​Буддын заншалта Сангхын Сугунды

Апрелиин 21-дэ Заншалта Сангхын Сугундын хурал үнгэрбэ. Сугундыда шэрээтэ ламанар, дид-хамбанар болон бүхы дасануудай мүргэлшэдэй түлөөлэгшэд, Буряад Уласай Юрэнхылэгшэ, Буряад Уласай Засагай газарай түлөөлэгшэд, арадай һунгамалнууд хабаадаа. Сугундын эхиндэ нарин бэшээшээр һунгагдаһан Валерий Тангаров Бандида-Хамба ламын һунгалта болохо юм гэжэ зарим олондо мэдээсэл тараадаг эмхинүүд буруугаар мэдээсэһэн тухай хэлэбэ. Бандида-Хамбын тушаалда наһаараа һуухаар һунгагдадаг юм. Харин Сугунды зарлагдахадаа, үнгэрһэн хугасаада ямар үйлэ хэрэгүүд хэгдээб гэжэ тоосодог, саашадаа юу хэхэмнэйб гэжэ тодорхойлогдодог.

Буряад Уласай Толгойлогшо Алексей Цыденов үгэ хэлэхэдээ, Буддын шажанай урданай дасан дуганууд, субарганууд һэргээгдэхэһээ гадна, холын хойто нютагуудааршье дасануудай баригдаһаниие һайшааба. Буряад оронойнгоо арад зоной аша туһада, Ородой Холбоото Уласай элдэб шажан мүргэлтэй олон тоото яһатанай арад олоной эбтэй эетэй ажаһуухын тулада Бандида-Хамба лама Дамба Аюшеев түрүүтэй Зашалта Сангха сэгнэшэгүй ехэ ажал ябуулна гэжэ Алексей Самбуевич тэмдэглээ. Арадайнгаа заншалта малаа үдхэхэ, үндэһэн соёлоо, тамираа хүгжөөхэ болон түрэл хэлэеэ үргэхэ хэрэгүүдтэ Дамба Аюшеев хамбын үүргые дээрэ үргэжэ, Уласай Толгойлогшо баяр хүргэбэ.

Өөрынгөө зүгһөө 24 дугаар Бандида-Хамба лама Дамба Аюшеев Уласай Толгойлогшодо заншалта шажан мүргэлыемнай гүрэнэй талаһаа дэмжэжэ байһандань баяр хүргэбэ.

24 дугаар Бандида-Хамба лама 2013 оной апрелиин 29-нэй Сугундыһаа мүнөөдэр болотор ямар ажал хэгдээб, ямар үйлэ хэрэгүүдтэ Заншалта Санга хабаадааб гэжэ тон дэлгэрэнгыгээр Сугундыда элидхэбэ. Үдэр бүриингөө ажал Аюшеев хамба хуу бэшээд ябадаг юм байна гэжэ энэ элидхэл шагнаад һанахаар байба. Теэд элидхэхэдээ, гол шухалынь тэмдэглээ бэд даа.

2013 он

Февралиин 22-до Ородой Холбоото Уласай Юрэнхылэгшэ Владимир Путин “Эб найрамдал” орден зүүлгээ.

Мартын 5-да дэлхэйн шатаршадай ФИДЕ байгуулгын Юрэнхылэгшэ Кирсан Илюмжиновтай уулзалга үнгэргөө.

Мартын 16-да Москвадахи “Түбэдэй гэр” байгуулгын орлогшо дарга Беркенгейм хүлеэн абаа.

Апрелиин 11-нэй үглөөгүүр Ородой Холбоото Уласай Юрэнхылэгшэ Владимир Путиниие угтажа, Согчин дуганда, Этигэлэй хамбын Ордондо оруулжа хүндэлөө. Тэрэ түүхэтэ уулзалгын үедэ Будаадын шажанай байдал болон хүгжэлтэ тухай хөөрэлдөөд, буряад үүлтэрэй хони үдхэхэ хэрэгтэмнай мүнгэн туһаламжа үзүүлхынь хэлсэбэ. Тиихэдэ 1930-аад он болотор хамбанарай хүреэ байһан Тамчын дасан тухай хөөрэлдөөн гаража, Тамчын дасанай шэрээтэ Солбон Аюшеев: “Вас, Владимир Владимирович, по этой дороге никогда не провезут”, - гэжэ ехэ мэргэнээр һонирхолынь татаа. Тиигэжэ Тамчын дасан хүрэхэ зам заһагдаха болоо. Урмашаһан Солбон ламын удангүй: “Не могу промолчать”, - гэхэдэнь, Юрэнхылэгшэ: “Не молчите”, - гэжэ зүбшөөгөө. Тиигэжэ Ивалгын дасан уран шудхалгын хэрэгсэлтэй газартай болоо.

Майн 7-до Ивалгын дасанай 32х36 метр хэмжээнэй Согчин дуганай һууриие бетоноор шудхаха ажал эхилээ. Энэ барилгада Ородой Холбоото Уласай Юрэнхылэгшын захиргаанай орлогшо дарга Вячеслав Володин 10 сая түхэриг үгэһэн юм.

Энэл һарада Ивалгын дасанай дэргэдэхи ипподромдо мори урилдаа харагшадай 200 һууритай трибуна баригдаа.

Июниин 7-8-най үдэрнүүдтэ Захаамин аймагай Шара-Азаргада Монголой наадамай 5 дахин абарга Дариин Дамдинда зорюулһан бүхэ барилдаа хаража, нютагтамнай иимэ бүхэ барилдааша хүбүүн хүмүүнэй бэе оложо түрэхыень юрөөл табяа.

Июниин 28-29-дтэ Этигэлэй хамбада зорюулагдаһан эрдэм шэнжэлгын хуралдаа ламанар, эрдэмтэд, мүргэлшэд үнгэргөө.

Далай ламын Дхармасаладахи парламентын гэшүүн Дамба Мугру ламые хүлеэн абаа.

Гүрэнэй Дүүмын һунгалтын үмэнэ олон тушаалта зон Ивалгын дасанда ерэһэн байна: “Справедливая Россия” намын дарга Сергей Миронов, Сбербанкын дарга ноён Герман Греф, Хүдөө ажахын сайд Фёдоров, Гүрэнэй ахамад санитарна эмшэн Геннадий Онищенко болон Михаил Прохоров,Александр Панфилов баяшуул.

Октябриин 1-дэ Монголой конвентын Юрэнхылэгшэ Цахиагын эхэнэрые хүлеэн абаа.

Октабриин 14-дэ мэдээжэ политик Ирина Хакамадые хүлеэн абаа.

Октябриин 25-да Энэдхэгэй элшэн сайд Аджаю Махотрее гэр бүлэтэйнь хүлеэн абажа, Этигэлэй хамбатай уулзуулаа.

Ноябриин 9-10-дта буряад хэлэн тухай хуралда нютаг хэлэеэ дэмжэжэ һэргээхэ ажал ябуулха шиидхэбэри абтагдаа.

Ноябриин 21-дэ Японой элшэн сайд Харадые хүлеэн абаа.

Ноябриин 29-дэ Англида алдаршаһан Гүрэнэй Дүүмын һунгамал Луговойтой дасандаа уулзаа.

Декабриин 9-дэ хони худалдажа абаха гэһэн Владимир Путинай мүнгэн абтаха болоо.

Декабриин 16-да Ородой хаашуул Романовтанай уг залгажа абаад ябаһан Хатан хаан Мария Фёдоровнагай тамгын газарай дарга Немирович-Данченкэтэй уулзаа.

Февралиин 1-дэ Оли Нидал ламые шабинартайнь Этигэлэй хамбада мүргүүлээ.

Мартын 31-дэ уран барималша Николай Мандагановтай Захааминай Санагада Арьяабаала Бодисадын шүтээн бодхохо тухай шиидхэри абаа.

Апрелиин 1-дэ Болбосорол болон эрдэм ухаанай сайд Ливановые хүлеэн абаа.

Апрелиин 3-4-дтэ шэбхээр түлихэ пилеты түлишэ болбосоруулжа эхилээ.

Апрелиин 14-дэ Буряадай соёлой сайд Тимур Цыбиковтай Бандида-Хамба ламын тушаалай байгуулагдаһаар 250 жэлэй ойн баяр үнгэргэхэ тухай хэлсээ.

Апрелиин 17-до Ямало-Ненецкэ тойрогой Толгойлогшо Кобылкинтай уулзаа.

Майн 11-дэ хони абаха зониие Жамсо Гунзынов түрүүтэйгээр Тыва ябуулаа.

Июниин 2-то Самдон римбүүшые эртэмтэн Турмантай хүлеэжэ абаа.

Июниин 4-дэ Хальмагай сенатор Бату Хасиковые абатайнь хүлеэжэ абаа.

Июниин 21-дэ Дэмбрэл багша болон Александр Махачкеевтэй Бандида-Хамбанар тухай ном хэблэхэ арга хэмжээнүүдые хэлсээ.

Иигээд лэ тооложо байбал барагдахагүй юм байна. Дэлгэрэнгыгээр “Буряад үнэн” сониндоо толилхобди.

Сугандыда Сангхын ревизионно комиссиин түрүүлэгшэ Бато-Цырен Далаев лама Сангхын гаргашанууд тухай элидхээ.

Ородой Холбоото Уласай Будаадын шажантанай заншалта Сангхын шэнэ Устав баталагдаа.

Анна Огороднигой гэрэл зурагууд