​Буряад Уласта хабарай тарилга эхилбэ

Майн 3-һаа Буряад Уласай бүхы хүдөө ажахынуудта хабарай тарилга эхилхэ ёһотой. Харин зарим ажахынууд апрелиин һүүл багаар энэ харюусалгатай ажалаа эхилээ юм.

Тарбагатай аймагай “Хүйтэн” ажахы 2900 гектар талмайда орооһото таряа тариха түсэбтэй. Хабарай ажал хэрэгүүдтэ “К-744” трактор, “Кузбасс-Т”, “Омичка” гэһэн шэнэ оньһото түхеэрэлгэнүүдтэй техникэ хэрэглэгдэхэ. Уласай түрүү ажахы 40 сая түхэригэй хэмжээндэ техникэеэ шэнэлээ юм.

“Хүйтэнэй” хүтэлбэрилэгшэ Григорий Мясниковай хэлэһээр, ажахы апрелиин 26-һаа тарилгадаа гараа.

- Мүнөө 4 “Кировецүүд” газараа хахалжа байна. Тэрээгээрээ шулуутай газарнуудта хүдэлнэбди. Нэгэ доро табан үйлэ бүтээдэг “Кузбасс Т” гээшые мүнөө жэлэй тарилгада хэрэглэхэбди. Шэнэ техникэдэ ажалшадай һуури аятайгаар зохёогдонхой, үрэ бүтээсэнь ехэ, таршаганаха болон хүнхинэхэ шуяагүй, тооһоншье ородоггүй, - гэжэ түрүүлэгшэ тэмдэглээ.

“Хүйтэн” ажахы ургаса хуряалгаар улас дотор эрхимүүдэй нэгэн гээшэ. Һүүлэй жэлнүүдтэ ган гасуурай тохёолдоошье һаань, һайн ургаса абадаг. Жэшээнь, нёдондо 2300 тонно хуряагаа, нэгэ гектар газарһаа 19 центнер хадажа абаһан байна.

Мүнөө жэлдэ ажахынууд өөһэдынгөө нөөсэлһэн, мүн уласайнгаа ажахынуудһаа болон хүршэ можо нютагуудһаа асарһан үрэһэ тарина. Бүхы ажахынууд орооһото таряагай үрэһөөр 95 хубяар, нарин тэжээлэй үрэһөөр 90 хубяар хангагданхай. Хартаабхын үрэһэ ондоо тээһээ худалдажа абтана. Тиин мүнөө жэл сохом үрэһөөр дуталдахагүй. Дүй дүршэлтэй ажахынууд паар хахална: ерээдүйн баян ургасын үндэһэн гэжэ ойлгонхой.

- Энэ талаар дэмжэлтэ үзүүлэгдэхэ. Юуб гэхэдэ, “Хүдөө ажахынуудые болон хүдөөгэй дэбисхэрнүүдые хүгжөөлгэ” гэһэн гүрэнэй программада энэ шэглэлээр хубилалта оруулбабди, - гэжэ Буряадай Хүдөө ажахын яаманай ургамал хүгжөөлгын таһагай дарга Владимир Вахрунов мэдээсээ.

Тарилгын хаһада газар уһажуулгын талаар гүрэнэй болон уласай хэмжээнэй мүнгэн дэмжэлтэ жэл бүхэндэ үгтэдэг юм. Энэ хэрэгтэ байгша ондо 72 сая түхэриг хараалагданхай. Уһажуулгын 1087 гектар талмайтай газар ашаглагдаха түсэбтэй.

Бүхыдөө Буряад Улас дотор 70000 гектар талмайда орооһото таряа, 65000 гектарта нарин тэжээл, 12000 гектарта хартаабха, 2000 гектар талмайда огородой эдеэ ургуулхаар хараалагдана.