Һаяхана Буряад Уласай Засагай газарта гүрэнэй шагналнуудые барюулалгын ёһолол үнгэрөө. Гүрэн түрын шагналнуудта хүртэгшэдэй дунда «Нэгэдэмэл фермэнүүд» бүлгэмэй захирал Владимир Жалсараев байгаа. Уласай хүдөө ажахын хүгжэлтэдэ аша габьяатай байһанайнь түлөө Ородой Холбоото Уласай Федеральна суглаанай Федерациин Зүблэлэй Түрүүлэгшын Баярай бэшэг барюулагдаа.
Шагнал тухайгаа хэлэхэдээ, тэрэ иигэжэ тэмдэглэбэ: «Хүдөө ажахын һалбарида үнинэй хүдэлдэгшье һаа, хэжэ байһан ажалдам уридшалан үгтэһэн сэгнэлтэ гэжэ тоолоноб. Ородой Холбоото Уласай Юрэнхылэгшын майн зарлигуудые дүүргэһэнэй түлөө шагнал барюулагдаа. Улаан-Үдэдэ 75 болон 100 һууритай хүүгэдэй сэсэрлигүүдые бариһан байнаб».
Хүдөө нютагта үндыһэн Владимир Болотович хара ажалда дүршэһэн юм. Тиин бүхы наһаараа хүдөө ажахын һалбарида хүдэлөө бэшэ, барилгашье хэһэн. “Академжилстрой” гэһэн аралжаа наймаанай бэшэ нэгэдэлэй захирал ябаһан. Буряадай эрдэмэй академитэй хамта Солнечная гудамжада 198 байратай гэр бодхооһон. Улаан-Үдын Энергетик һууриндашье барилга эрхилээ.
Гэбэшье Владимир Жалсараев илангаяа хүдөө ажахын һалбарида һанаагаа зободог. Мүнөөнэйнь байдал, саашанхи хуби заяан тухайнь һанаата боложо, үнгэрһэн жэлдэ интернет сүлжээндэ бодолнуудаараа хубаалдаа һэн. Тиин эдэбхи үүсхэлтэй, эрмэлзэл ехэтэй энэ хүнтэй уулзажа, ажал хэрэгүүд тухайнь хөөрэлдэһэн байнабди.
- Владимир Болотович, жэлэй туршада ямар ажал бэелүүлэгдээ гээшэб?
- Хори аймагай Улаан-Одон һууринай саана хони үсхэхэ ажахы байгуулаабди. Улаан-Үдэдэ «Дружба» гэһэн кафе нээгээбди. Суг хүдэлдэг нүхэднай «Лимонад», «Сугтаа» гэһэн кафенүүдые нээгээ. Эдэ бүгэдэ ажал хэрэгүүд орёо, мүнгэнэй гаргаша ехэтэй. Теэд юушье хэнгүй байхада, үхэһэнтэй адли ха юм. Буряад ороноймнай аша туһада нилээд ехэ ажал ябуулагдана: зайн галай түлбэри нэгэ бага доошологдоо, харгынууд заһабарилагдана, Улаан-Үдэдэ гурбадахи хүүргэ баригдаха... Гэбэшье, минии һанахада, уласаймнай бодото хүгжэлтэ мал ажахытай нягта холбоотой. Энэ талаар асуудалнуудые шиидхээгүй һаа, урагшаа алхам хэгдэхэгүй.
- Ямар асуудалнуудые нэн түрүүн шиидхэхэ хэрэгтэйб?
- Хони үсхэбэрилхэ түрүүшын бууса 2006 ондо Ивалга аймагта түхеэрээбди. Жэл бүхэндэ 110-115 хурьгадые абажа байгаабди. Хониёо үбэлзүүлхэ, түлынь абаха, нооһо хайшалха, тарилга хэхэ, үбһэ бэлдэхэ мэтын үдэр бүриин дууһашагүй ажал. Түрүүшээр олон зоной хабаадалгатай ажалда түрэл гаралаа дуудахаш. Теэд өөрын гэр бараатай, ажалтай хүнүүд яагаад бодоод лэ ерэхэб даа. Дүтымни түрэлэй зон дүрбэн жэлэй туршада хони хараад, эсээбди, ондоо хүниие бэдэрэгты гээ. Би одоол бахардааб. Нэгэ бүлэ асархадамнай, тэдэмнай өөһэдын малтай болоод, болёо. Саһа бордоһон, һалхи шуурган, аадар бороо, ааяма халуун – ходол һанаата болохош. Мүнөө сагта хүн дулаан газарта, һунатараа хара ажал хэнгүй, хоолойгоо тэжээхэ арга бэдэрнэ. Тиимэһээ мал ажахы хүгжөөхын тула нэн түрүүн ажал хэхэ хүнүүд хэрэгтэй.
- Теэд анхан хүнүүд хүдөөдэ малаа хараад лэ, ажаһуугаа ха юм.
- Минии һанахада, аргагүйдэхэдөөл, малшад, хонишод болодог байгаа. Мүнөөнэйхидэл бэшэ, хамтын ажал хэжэ байгаа.
- Мүнөө сагта хүдөө ажахы эрхилдэг хүнүүдэй байдал хэр гээшэб?
- Мал үсхэбэрилэгшэдые нэрлэхэдэ, иимэ: нэгэ буусатай хубиин ажахы, эдэмнай хадаа хүдөөдэ ажаһуудаг ёһотой фермернүүд болоно; олзын хэрэг эрхилэлгын хэдэн һалбаряар ажал ябуулагшад; анханай колхозууд, мүнөө тэдэ хубиин колхозууд болонхой. Бүхы эдэ ажахынуудта малшад дуталдадаг. Ехэнхидээ байха газаргүй, гэр бүлэгүй ганса хүнүүд малай хойноһоо ябана. Зомнай иимэ ажал эрхилхэеэ ехэ хүсэнэгүй. Гансал эдеэ хоол, хубсаһа хунарай болон багахан салингай түлөө хүдэлнэ. Юуб гэбэл, мал ажахыда амаралтын үдэр гэжэ байдаггүй ха юм. Жэлэй дүрбэн сагта үнөөхил малаа хаража, үдэр бүхэндэ аргагүй ехэ ажал хэхэ хэрэгтэй. Шубуу, гахай, зарим мал үсхэбэрилгын ажахынуудта оньһон хэрэгсэлнүүдэй ашаар ажал ябуулагдадаг болоо. Теэд иимэ аргаар хони үсхэбэрилхэдэ, гаргашань ехэ, үнэтэй болохо.
- Гүрэн түрэмнай ямар шиидхэбэринүүдые абаха ёһотойб?
- Хүдөө нютагуудай хооһоржо, тала дайдын хаягдахада, гүрэндэ аша үрэтэй бэшэл даа. Ажаһуугшадые эдеэ хоолоор хангалгын асуудал эндэ онсо байна ха юм. Илангаяа анхан сагһаа мал ажал эрхилжэ байһан буряад угсаатанда хамаатай. Теэд хаанаһаа мал хараха хүнүүдые олохо гээшэб? Хүршэ Монгол гүрэндэ мянган малтай хүнүүд хүндэтэй юм. Малшадые, хонишодые хүдөө ажахын һалбариин бусад хүдэлмэрилэгшэдһөө илган, хүнгэлэлтэнүүдые үзүүлхэ, сэрэгэй албанһаа хойшолуулха, үри хүүгэдэйнь ехэ һургуулида ороходо, хүнгэлэлтэ үзүүлхэ, ипотекыень түлэлсэхэ, ажал эрхилжэ эхилхэдэнь, нэгэ доро горитой мүнгэн тэдхэмжэ үзүүлхэ, наһанайнгаа амаралтада гарахадань, һайн пенси түлэхэ - уластамнай иимэ ажал ябуулха шухала. Энэ асуудал шиидхэхын тула хүдөө нютагуудые болон хүдөө ажахы дэмжэлгын гүрэнэй программа хэрэгтэй. Фермэнүүдые, оньһон хэрэгсэл болон мал худалдажа абахаар һаань, ажал хэхэ хүнүүдые худалдажа абахын аргагүй ха юм.
- Владимир Болотович, асуудалнуудтамнай харюусаһандатнай һай- ниие хүргэнэбди. Ажал хэрэгүүдтэтнай амжалтануудые хүсэнэбди.