​Залуу халаан ветерануудта туһална

Илалта шэрээлсэһэн аха захатан үсөөн боложо байһаар. Мүнөө үеын ажаһуугшад тэдээндээ тон ехээр анхаралаа хандуулха ёһотойбди гээд, Совет үедэ шэнги үндэр наһатайшуулда залуу халаан туһална.

Хоринск һууринда нэмэлтэ һуралсалай түбэй дэргэдэ “Альтер­натива” гэһэн волонтёрско бүлгэм амжалтатайгаар хүдэлжэ байдаг. Тэдэ олон шэглэлээр ажалаа ябуулна гээшэ. Бүлгэмые хүтэлбэрилдэг Лай­жит Дашанимаевагай хэлэһээр, эгээл буянтай хэрэг хадаа ветерануудта туһаламжа үзүүлгэ болоно гээшэ.

- Агууехэ дайнда хабаадаһан мүнөө дээрээ элүүр мэндэ сэрэгшэд тухай баримтата фильм буулгаабди. Дайнай үедэ үдэр һүнигүй хүдэлжэ, илалта шэрээлсэһэн аха захатанай һанамжанууд, һонирхолтой, гашуудалтайшье хөөрөөнүүд фильм соо оруулагдаа. “Живая память!” гэһэн манай бүтээлые олон зон хүлеэн абаа, - гэжэ Лайжит Дашанимаева хөөрэнэ.

Энэ буянтай хэрэг Хоринск һууринай 1-дэхи болон 2-дохи һургуулинуудай шабинар бүтээлсэһэн байна.

Кабанскын һургуулиин 7-дохи ан­гиин һурагшад үнгэрһэн жэлэй эхин­дэ волонтёрнууд болоһон байна. Тэдэ нэн түрүүн ветерануудта туһаламжа үзүүлээ.

- Нёдондо манай һургуули дүүргэһэн 11-дэхи ангиин һурагшад минии үхибүүдтэ ерэжэ, волонтёр бо­лохыемнай дурадхаа һэн. Тэдэ бүхы ажал тухайгаа хөөрэжэ, бидэниие һонирхуулаа. Яагаад ветерануудта туһа хүргэхэб, хайшан гээд тэдээнтэй хөөрэлдэхэб гэжэ байгаад ойлгуулаа. Сентябриин 1-һээ бидэ ветерануудта, дайнай үеын хүүгэдтэ ошожо, гэрэй зосоохи ба газаахи ажалыень хэлсээбди. Мүн тиихэдэ хүшөөнүүдэй хажуугаархиие бог шоройһоо сэ­бэрлэнэбди, - гэжэ 7-дохи ангиин хүтэлбэрилэгшэ Валентина Рюмкина хөөрэнэ.

Бэшүүр аймагай Окино-Клю­чи һууринай һургуулиин захирал Лейла Корнева шабинараа өөрөө дахуулжа, волонтёрско бүлгэм байгуулһан байна.

Нэн түрүүн үхибүүдээ нютагайн­гаа аха захатантай хөөрэлдүүлээб. Юуб гэхэдэ, тэдэ хүндэ дайнай үе, һүүлээрхи жэлнүүд тухай хөөрэжэ үгөө. Яагаад бэе тамирайнгаа хойноһоо хаража байгааб, ямар спортын зүйлөөр һорилго хээб гэхэ мэтын асуудалнуудые эдэ уулзалга­нуудай үедэ үндэр наһатайшуулда манай һурагшад табиһан байна. Тиигэжэ ахамад ангиин үхибүүд эхин ангиин хүбүүд, басагадтай хүдэлжэ эхилээ. Багашуулдаа ахашуул жэ­шээ харуулан ойлгуулаа. Юуб гэхэдэ, тэдэ ургажа ябана ха юм. Тиимэһээ яагаад аха хүнүүдээр хөөрэлдэхэб, тэдээндэ хайшан гээд хандахаб гэжэ мүнөөнһөө мэдэжэ абаха ёһотой, - гэжэ Лейла Корнева хөөрэнэ.

Түнхэн аймагай Зүүн Мүрэнэй һургуулида волонтёрско бүлгэм байгуулагданхай. Тэндэхи волон­тёрнууд нютагайнгаа ветерануудта туһалхаһаа гадна, Совет үедэ пионернүүд яагаад хүдэлдэг байгааб гэжэ һуража абаһан байна.

Манай һургуулида хэдэн бүлэг во­лонтёрнууд хүдэлнэ. Зариманиинь ветерануудтай дүтын харилсаа хол­боотой. Нүгөө заримашуул элүүр энхэ ябахын түлөө һанаата болоно. Маанадай ажал хараһан бага ангиин хүбүүд, басагад баһа волонтёрнууд болохоо һанана. Тиимэһээ бидэ тэ­дээндэ дайнда хабаадаһан теэбии таабайнууд тухай хэшээлнүүдтэнь хөөрэжэ үгэнэбди. Мүн тиихэдэ аха зоной элүүр энхын журам сахилгые жэшээ болгон харуулнабди, - гэжэ 8-дахи ангиин һурагша Анастасия Едакова хөөрэнэ.

Иигэжэ залуушуул ёһо занша­лаа алдангүй, аха захатанайнгаа хойноһоо харалсажа байһандань баярламаар байна. 

Авторай гэрэл зураг