802
Байгша оной апрелиин 23-27-ной үдэрнүүдтэ багшанарай дунда «Буряад уласай эрхим багша-2018» гэһэн уласай XXII мүрысөөн үнгэргэгдэхэ.
Буряад Уласай багшанарай мэргэжэл хүндэтэй гэжэ гэршэлэн, бэлиг талаантай багшанарые элирүүлжэ, тэдэнэй дүй дүршэлөөр хубаалдаха зорилготой мүрысөөн эмхидхэгдэнэ. Байгша ондо уласай 30 багшанар мүрысөөндэ хаба шадалаа туршаха юм.
«Эрхим багша - 2018» гэһэн мүрысөөнэй нээлгын баяр ёһолол 65 дугаар һургуулида үнгэргэгдэжэ, удаань мүрысөөнэй шатанууд эхилхэ. Энэл үдэр «Методический семинар» гэһэн мүрысөөнэй түрүүшын шата эмхидхэгдэжэ, удаань болбосоролой болон эрдэм ухаанай яаманай түлөөлэгшэдтэй уулзалга үнгэргэгдэхэ юм. Удаадахи үдэрнүүдтэ багшанар хэшээлнүүдые үнгэргэжэ, «Багшанарай зүблэл», «Мастер-класс», «Болбосоролой түсэл», «Түрүү багша» гэһэн шэглэлнүүдээр мүрысөөнүүдтэ хаба шадалаа туршаха.
Апрелиин 27-до Зүүн Сибириин гүрэнэй технологиин болон хүтэлбэриин ехэ һургуулиин соёлой- сүлөө сагаа үнгэргэлгын түбтэ Буряад уласай эрхим багша элирүүлэгдэхэ.
«Буряад уласай эрхим багша» гэһэн мүрысөн «Ородой Холбоото уласай эрхим багша» гэһэн бүхэроссиин мүрысөөнэй уласай шата болоно. Энэ мүрысөөн 1989 онһоо эхитэй. Энэл жэлдэ «Учительская газета» гэһэн сониндо Америкын Холбоото Штатуудта 1952 онһоо үнгэргэгдэдэг «Эрхим багша» гэһэн мүрысөө дууряан, СССР-тэ үнгэргэхэ тухай уншагшадта дурадхаһан байна. 1990 ондо «СССР-эй эрхим багша» мүрысөөнэй эмхидхэлэй хороон байгуулагдажа, тэрэнэй бүридэлдэ мэдээжэ эрдэмтэд, сэтгүүлшэд, болбосоролой хүтэлбэриин эмхинүүдэй түлөөлэгшэд ороһон юм. Бүхэросиин мүрысөөн1992 онһоо түүхэтэй. Ородой Холбоото Уласай Болбосоролой яаман болон Арадай болбосорол болон эрдэм ухаанай профсоюзай түбэй хороон мүрысөөнэй эмхидхэн байгуулагшад юм.
Тэрэл 1992 ондо Буряадта анха түрүүшынхиеэ мүрысөөн үнгэргэгдэжэ, Улаан-Үдын 47-дохи һургуулиин биологиин залуу багша Баяр Самаданович Гомбоев эрхим багша болоһон юм. Саашадаа Баяр Гомбоев мүрысөөнэй хүгжэлтэдэ горитой хубитаяа оруулаа гэжэ тэмдэглэлтэй.
2000 онһоо эхилжээ уласай мүрысөөн жэл бүри үнгэргэгдэнэ. Жэлһээ жэлдэ эмхидхэгдэһэн мүрысөөндэ 400-һаа дээшэ хүн хабаадаа. 2003 оной октябрь һарада «Буряад уласай эрхим багша» мүрысөөнэй илагшад болон лауреадуудай үүсхэлээр «Клуб-Буряад Уласай эрхим багша» гэһэн уласай олониитын эмхи байгуулагдаа. Болбосоролой һалбариин бэлиг талаантай хүдэлмэрилэгшэдые дэмжэхэ, урмашуулха, багшанарай дүй дүршэлөөр хубаалдаха зорилготой уласай олониитын эмхи ажалаа ябуулдаг. Буряад уласай 18 аймагуудта семинар, нээмэл хэшээлнүүд, мастер-классуудые тус клуб эмхидхэһэн байна.
Буряад Уласай болбосоролой болон эрдэм ухаанай хэблэлэй албанай гэрэл зураг
