​Хальмагай театр зүжэг наадаяа дэлгэнэ

Эдэ үдэрнүүдтэ Баатар Басанговай нэрэмжэтэ Хальмагай Үндэһэн театр эгээл эрхим гурбан зүжэгүүдээ Хоца Намсараевай нэрэмжэтэ Буряад драмын театрай тайзан дээрэ дэлгэнэ.

Тус театр найман үеын артистнарһаа бүридэдэг, тэдэнь булта гүрэнэймнай эрхим дээ­дэ һургуулинуудые дүүргэһэн. Тиин хальмаг ара­дай үндэһэн соёл, түрэл хэлэ бэшэгээ һэргээхэ, уран зохёол дэлгэрүүлхэ гэһэн үүргэ бэелүүлдэг юм.

Мүнөө үеын репер­туартань хальмаг ара­дай уран зохёолшод Б. Басангов, А. Балакаев, Б. Сангаджиева, Е. Буд­жалов, В. Шуграева, П. Дарваев болон бусадай зүжэгүүд ороно. Үндэһэн хальмаг драматургну­удай бүтээлнүүдэй хажуугаар Ородой болон дэлхэйн классигуудай, оршон үеын залуу­шуулда ба үхибүүдтэ зорюулагдаһан зүжэгүүд баһал табигдадаг.

Хальмагай үндэһэн театр Бүхэроссиин, улас­хоорондын фестивальнуудта хабаадажа, зохё­охы ажалайнгаа үндэр хэмжээ гэршэлһэн. Гүрэн соогуураа болон хари га­зарнуудааршье гастроль­до ябадаг юм.

Буряад драмын теа­трай тайзан дээрэ апре­лиин 23-да “Би - Буддаб”, апрелиин 24-дэ халь­маг арадай хамалганда хохидоһон тухай “Араш” гэһэн зүжэгүүд табигдаа. Мүнөөдэр түрэ найрай заншал харуулһан зүжэг дурадхагдаха юм.

Хальмаг арадай теа­трай гастрольнууд Оро­дой Холбоото Уласай Со­ёлой яаманай “Большие гастроли” гэһэн програм­мын хэмжээндэ үнгэрнэ. Тус түсэл 2014 онһоо бэелүүлэгдэжэ эхилээ. Тиихэдэнь Буряад Улас түрүүшүүлэй тоодо ха­баадуулагдажа, Вахтан­говай нэрэмжэтэ театр Улаан-Үдэ хотодо олон зүжэгүүдээ дэлгээ бэлэй.

Энэл түсэлэй ёһоор, июнь һарада В. Маяков­скиин нэрэмжэтэ театр Улаан-Үдэ ерэхэ юм.