Мүнөөдэр, апрелиин 28-да, Улаан-Үдэдэ уласхоорондын «Байкал» аэропортдо аэровокзалай шэнэ терминалай һуури табигдаба. Энэ хэмжээ ябуулгада Ородой Холбоото Уласай транспортын сайд Максим Соколов, Буряад Уласай Толгойлогшо Алексей Цыденов болон «AEON Corporation» компаниин захиралнуудай зүблэлэй түрүүлэгшэ Роман Троценко гэгшэд хабаадаба.
«Аэропорт хадаа можо нютаг, хото бүхэндэ эгэл ехэ үүргэ дүүргэдэг. Буряад уласта энэ обьект ехэ шухала. Юундэб гэхэдэ, Буряадта аяншалга хүгжөөхэ арга боломжонууд үргэн. Аэропорт мүнөө үеын эрилтэнүүдтэ тааранагүй, тэрэнэй барилгые гансашье айлшад бэшэ, харин ажаһуугшад хүлеэнэ», - гэжэ Ородой Холбоото Уласай сайд Максим Соколов тэмдэглэбэ.
Максим Соколовой хэлэһээр, аяншалагшадай болон ажаһуугшадай эрилтэнүүдтэ шэнэ терминал тааруу байха:
«Мүнөө байһан аэропортодо орходоо, шэнэ терминалай ашаар жэл бүри харгыда ябагшадай тоо һураггүй дээшэлхэ. Терминалай, аэропортын, аэровокзалай хангалгын байгууламжа мүнөө үеын эрилтэнүүдтэ тааруулагдажа, олонда һайхашаагдаха. Саашадаа манай гүрэнэй эгээл томо авиазамай уулзуур болохо аргатай. Хоёр үлүүтэй жэлэй үнгэрхэдэ, авиазамаар аяншалагшатай баярта эндэ шэнэ терминал баригдаха».
«AEON Corporation» компаниин захиралнуудай зүблэлэй түрүүлэгшэ Роман Троценкын хэлэһээр, шэнэ теминалай ашаар, жэлдээ 2 сая хүрэтэр хүн самолёдоор ниидэхэ аргатай болохо.
«Улаан-Үдын аэропортын уласхоорондын терминал баригдаха. Бүхыдөө 20 мянган дүрбэлжэн метрэй талмайда барилга хэгдэхэ. Тэрэнэй ашаар, жэлдээ 2 сая хүрэтэр хүн самолёдоор ниидэхэ аргатай болохо. Улаан-Үдэдэ энэ ехэ тоо. Буряад Уласай Толгойлогшо Алексей Цыденовэй Байгал далайда аяншалга хүгжөөхэ, дэлхэйн Азиин гүрэнүүдэй, тэрэ тоодо Хитад, Япон, Солонгос гүрэнүүдэй, аяншалагшадай тоо олошоруулха талаар программа байгуулхада, барилдга хэжэ эхилээбди», - гэжэ Роман Троценко хэлэбэ.
Аэропортын шэнэ терминал барилгада «AEON Corporation» компаниин мүнгэ һомолно гэжэ компаниин захиралнуудай зүблэлэй түрүүлэгшэ Роман Троценкын хэлэбэ. Энэ хэрэгтэ компани 2 миилиард түхэриг һомолхо юм.
Татьяна Баженовагай гэрэл зурагууд