​«Адуушанай дуунда» хабаадаһан артистнартай уулзалга

Даширабдан Батожабайн найруулгаар буулгагдаһан «Адуушанай дуун» гэһэн фильмын 62 жэлдэ зорюулагдаһан уулзалга Улаан-Үдэдэ үнгэрбэ. Тус фильм бүтээлсэһэн болон хабаадаһан зон сугларжа, яагаад буулгагдаһан тухайнь хөөрэлдэн, хэһэгүүдыень харан, тэрэ холын үдэрнүүдые дурсан һанаба.

1956 ондо Улаан-Үдэ хо­тын 1 дүгээр һургуулиин 9-дэхи ангиин һурагша бай­хадаа, Сэсэг гэжэ нэрэтэй гол геройн дүрэ гүйсэдхэлсэһэн Ангелина Алганаева бо­лон бэшэг зөөгшэ боложо наадаһан Александр Дамбиев гэгшэд энэ уулзалгын хүндэтэ айлшад болоо. Мүн тиихэдэ Тумэн Жаргаловые наадаһан Владимир Ман­кетовые һэлгэдэг байһан (дублёр) Юрий Жамсуевай басаган Светлана уулзалгада хабаадаа.

Александр Дамбиев

Фильм харахын урда тээ «Буряад үнэн» Хэблэлэй байшанай ветеран, мэдээжэ сэтгүүлшэн Николай Бадма­ринчинов геройнууд тухайнь шэнжэлэн бэшэһэн тухайгаа хөөрэбэ.

- Хайшан гээд энэ ки­нотой холбоотойбиб гэхэдэ, бэшэг зөөгшые наадаһан Александр Чимитович ми­нии түрэлэй болохо юм. 65 наһа хүсэхэдэнь, “Буряад үнэн” болон “Бурятия” со­нинуудта “Адуушанай дуун” тухай бэшээ бэлэйб. Хожо­мынь, 75 наһа гүйсэхэдэнь, гүрэнэйнгөө хоёр сониндо дахин бэшээ һэм. Һүүлшэг тээнь Ангелина Ивановна намтай холбоо баряа. Тии­хэдэнь тэрээн тухай уншаг­шадтаа баһал хоёр хэлэн дээрэ бэшээб. Мүнөө Юрий Жамсуев тухай бэшэхэеэ ха­раалжа байнаб. Энэ фильмын буулгагдаһан түүхэ шэнжэл­хэ үедөө дура зүрхэеэ буляал­гааб. Буряадайнгаа мэдээжэ, суута артистнарай бэлиг ша­дабаряар омогорхожо бай­дагби. Нэрлэбэл, Чойжинима Генинов, Буянто Аюшин, Даг­ба Дондоков гэгшэд болоно, - гэжэ Николай Дабаевич хэ­лээ.

Буряадай гүрэнэй ехэ һургуулиин буряад хэлэнэй багша Соёлма Ломбоевагай тэмдэглэһээр, эндэ эмхид­хэгдэдэг буряад хэлэнэй курсануудта ябадаг оюутад “Буряад үнэн” сониндо Ни­колай Бадмаринчиновэй Ангелина Алганаева тухай бэшэһэн статья уншаад, ехэ­тэ һонирхоо. Тиихэдэнь иимэ уулзалга эмхидхэхэ гэжэ шиидэһэн байна.

“Энэ статьягай автор ду­радхалыемнай дэмжэжэ, Александр Чимитович, Ангелина Ивановна, Вла­димир Манкетовэй үеэлэ бо­лохо Ольга Яковлевна болон Светлана Яковлевна гэгшэдые уряа, - гэжэ Соёлма Ломбоева хэлээ.

Гадна уулзалгада Буряа­даймнай мэдээжэ артистнар Михаил Елбонов болон Со­фья Данзанэ ерээ. Энэ хэмжээ ябуулгын үедэ Александр Чимитович болон Ангели­на Ивановнада Буряад Ула­сай Соёлой яаманһаа Баярай бэшэгүүд барюулагдаа.