Эхин шата. Олег Калиберов (54) түрүүлнэ
Майн 6-да Улаан-Үдэ хотын түб үйлсөөр хүнгэн атлетикээр эстафетэ үнгэргэгдэбэ. Заншалта ёһоороо манай “Буряад үнэн” Хэблэлэй байшанай шангуудта хүртэхын түлөө хабаадагшад урилдаа бшуу. Мүнөө жэл тус хэмжээ ябуулга 72-дохиёо эмхидхэгдээ гээд һануулая.
Һүүлэй хэдэн жэлдэ манай заншалта хэмжээ ябуулгада хабаадагшадай тоо доошоо орожо эхилээд байгаа. Нёдондо 55 команда мүрысөө бэлэй. Урилдаан 10 шатаһаа бүридэнэ гээд тоолоо һаа, 550 хүн эстафетэдэ оролсоо гээшэ. Мүнөө жэл энэ тоо гансата ургаба. 81 команда байгуулаад, 810 хүн гүйлдэбэ.
“Буряад үнэн” Хэблэлэй байшанай захирал Баяр Балдановай хэлэһээр, Буряадта ямаршье спортын хэмжээ ябуулга иимэ олон жэл соо эмхидхэгдэнэгүй. Тиимэһээ тус эстафетын һүлдэ тэмдэгые үргэжэ ябаха хэрэгтэй. Мүрысөөндэ олон хүниие хабаадуулжа, һонирхол татахын түлөө яһала ехэ ажал хэгдээ гэжэ һанагдана. Нэн түрүүн шангынь һэлгэгдээ. Юуб гэхэдэ, команда бүхэндэ хабаадаһанай түлөө Хүндэлэлэй грамота үгтөө. Шангай һуури эзэлһэн хүн бүхэндэ грамотаһаа гадна гарай тусхай бэлэг барюулагдаа.
Оройдоол шэнэ жэлэй һүүлээр байгуулагдаһан спортын хэмжээ ябуулгануудые үнгэргэлгын түб энэ урилдаа эмхидхэлгэдэ ехэ хубитаяа оруулаа. Түбэй захирал, хүнгэн атлетикээр спортын мастер Татьяна Белякова (Соболева) хэдэн дахин эмхидхэлэй суглаа зарлажа, эстафетэ үнгэргэлгын бүхы асуудал хараалжа үзөө. Иимэ ажалай ашаар хэмжээ ябуулга үндэр хэмжээндэ үнгэргэгдөө гэжэ хэлэхэ хэрэгтэй.
72-дохиёо боложо байһан энэ хэмжээ Буряад Уласай спортын болон залуушуулай бодолгын талаар сайд Вячеслав Дамдинцурунов гансата дэмжэжэ, туһа хүргөө. Майн эхин үдэрнүүдтэ сайд Дагестанда албанай хэрэгээр Европын чемпионадта ошоһон байна. “Буряад үнэнэй” эстафетэдэ хабаадахаяа самолёдһоо бууһаар лэ, шууд Соведүүдэй талмай ерээ.
- Энэ эстафетэ түүхэдэ оронхой. Олон жэлдэ залуушуулые, ургажа ябаа залуу халааниие бэеын тамирай талаар хүмүүжүүлнэ, спортдо һонирхол татуулна. Энэ хэмжээ ябуулга майн 9-эй урдахана болоно ха юм. Энэнь баһа ехэ удхатай, - гэжэ Вячеслав Дамдинцурунов нээлгын баяр ёһололдо тэмдэглээ.
Мэдээжэ тамиршадта харгы нээһэн “Буряад үнэнэй” зүргэнүүд
Мүнөө дээрээ Буряадай хүнгэн атлетикээр түрүү нэрэтэй тамиршад нээлгын баяр ёһололой үедэ туг үргэһэн байна. 2018 оной ехэшүүлэй дунда үбэлэй чемпионадта түрүү һуури эзэлһэн Николай Вербицкий, 2018 оной залуушуулай дунда Ородой чемпион Сергей Соловьёв, 2017 оной залуушуулай дунда Ородой чемпионадай хүрэл медаль абагша Анна Ксенофонтова гэгшэд энэ үйлэ хэрэг бүтээгээ. Иигэжэ тэдэ манай эстафетын үшөө нэгэ заншал үргэлжэлүүлбэ гээшэ. Юуб гэхэдэ, эстафетэдэ Буряадай бүхы түрүү тамиршад хабаадажа, удаадахи ехэ амжалтануудайнгаа эхи табиһан байна. Надежда Мироманова (Виноградова), Павел Яковлев, Наталья Соломинская, Татьяна Позднякова, Геннадий Темников болон бусад мэдээжэ хүнгэн атледүүд эндэ түрүүшынгээ алхамуудые хэһэн байна.
Николай Вербицкий болон Сергей Соловьёв
Эстафетын түүхэ ираад үзэбэл, эмхидхэлгынгээ талаар элдэб хубилалтануудые гараһан байна. Нэгэ үедэ Соведүүдэй талмайһаа Элеватор хүрэтэр урилдаан бологшо һэн. Олон жэл соо Ленинэй нэрэмжэтэ гудамжаар сэхэ доошоо Гэгээн Одигитриин һүмэ хүрэтэр хабаадагшад гүйлдэдэг бэлэй. Мүн тиихэдэ хэдэн жэлдэ Соведүүдэй талмай тойроод урилдаан боложо эхилээ. Эгээл энэ үеһөө хабаадагшадай тоо эгсэ доошолоо гэжэ хэлэхэ хэрэгтэй. Мүнөө үедэ урилдаанай зүргэ Илалтын проспектээр хэгдэнхэй. Буряад Уласай Дотоодын хэрэгүүдэй яаманай харгы дээрэ аюулгүйе сахилгын таһагай хүдэлмэрилэгшэд харгы хаажа, дааһан үүргэеэ олон жэл соо һайнаар дүүргэнэ.
Һургуулиин шабинар дуратайгаар гүйлдэнэ
Эстафетэ заншалта ёһоороо табан урилдаанһаа бүридөө. Юһэн жэлэй болон тусхай һуралсалай гуламтанууд хэмжээ ябуулгые нээһэн байна. Эндэ 28-дахи санаторно интернат-һургуулиин шабинар хүбүүдэй болон басагадай хоёр бүлэгтэ илалта туйлаба гээшэ. Энэ интернат-һургуули хоёр-хоёр команда табиһандань баярые хүргэхэ байнабди.
Хоёрдохи урилдаанда дунда һургуулинуудай басагад хабаадаба. Энэ бүлэгэй түрүүшын шатада нэгэдэхи һуури эзэлһэн тамиршанда тусхай шан барюулагдаа. Мүнөө жэл 49-дэхи һургуулиин шаби Ксения Зубакина түрүүлжэ гараа. Ксения хадаа тамаралгаар юһэн жэлэй хугасаада бэеэ һоридог юм. Мүнөө үедэ Ородой спортын мастер боложо шаданхай.
Ксения Зубакина
“Тамарагшад гүйлдэдэггүй гэжэ хэлсэдэг. Энэ буруу. Бидэ баһа гүйлдэжэ, тамархынгаа урда бэеэ заһадагбди, - гэжэ Ксения Зубакина хөөрэнэ. - Ши тамиршан хадаа һургуулиинга түлөө гүйхэ байгааш гэжэ багшанарай нэгэ дахин хэлэхэдэ, иимэ эстафетэнүүдтэ хабаадажа эхилээб. Мүнөө хоёрдохи жэлээ түрүүшын шатада шүүжэ гарааб”.
Нэгэдэхи шатада түрүүлһэн Ксения Зубакинатай адли 49-дэхи һургуулиин бусад басагад гүйлдэжэ шадабагүй. Нёдондо түрүүлһэн энэ команда мүнөө жэл хоёрдохи һуури эзэлбэ. Тэдэниие хүсэһэн 42-дохи һургуулиин шабинар чемпионой нэрэ зэргэдэ хүртөө. Гурбадахи һуурида 65-дахи һургуули гараа. Энэ һургуулиинхид эстафетэ бүхэндэ шангай һууринуудые эзэлдэг заншалтай.
Гурбадахи урилдаан эгээл олон хабаадагшадые суглуулаа. Эндэ дунда һургуулинуудай хүбүүд гүйлдэбэ. 51-дэхи һургуулиин шаби Олег Калиберов нэгэдэхи һуурида гараа.
- Эхинһээ абаад, бусадһаа түргөөр гүйжэ ябадаг заншалтайб. Нэгэ бага үлэшэбэл, ондоо тамиршадтай түлхилсэжэ, сагаа алдахаш. Мүнөөдэр энэ түсэбтөө хүрөөб. Харин финишэй урдахана 42-дохи һургуулиин минии нүхэр Женя Дровосеков намай хүсэн алдаа, - гэжэ Олег Калиберов хөөрэнэ.
Олег хадаа зургаан жэл соо Евгений Спиридоновой ударидалга доро һорилго хэдэг байна. Мүнөө үбэл Ородой чемпионадта ошожо, яһала һайн дүн харуулаа. 2018 ондо тэрэ спортын мастерта кандидат болохо һанаатай.
Олег Калиберовай 51- дэхи һургуулиин нүхэд энэ урилдаанда гурбадахи һуури эзэлээ. 42-дохи һургуулиинхид - нэгэдэхи, 49- дэхи һургуулиин шабинар - хоёрдохи һууринуудта гараа.
Аха захатаншье урилдаа
Һүүлшын хоёр урилдаанда бусад хабаадагшад оролсоо. Дунда болон дээдэ һуралсалай гуламтануудай оюутадтай адли аха захатан гүйлдэжэ, жэшээ харуулаа.
Буряадаймнай урдаа хараха тамиршад Николай Вербицкиин болон Анна Ксенофонтовагай түрүүшын шатада нэгэдэхи һуурида гараһандань гайхалгүй. Эдэ хоёр бусадһаа холо үлүү байһанаа дахинаа гэршэлээ. Түрүү тамиршаднай манай эстафетэһээ зунайнгаа халаанда бэлдэжэ эхилбэ гээшэ.
Анна Ксенофонтова (зүүн гарһаа) дамжуулна
Буряадай гүрэнэй ехэ һургуулиин оюутад дахинаа чемпионууд болоһон байна. ВСГУТУ-гай тамиршад шангай хоёрдохи һуурида гараа.
Дунда мэргэжэлэй һуралсалай гуламтануудай дунда Уласай олон түхэлэй колледжын басагад болон технологическа колледжын хүбүүд нэгэдэхи һууринуудые эзэлээ.
Ажалша коллективүүдэй дунда хоёр түрүү һуури 14-дэхи ТГК-гай команданууд эзэлээ. Спортын байшануудые ашагладаг дирекци болон ВСГУТУ-гай багшанар энэ бүлэгтэ анха түрүүшынхиеэ хабаадажа, шангай һууринуудта гараа.
Байгша ондо анха түрүүшынхиеэ сэрэгэй частьнуудай болон Дотоодын хэрэгүүдэй таһагай команданууд хабаадаһан байна. Эдэнэрэй дунда эстафетын бүхы шатада эгээл шанга тулалдаан болоһон байна. Түрүүшын һуури – 46108 сэрэгэй часть, хоёрдохи һуури - 11-дэхи гвардейскэ десантна бригада, гурбадахи һуури – Дотоодын хэрэгүүдэй яаманай спецназай «Гром» команда эзэлээ.
Олониитын эмхинүүдэй дунда үнгэргэгдэһэн мүрысөөндэ «Гүй, Улаан-Үдэ, гүй» гэжэ эмхиин түлөөлэгшэд түрүүшын һуури эзэлээ. Буряад Уласай хүнгэн атлетикээр ветерануудай команда хоёрдохи һуурида хүртөө. Хоёрдохи һуури эзэлэгшэдые Арадай Хуралай һунгамал Михаил Гергенов суглуулаа гээд һануулая.
Удангүй манай “Буряад үнэн” сониной байгуулагдаһаар 100 жэл болохонь. Тиигэжэ 2021 ондо эстафетэ 75-дахияа үнгэргэгдэхэ. Тиимэһээ манай урилдаанда олоороо хабаадажа, бүхы Буряадай, илангаяа “Буряад үнэнэй” эдэ баярнуудые олон хүн хубаалдаха бэзэ гээд найдагдана.