1671
Мүнөөдэр, майн 3-да, Кемерово хотодо Ородой Холбоото Уласай Юрэнхылэгшын Сибириин федеральна тойрогто бүрин эрхэтэ түлөөлэгшэ Сергей Меняйлын хүтэлбэри доро суглаан үнгэргэгдэнэ. Хүн зоной олоор ябадаг газарнуудта түймэрэй аюулгүй байдал сахиха талаар зүблөөндэ Буряад Уласай Толгойлогшо Алексей Цыденов хабаадалсана.
Тиихэдэ Сибириин федеральна тойрогой можо нютагуудай хүтэлбэрилэгшэд, Ородой эрдэмүүдэй академиин Сибириин таһагай болон «Сибирское соглашение» гэһэн можо хоорондын эблэлэй түлөөлэгшэд суглаанда хабаадана.
Кемерово хотын «Зимняя вишня» гэһэн худалдаа-наймаанай, сэнгүүлгын түбтэ тохёолдоһон гашуудалта ушарай удаа эмхидхэгдэһэн шалгалтын дүнгүүд тухай Сергей Меняйло хэлэбэ. Тэрэнэй тэмдэглэһээр, арба мянган обьектнүүдэй 4500 –дань шалгалта үнгэрөө. Шалгалтын дүнгүүдээр, хүн зоной ажабайдалда аюултай эмхинүүдэй ажаябуулга тогтоохо тухай 36 хэрэг прокуратура болон сүүдтэ дамжуулагдаа.
Буряад уласта хүн зоной олоор ябадаг газарта түймэрэй аюулгүй байдал сахиха талаар шалгалтанууд апрелиин һүүл багта дүүрэһэн байна. Удаань энэ эмхинүүдтэ зааһан алдуунуудые хэр усадханаб гэжэ шалгалта эмхидхэгдэхэ. Буряад Уласай Засагай газарай аюулгүй байдалай талаар орлогшо Пётр Мордовскойн апрелиин 23-дэ тоосоһоной ёһоор, Буряад Уласта хүн зоной олоор ябадаг газарай 19,6 хубинь гү, али оройдол 43 эмхи түймэрэй аюулгүй байдалай талаар эрилтэнүүдтэ тааруу.
Мүнөөдэр Кемерево хотын «Зимняя вишня» гэһэн худалдаа-наймаанай түбтэ болоһон гэнэ усалай болоһоор 40 хоног үнгэрбэ. 2018 оной мартын 25-да болоһон түймэртэ 60 хүн наһа бараа гэжэ албан ёһоной дансануудта хэлэгдэнэ. Сибириин можо нютагуудай хүтэлбэрилэгшэд гашуудалай хэмжээ ябуулгануудта хабаадаха юм.
Анна Огороднигой гэрэл зураг
