​Арадайнгаа заншал алдаагүй “Аза хүсэл”

Арадай аман зохёолой “Аза хүсэл” ансамблиин байгуулагдаһаар табан жэл гүйсэбэ. Энэ баярта ушараар ансамблиинхид Буряадай гүрэнэй филармонидо тоглолтоёо үнгэргэжэ, хүн зониие хужарлуулба.

“Аза хүсэл” хадаа Үндэһэтэнэй номой сангай дэргэдэ ажалаа ябуулдаг, мүн тэндэ эмхидхэгдэдэг бүхы хэмжээ ябуулгануудта хабаададаг. Хүтэлбэрилэгшэнь Валерия Осиповна Бабкинова мүн. Тэрэ Эрхүү можын Нүхэдэй аймагай Ей нютагһаа уг гарбалтай. Наһанайнгаа амаралтада гаратараа, 37 жэлэй туршада багшалһан.

Ансамбльда Үбэр Байгалай хизаарһаа, Эрхүү можоһоо, мүн Буряад Уласай хаа-хаанаһаа сугларһан 15 хүн ябадаг. Ехэнхинь наһанайнгаа амаралтада гаранхай. Эдэмнай хатарха, дуу дуулаха дуратайшуул, ёһо заншалаа алдангүйгөөр саашань дамжуулха гэжэ оролдоһон зон болоно.

Эхин дээрээ хэдыхэн лэ залуушуул сугларжа, буряад ёһо заншалаа һэргээжэ, арадайнгаа дуунуудые дуулалдаха, ёохороо хатаралдаха байгаабди гэжэ хөөрэлдэһэн байгаа. Тиигэһээр наһатайшуулые урижа, эбээрээ хэлсэжэ, ансамбль байгуулһан түүхэтэй.

Ансамбль нэрэдээ тон тааранхай. Аза хүсэл гээшэмнай үреэл болоно ха юм даа. Тиимэһээ ганса дуу дуулаха, хатарха бэшэ, буряад арадайнгаа ёһо заншалнуудые үндэр наһатайшуулһаа суглуулжа, аман үгөөр дамжуулан, видео-буулгабари болгон гаргана. Энээгээрээ бусад зохёохы бүлгэмүүдһээ илгардаг юм. Жэшээнь, хайшан гээд айлшадтаа зүбөөр төөлэй табихаб, сай шанахаб, гал гуламтаяа сахихаб гэхэ мэтэ заабаринуудые үгэһэн, тодорхойгоор харуулһан видео буулгадаг. Тиихэдэнь үхибүүдһээ эхилээд, наһатайшуул хүрэтэр тэрэнииень хаража, зүбөөр хүмүүжүүлэгдэнэ, туһатай мэдэсэнүүдые хадуужа абана. Ансамблиинхид Матвей Хангаловай, Сергей Балдаевай, Алексей Улановай, Валентина ба Сергей Бабуевуудай болон бусад эрдэмтэдэй номуудые анхаралтайгаар үзэжэ, энэ харюусалга ехэтэй хэрэгээ бүтээдэг байна.

Видео болгожо гаргахын тула горитой ажал хэгдэнэ. Нэн түрүүн Улаан-Үдэ хото тойронхи үзэсхэлэн гоё байгаалитай газар бэдэржэ олоод, “Байкал” АТВ телесубагтай, Үндэһэн соёлой Буряадай Байгалай түбтэй хэлсээ баталжа, гоё гэгшын видео-буулгабаринуудые бүтээдэг. Ансамблиин гэшүүд өөһэдынгөө хүсөөр мүнгэ алта суглуулжа, энэ хэрэгээ өөһэдөө даагаад ябана. Мэдээсэлэй Интернедэй һайгаар нюдэ сабшаха зуура тарашадаг үедэ видеонуудыень хэншье, хаанашье харадаг болонхой. Олоной һонирхомоор, хүгжөөлгын, хүмүүжүүлгын талаар ехэхэн ажал ябуулагдана гэжэ тэмдэглэхээр.

Гэбэшье, эдэбхи үүсхэл ехэтэйшүүл хотын 3-дахи, 38-дахи һургуулинуудай шабинартай, мүн 60-дахи һургуулиин эрэмдэг бэетэй үхибүүдтэй хүмүүжүүлгын ажал ябуулхынгаа хажуугаар бүхы тоглолтонуудтань хабаададаг байна. Һурагшад эдэ уулзалгануудта дуратайгаар ерэдэг юм.

Эдэ бүгэдэ хэрэгтэй, туһатай ажалайнь түлөө ансамблиин гэшүүдтэ Үндэһэтэнэй номой сангай зүгһөө Баярай бэшэгүүд барюулагдаа. “Аза хүсэл” ансамблиин тоглолто заншалта ёһоороо үндэр хэмжээндэ үнгэржэ, хүн зон сэдьхэл зүрхөө хөөрэһэнүүд бусаа һэн.

Түгэсхэлдөө иигэжэ хэлэлтэй. Эдэ видеонуудыень һургуулинуудта буряад хэлэнэй хэшээлнүүдтэ хэрэглэжэ, үхибүүдтэ харуулаа һаа, туһатайшье, һонирхолтойшье байха гэжэ һанагдана.

Авторай гэрэл зураг