​Владимир Путинда зорюулагдаа

Апрелиин 22-то Улаан-Үдэдэ Ород гүрэниие толгойлжо ябагшадай һахюуһан болоһон Сагаан Дара эхэдэ зорюулагдаһан буряад барилдаагаар уласхоорондын мүрысөөн үнгэргэгдэбэ. Ородой Хол­боото Уласай Юрэнхылэгшэ Владимир Путинай амиды мэндэ, элүүр энхэ ябахын түлөө энэ мүрысөөн болоно гээшэ.

2007 ондо тус мүрысөөн анха түрүүшынхиеэ үнгэргэгдөө һэн. Ти­ихэдэ 500 гаран хабаадагшад хибэс дээрэ гараа. Нёдондо мүрысөөн анха түрүүшынхиеэ ФСК-да болоһон бай­на. Мүнөөшье жэл олон харагшадай хабаадалгатайгаар үнгэрөө. Тамир­шадай тоо 1085 хүн болотороо дээ­шэлээ.

Буряад Уласай Толгойлогшо Алек­сей Цыденов нээлгын баяр ёһололдо сугларагшадта хандахадаа, Бандида Хамба лама Дамба Аюшеевтэ баярые хүргөө.

- Бүхэ барилдаан манай ёһо зан­шалай шухала зүйл болоно. Арба гаран жэлэй саада тээ Дамба Аюше­ев энээниие һэргээжэ эхилээ, - гэжэ Алексей Цыденов хэлээ. - Жэл бүри барилдаанда олон үхибүүдэй, залу­ушуулай орожо байхыень харахада, баяртай байна.

Бандида Хамба ламын хэлэһээр, бүхэ барилдаанай гуримаар бидэ Ородой Юрэнхылэгшэдэ өөрын хан­даса харуулнабди.

- Ямаршье хүн баярай һайхан үгэнүүдые дуулахадаа, үреэл шагна­хадаа, баярлажа һуудаг бшуу. Элүүр энхэ ябахынь түлөө барилдаан бо­ложо байна гэжэ дуулаһан Влади­мир Владимирович Путин баярлажа һууна ёһотой, - гэжэ Дамба Аюшеев хэлэбэ.

Буряад Уласай Арадай Хуралай Түрүүлэгшын орлогшо Вячеслав Ирильдеев амаршалхадаа, барилда­ашаднай хүн зоной дунда элүүр эн­хын ябадал харуулан дэлгэрүүлнэ гээшэ гэжэ онсолоо.

Баяр ёһололой оршондо “Ородой габьяата һоригшо” гэһэн нэрэ зэргэ Баргажан аймагай Баянгол һууринай мэдээжэ багша Виктор Эрдынеевич Ринчиновтэ олгогдоо. Этигэл хамба ламада зорюулагдаһан мүрысөөнэй түрүүшын чемпион болоһон Михаил Дамбиев Виктор Ринчиновэй ударидалга доро һорилго хэһэн байна. Мүн тиихэдэ олон мэдээжэ тамиршадые барилдаантай танилсуулһан юм.

Заншалта ёһоороо 12 наһатай үхибүүд хибэс дээрэ анха түрүүшынхиеэ гараһан байна. Мүнөө нохой жэлтэй хүбүүд хүсэ шадалаа харуулна. Эндэ шангай һууринуудые Табангууд Үшөөтэйн дасанай Тумэн Дондоков болон Сээжэ Бургалтайн дасанай Сергей Банзаракцаев гэг­шэд эзэлээ. Бусадһаа нэгэ бага үлүү байһан Эгэтын дасанай Баян Моисе­ев түрүүлжэ гараа.

Баян Моисеев Мунко Базаров һоригшотоёо

Тэрэ хадаа Ярууна аймагай Нарһатада 6-дахи ангида һурадаг, гур­бан жэлэй туршада бэлигтэй багша Мунко Дамбаевич Базаровай удари­далга доро һорилго хэнэ. Сүлөөтэ барилдаагаар Ярууна аймагай чем­пион анха түрүүшынхиеэ бүхэ ба­рилдаанда иимэ ехэ илалта туйлаба.

Эдиршүүл энэ мүрысөөндэ юһэн шэгнүүртэ илагшадые тодоруулаа. Монголой Цэдэнбальжир Баярсай­хан, Ивалгын дасанай Зорикто Ки­шиктуев, Атаган дасанай Бавасан Буянтуев, Усть-Ордын дасанай Вла­димир Иванов, «Балдан Брэйбун» дасанай Чингис Мункуев, Хэжэнгын дасанай Зорикто Бороев, Санагын дасанай Аюша Доржиев, Александр Долсонов, Баяр Шагдуров гэгшэд чемпионууд болобо. 12 һара соо эдэмнай 2000 түхэриг шан абажа байха юм.

Ехэшүүлэй дунда мэдээжэ ба­рилдаашад шалгараа. 63 килограмм хүрэтэр шэгнүүртэ Баргажан да­санай хоёр түлөөлэгшэд финалда уулзаа. Эндэ Алексей Монтоев Кон­стантин Цыреновые илажа гараа. 75 килограмм хүрэтэр шэгнүүртэ Хурамхаан дасанай Артём Раднаев Ахаһаа уг гарбалтай Даша Шарасте­пановай нюрга шоройдуулаа. Ехэ шэгнүүртэ Агын дасанай Цыбик Максаров түрүүлээ.

Алексей Монтоев Константин Цыренов хоёр тулалдана