дээжыень хүн зондоо дамжуулдаг юм.
Эгээл түрүүшын хабаадагшад – Хяагта аймагай Энхэ-Тала нютагай Александр Рампилов, Мөөрөөшын Борис Цыбиктаров. Бүлгэм буряад һайхан дуунуудаа зэдэлүүлэн, зоной шэхэ нилээд хужарлуулна. Уласай, уласхоорондын, можонууд хоорондын олон тоото хэмжээ ябуулгануудта эдэбхитэй хабаадажа, амжалтануудые туйладаг. Жэшээнь, “Зимняя соната” гэжэ уласхоорондын мүрысөөнэй, “Лучшие из лучших” гэһэн уласхоорондын урилдаанай, мүн Сочи хотодо үнгэргэгдэһэн уласхоорондын урилдаанай нэгэдэхи шатын лауреат болоһон байна. Холо ойроор ходо ябаашье һаа, тоонто нютагаа мартангүй, нютагаархидтаа тоглолто харуулжа, шэхыень хужарлуулжа, нюдыень баясуулдаг юм.
- Бүлгэмыемнай дэмжэжэ, үргэжэ байдаг «Рассвет» соёлой байшанай захирал Анна Пугачта, захиралай орлогшо Валерий Буянтуевта, Светлана Нечепайда, Сергей Мироновто ехэ баярые хүргэнэб, - гэжэ “Хяагта” бүлгэмэй хүтэлбэрилэгшэ Гэрэлма Дашипылова хэлээ.