Буряад Уласай багшанарай мэргэжэл хүндэтэй гэжэ гэршэлэн, бэлиг талаантай багшанарые элирүүлжэ, тэдэнэй дүй дүршэлөөр хубаалдаха зорилготой мүрысөөн эмхидхэгдэнэ.
Буряад уласай багшанарай колледжо «Буряад Уласай эрхим багша-2018» гэһэн уласай XXII мүрысөөнэй нээлгын баяр ёһолол мүнөөдэр, апрелиин 23-да, үнгэргэгдэбэ. Энэ хэмжээ ябуулгада Буряад Уласай болбосоролой болон эрдэм ухаанай сайдай уялга дүүргэгшэ Галина Фомицкая сугларагшадые амаршалба.
“Хүндэтэ багшанар, суг хүдэлдэг нүхэд, мүрысөөндэ хабаадагшад – таанадта Буряад Уласай болбосоролой болон эрдэм ухаанай яаманай болон Баир Жалсановай зүгһөө баяр хүргэнэб. Уурагшаа һанаатай, бэлиг талаантай, зохёохы ажалда бэрхэ, дээдэ мэргэжэлэй багшанар мүрысөөнэй шатануудта эрдэм мэдэсэеэ шалгажа, дүй дүршэлөөрөө хубаалдахат гэжэ найданабди. Таанадай хабаадалгаһаа мүнөө жэлэй мүрысөөн ямараар үнгэрхэб гэжэ дулдыдаха”, - гэжэ Галина Фомицкая хэлэбэ.
Байгша ондо уласай 28 багшанар мүрысөөндэ хаба шадалаа туршаха юм. Тэдэнэй дунда долоон эрэшүүл гэжэ тэмдэглэлтэй.
Гурбан үдэрэй туршада эмхидхэгдэхэ мүрысөөнэй шүүгшэдэй тоодо Буряад Уласай болбосолой болон эрдэм ухаанай сайдай уялга дүүргэгшэ Галина Фомицкая, Арадай Хуралай ниигэмэй бодолгын талаар хорооной зүбшэлэгшэ Баярма Бадарханова, Буряад уласай болбосоролой бодолгын институдай захирал Владимир Цыренов, болбосоролой болон эрдэм ухаанай яаманай дэргэдэхи олониитын зүблэлэй түрүүлэгшэ Марина Цыренова, Ородой Холбоото Уласай арадай болбосоролой болон эрдэм ухаанай һалбариин хүдэлмэрилэгшэдэй уласай таһагай түрүүлэгшэ Лариса Жанаева, “Клуб-Буряадай эрхим багша” гэһэн олониитын эмхиин түрүүлэгшэ, Улаан-Үдын 47 дугаар һургуулиин хүмүүжүүлгын талаар захиралай орлогшо Елена Цыбикова болон 2017 оной эрхим багша, Турунтаевын гимназиин тоо бодолгын багша Валентина Старикова гэгшэд оробо.
«Буряад Уласай эрхим багша-2018» мүрысөөнэй дүнгүүд апрелиин 27-до Зүүн Зүүн Сибириин гүрэнэй технологиин болон хүтэлбэриин ехэ һургуулиин соёлой-сүлөө сагаа үнгэргэлгын түбтэ согсологдохо.
Буряад уласай болбосоролой болон эрдэм ухаанай хэблэлэй албанай гэрэл зураг