1576
Мүнөөдэр, апрелиин 28-да, Ородой Холбоото Уласай транспортын сайд Максим Соколов албанай хэрэгээр Буряад Уласта бууба. Үндэр тушаалта сайд манай Буряадта гурбадахияа ерэбэ. Тиихэдээ Александр Юрчик гэжэ орлогшотоёо, Агаарай транспортын федеральна агентствын хүтэлбэрилэгшэ Александр Нерадько болон «Эрхэтэдэй аэропортнуудай захиргаан» гэһэн гүрэнэй эмхиин юрэнхы захирал Юрий Жирковтой хамта Улаан-Үдэдэ буугаа. Уласхоорондын дэлисэтэй шэнэ аэровокзал Буряадай ниислэлдэ агаарай онгосонуудай ниидэлэй болон буудалай зүргэ һэльбэн шэнэдхэлгэ 2016 оной август һарада эхилээ бэлэй. Тэрэ зүргын утань 3400 метр хэмжээнэй юм. Барилгын энэ хэрэгтэ бүхыдөө 3,9 миллиард түхэриг гаргашалагдаха ёһотой. Тиигэжэ эндэ элдэб түхэлэй агаарай онгосонууд, тэрэ тоодо Boeing болон АН-124 «Руслан» гэһэн томо самолёдууд бууха аргатай болохо. Эгээл энэ зүргэ барилгын хэрэгтэй Максим Соколов нэн түрүүн танилсаба. Удаань Улаан-Үдэдэ уласхоорондын «Байгал» аэропортдо аэро-вокзалай шэнэ терминалай һуури табилганда хабаадаа. Гадна Буряад Уласай Толгойлогшо Алексей Цыденов болон «AEON Corporation» компаниин захиралнуудай зүблэлэй түрүүлэгшэ Роман Троценко гэгшэд энэ түүхэтэ хэрэгтэ оролсобо.
«Аэропорт болбол холын можо нютагуудтай болон хотонуудтай холбоо байгуулдаг ехэ үүргэтэй. Энэ объект Буряад Уласта тон хэрэгтэй. Юундэб гэхэдэ, Буряад орон үзэсхэлэнтэ һайхан байгаалитай тула аяншадай һонирхол татаһаар. Байгша аэропорт мүнөө үеын эрилтэнүүдтэ тааранагүй. Тэрэнэй шэнэлэлтэ гансашье айлшад бэшэ, харин нютагай ажаһуугшад хүлеэнхэй», - гэжэ Максим Соколов тэмдэглэбэ.
Тэрэшэлэн үшөө иигэжэ нэмэбэ: - Шэнэ терминалай ашаар жэл бүри харгыда ябагшадай тоо һураггүй дээшэлхэ. Терминалай, аэропортын, аэровокзалай хангалтын байгууламжа мүнөө үедэ зохистойгоор баригдаха. Тиигэжэ саашадаа манай гүрэнэй эгээл томо авиа-замай уулзуур болохо аргатайт. Хоёр жэлэй туршада эндэ шэб шэнэхэн терминал мүндэлхэ.
«AEON Corporation» компаниин захиралнуудай зүблэлэй түрүүлэгшэ Роман Троценкын хэлэһээр, шэнэ терминалай ашаар жэлдээ 2 сая хүн самолёдоор ниидэхэ аргатай болохо. Аэропортын шэнэ терминал барилгада «AEON Corporation» компани миллиард түхэриг һомолхо гээд, захиралынь мэдүүлбэ.
Үнинэй хүлеэгдэһэн үнэтэ хүүргэ
Ородой Холбоото Уласай транспортын сайд Улаан-Үдэдэ гурбадахи хүүргэ тодхохо талмай хараба. Буряад Уласай Толгойлогшо Алексей Цыденов хүүргэ барилгын түсэб харуулжа, тэрэнэй бэелүүлэгдэхэ болзор тухай хэлэбэ. - Хүүргэ барилгын түсэл мүнөө хэлсэгдэнэ. Хэды шэнээн мүнгэн гаргашалагдахаб гэжэ тоолоһонойл удаа мүнгэ һомологшод эли болохо. Энэ хүүргэ барилга гүрэнэй болон хубиин хэрэг эрхилэгшэдэй хабаадалгатайгаар баригдабал, хүүргээр ябаха түлбэриин ашаар хубиин эмхидэ мүнгэниинь бусаагдаха. Харин федеральна бюджедһээ мүнгэн һомологдобол, хүүргэ түлбэригүй байха. Тиимэһээ хүүргэ гаталхада, түлбэритэ байха гэжэ хэлэхэнь эртэ. Эндэ ганса хүүргэ баригдаад дүүрэшэнэ бэшэ, хоёр эрьедэ олон тээшээ шэглүүлһэн уулзуур байха, - гэжэ Максим Соколов тэмдэглэбэ.
Ородой Холбоото Уласай Юрэнхылэгшэ Владимир Путинай даабаряар Буряад Уласай ниислэл хотодо гурбадахи хүүргэ барилга бэелүүлэгдэнэ. Байгша оной май һарада конкурсын дүнгүүдээр түсэлэй түсэблэлгын гаргаша тоололгын дансануудые бэлдэхэ эмхи элирүүлэгдэхэ юм. Улаан- Үдын Октябрьска болон Железнодорожно районуудые холбохо хүүргын утань 220 метр хэмжээнэй болоно. Энэ түсэл бэелүүлгэдэ 5,5 миллиард түхэриг гаргашалагдаха гэжэ хараалагдана.
Удаань Максим Соколов Баргажан аймаг гаража, Улаан-Үдэ-Турунтаево-Хурамхаан-Шэнэ Уоян гэһэн харгын заһабарилга 230-254 модоной зайда хэгдэжэ байһании хараха гэжэ гараба. Энэ барилгада федеральна мүнгэн һанһаа 600 сая түхэриг һомологдоһон байна. - Мүнөө дээрээ Баргажан хүрэтэр ошоһон харгы заһабарилагдана. Харгы барилга хоёр шатаһаа бүридэнэ. 230-254 модоной зайда харгы барилга бэелүүлэгдэнэ. Буряад Уласай Засагай газар 270-дахи модонһоо эхилжэ, харгы һэльбэн шэнэдхэхэ талаар дурадхалнуудые бэлдээд байна. Һаядаа энэ харгыда ябахадаа, гансашье Байгалай болон оршон байгаалиин үзэсхэлэн һайхашаахаһаа гадна, автомашинаар аяншалхада зохид болохо, - гэжэ Максим Соколов уридшалан тэмдэглэбэ.
Үнгэрһэн жэлдэ энэ харгын 15 модоной зай ашаглалгада тушаагдаа гээд, Буряадай Толгойлогшо Алексей Цыденов дуулгаба. - Үнгэрһэн жэлэй һүүл багта үшөө 21 модоной зайда харгы заһабарилха тухай хэлсэһэн байна. Тиимэһээ эндэ барилга эхилэнхэй, - гэжэ уласай хүтэлбэрилэгшэ хэлэбэ. Улаан-Үдэ-Турунтаево-Хурамхаан-Шэнэ Уоян гэһэн харгыда бүхыдөө 1 миллиард 800 сая түхэриг гаргашалагдаха юм.
Анна Огороднигой гэрэл зурагууд
