​Булаг мэтэ бурьялма арадай уран бэлиг

Апрелиин 12-13-да П.И. Чайковскиин нэрэмжэтэ уралигай колледждо “Живой родник” гэһэн арадай уран бэлигэй можо хоорондын урилдаан долоодохиёо үнгэрбэ. Эндэ 700-гаад ха­баадагшад бэлиг шадабарияа харуулаа.

Буряадай Соёлой, мүн тиихэдэ Болбосоролой болон эрдэм ухаанай яаманууд тус хэмжээ ябуулга эмхидхэн байгуулхадаа, нэн түрүүн уластамнай ажаһуудаг олон яһатанай соёл хүгжөөхэ, дэлгэрүүлхэ, уралигта залуушуулай һонирхол татаха, ялас гэмэ шэнэ нэрэнүүдые элирүүлхэ зорилго табиһан байна бшуу.

Урилдаан хэдэн номинацяар үнгэрөө, мүн мастер-классууд эмхидхэгдээ. Арадай дуунай номинацида хабаадагшад хоёр-хоёр дуу гүйсэдхөө: нэгыень хүгжэмэй дахалтагүйгөөр, нүгөөдыень хүгжэм доро. Арадай зэбсэгүүд дээрэ наада­даг хабаадагшад мүн лэ хоёр хүгжэм гүйсэдхэхэ гэһэн эрилтэтэй байгаа. Гар урлалай номинаци­да мүрысэгшэд гараараа урлаһан бүтээлнүүдээ ду­радхаа юм. Тэдэниинь кол­леджын фойегээр дүүрэн дэлгэгдэжэ, нюдэнэй шэмэг боложо үгөө. Дуратай зон ху­далдажа абаһаншье байха.

- Энэ урилдаанда ехэ анха­рал хандуулдагбди. Юуб гэхэ­дэ, дүнгүүдээрнь бидэ шэнэ нэрэнүүдые элирүүлнэбди, ерээдүйдэ колледждомнай һураха бэлигтэй үхибүүдые олонобди, - гэжэ коллед­жын захирал Баир Турбянов хэлээ. – Гадна арадай уран бэлигтэй танилсанабди. Энэ хадаа гансашье манай колледждо хэрэгтэй мэдээн бэшэ, хабаадажа байһан бүлгэмүүдэй саашанхи зо­хёохы замдань туһатай гэжэ һанагдана.

Арадай дуу гүйсэдхэгшэдые Арадай уран бэ­лигэй түбэй таһагые даагша Вера Долженко түрүүтэй жю­риин гэшүүд, тэрэ тоодо бул­танаймнай дуратай Бадма-Ханда Аюшеева сэгнээ. Бусад номинацинуудта хабаадагшадые баһа нэрэ түрэтэй зон сэгнэһэн байна.

- “Баян булаг” гэһэн бу­ряад арадай зэбсэгүүдэй оркестртэй тус урилдаанда хоёрдохиёо хабаадажа бай­наб. Мүнөө би “Хүрин хээр” гэжэ дуу гүйсэдхөөб. Энэ урилдаан хэдэн шэглэлээр үнгэргэгдэхэдөө, бидэндэ хэдэн номинацида хабаа­даха арга олгоно. Энэнь ехэ һайшаалтай: нэгэ доро хэ­дэн шангуудта хүртэхэ ар­гатайбди, - гэжэ Хэжэнгэ аймагай хүүгэдэй хүгжэмэй һургуулиин багша Алек­сандр Рубцов тэмдэглэнэ.

- Мүрысөөнэй эхи табиһанһаань хойшо манай арадай аман зохёолой “Баян Сүмбэр” бүлгэм хабаададаг юм. Үнгэрһэн жэлнүүдтэ яһала амжалтануудтайб­ди, түрүүшье һуури эзэлһэн байхабди. Буряад һайхан хүгжэм аялгаа гүйсэдхэжэ, арад зондоо дамжуулнабди гэжэ һанагдана. Аймагайм­най бүлгэмүүд жэл бүхэндэ бүхы номинацинуудаар хаба­адажа байхадаа хүгжэнэ, бэ­лигээ мүлинэ, шэнэ юумэндэ һурана. Мүнөө жэл хабаадаг­шад олошороод байна. Бидэ үхибүүдыешье, томошуулые­шье мүрысөөндэ асараабди, - гэжэ “Баян Сүмбэр” бүлгэмэй хүтэлбэрилэгшэ Дугарма Жамсаранова һанамжална.

Хоёр үдэрэй туршада жю­риин гэшүүд үй түмэн гэхээр хабаадагшадые хаража, сэг­нэжэ, тэдэнэй дунда эрхимэй эрхимүүдые тодоруулаа. Но­минаци бүхэндэ таба-табан һуури элирүүлэгдээ. Бүгэдэ лауреадууд дипломоор бо­лон мүнгэн шангуудаар шаг­нагдаа.

Арадай хүгжэмэй зэбсэгүүд дээрэ наадагшадай дунда илагшад гэбэл: Хяагта аймагай хүүгэдэй хүгжэмэй һургуулиин шаби Марина Ойдова (10-15 наһатайшуул), П.И. Чайковскиин нэрэмжэтэ уралигай колледжын оюутан Чимит Дондуков (16-һаа дээ­шэ наһатай). Энэл номина­цида бүлэг гүйсэдхэгшэдэй дунда Д. Аюшеевэй нэрэм­жэтэ хүгжэмэй-соёл түүхын лицейн шабинар Софья Ов­сянникова болон Алексан­дра Грищёва, П.И. Чайков­скиин нэрэмжэтэ уралигай колледжын оюутад Екатери­на Васильева болон Андрей Кривогорницын өөр-өөрын наһанай бүлэгтэ түрүү һуури эзэлээ.

“Гар урлал” гэһэн номи­нацида наһанай бүлэгүүдэй болон шэглэлнүүдэй илаг­шад: Выдрино тосхоной Анна Ильюк, П.И. Чайковскиин нэрэмжэтэ уралигай колледжын оюутан Анаста­сия Фёдорова, Бэшүүр аймагай хүүгэдэй хүгжэмэй һургуулиин шаби Павел Гон­тов, П.И. Чайковскиин нэрэм­жэтэ уралигай колледжын оюутад София Бурмистрова, Лада Москвитина, Мария Банникова, Дарья Гармаева.

Арадай дуу гүйсэдхэгшэдэй эрхимүүдые нэр­лэе: Ярууна аймагай Дулдарга нютагай һурагша Дари Далаева, Зүүн Сибириин соёлой дээдэ һургуулиин оюутан Виктория Лайжато­ва, Сэлэнгэ аймагай Онохой тосхоной Елена Филиппова, Загарай аймагай хүүгэдэй хүгжэмэй һургуулиин “Жаворонушки” гэһэн арадай бүлгэм, Захаамин аймагай “Беседушки” гэһэн арадай бүлгэм болон П.И. Чайков­скиин нэрэмжэтэ коллед­жын “Жэргэмэл” гэһэн ара­дай аман зохёолой бүлгэм.

Уласаймнай хүүгэд болон бүлгэмүүд иимэ ехэ хэмжээ ябуулгада хабаадажа, уран бэлигээ мүлинэ, хоорондоо хани барисаагаа бэхижүүлнэ гэжэ тэмдэглэхэ шухала.