1184
Мүнөөдэр, майн 8-да, Буряад Уласай Дотоодын хэрэгүүдэй яаман Илалтын үдэртэ дашарамдуулан митинг үнгэргэбэ.
Дотоодын хэрэгүүдэй яаманай хүтэлбэрилэгшэд, ветерануудай зүблэл болон Улаан-Үдэ хотын гарнизоной алба хаагшадай бүридхэл дайнай болон ажалай ветерануудые Агуу илалтын һайндэрөөр амаршалба. Буряад Уласай Засагай газарай Түрүүлэгшын аюулгүй байдалай талаар орлогшо Пётр Мордовской хэмжээ ябуулгада хабаадалсаа.
Сэлмэг хүхэ тэнгэри доро ажана тэнюун байдалай түлөө Эсэгэ ороноо хамгаалгын Агууехэ дайнай хүшэр байлдаануудта, ара талын хүдэлмэринүүдтэ, шархануудһаа ами наһантаяа хахасаһан хүнүүдэй дурасхаал мүнхэлжэ, хэмжээ ябуулга эхилһэн байна.
«Илалтын үдэр хадаа онсо үдэр. Гэр бүлэ бүхэндэ һүрөөтэй тэрэ жэлнүүд тухай үри хүүгэдтэ хөөрэжэ, баатар сэрэгшэдээ дурсадаг. Ород гүрэн дотор Агууехэ дайнай үедэ гэр бүлэ бүхэндэ илалта шэрээлсэһэн баатарнууд бии. Гансашье байлдаануудта бэшэ, ара талын хүдэлмэринүүдтэ – танай аша габьяа сэгнэшэгүй», - гэжэ Пётр Мордовской ветеранууд болон ажалай ветерануудые амаршалба.
Буряад Уласай Засагай газарай Түрүүлэгшын орлогшын хэлэһээр, Дотоодын хэрэгүүдэй яаманда дайнда мордоһон сагдаанараа мартадаггүй.
«Эсэгэ ороноо хамгаалгын Агууехэ дайнда, ара талын хүдэлмэринүүдтэ, дайнайшье һүүлээр шархануудһаан наһа бараһан хүнүүдээ дурсан, дурасхаалынь мүнхэлэн ябадагбди. Дайнай болон ажалай ветерануудта элүүр энхэ ажаһуухыетнай хүсэнэб», - гэжэ Пётр Мордовской тэмдэглэбэ.
Удаань хэмжээ ябуулгын хүндэтэ айлшад Илалтын хүшөөдэ сэсэгүүдые табижа, Дотоодын хэрэгүүдэй яаман хүрэбэ. Тэндэ дайнай болон ажалай ветеранууд һайндэрэй тоглолто хараба.
Буряад Уласай милициин 778 хүдэлмэрилэгшэд Эсэгэ ороноо хамгаалгын Агууехэ дайнда татагдажа, 77 хүниинь бусаагүй. Эсэгэ ороноо хамгаалгын Агууехэ дайнда эрэлхэг зориг болон баатаршалга гаргаһанай түлөө 156 хүдэлмэрилэгшэд орден, медальнуудаар шагнагдаа. Гармажап Аюрович Гармаев, Константин Владимирович Оцимик, Илья Васильевич Балдынов гэгшэд «Советскэ СоюзайГерой» гэһэн үндэр нэрэ зэргэдэ хүртэһэн юм.
Анна Огороднигой гэрэл зураг
