Крымдэ Ородой Кубогта хүртэхын түлөө һур харбалгаар мүрысөөн уржадэр боложо түгэсэбэ. Энэ шухала хэмжээ ябуулгада Буряадай тамиршад шалгараа.
Гүрэнэй һоригшо Эрдэм Жигжитовэй хэлэһээр, тус мүрысөөн олон тамиршадта зунай хаһада түрүүшын туршалга боложо үгөө. Эндэ шалгарһан харбагшад Ородой суглуулагдамал командын бүридэлдэ оруулагдаха. Тиигэжэ тэдэ Дэлхэйн Кубогта хүртэхын түлөө мүрысөөнэй түрүүшын хоёр шатада хабаадаха юм. Хитадай Шанхай болон Турциин Анталья хотонуудта тулалдаанууд үнгэргэгдэхөөр түсэблэгдэнхэй. Зунай үедэ ехэшүүл Европын чемпионадта ошохоор хараална.
40 можо, хизаарай 270 гаран тамиршад Ородой Кубогта хабаадаһан байна. Буряадай түлөөлэгшэдэй амжалта туйлаһандань омогорхомоор.
Эрэшүүлэй дунда Цырен Балтаков түрүүлжэ гараа. Тэрэ түгэсхэлэй уулзалгада Үбэр Байгалһаа уг гарбалтай Александр Кожин гэгшые илажа шадаа. Буряадай эгээл суутай, үндэр нэрэ зэргэтэй Бальжинима Цыремпилов 3-дахи һуури эзэлээ.
2016 оной Олимпиин наадануудта мүнгэн медаль абаһан Инна Степанова эхэнэрнүүдэй дунда эрхим байба. Үбэр Байгалай хизаарай Саяна Цыремпилова болон Буряадай Виктория Будаева гэгшэд мүнгэн болон хүрэл медальнуудта хүртөө.
Буряад оронһоо уг гарбалтай Ариуна Будаева болон Алдар Цыбикжапов гэгшэд Москва хотын түлөө харбажа, командна тоосоондо хоёрдохи һуурида гараа.
Залуушуулай хоёр наһанай бүлэгтэ Ородой чемпионат эдэ үдэрнүүдтэ Алушта хотодо үнгэргэгдэжэ байна. Шанга тулалдаануудай удаа эдиршүүлэй дунда Олимпиин наадануудта ошохо хүнүүдэй нэрэнүүд элирүүлэгдэхэ. Тэдэнэй тоодо Буряадай тамиршад оролсохо бэзэ гээд найдагдана.