Вандан Будаев
Барай дабааниие гаталхатай сасуу бүрхэжэ, тэнгэриин хаяаһаа гэнтэ мүндэр шэнги монсогор саһаханууд орожо эхилбэ. Олониие суглуулжа, хэмжээ ябуулга үүсхэхэдэ, саһатай, али гэбэл бороотой үдэр тудабал, ехэ һайн тэмдэг гээд, урданай буряадууд хэлсэдэг бэлэй. Саашанхи зам сэбэрлээд үгэхэ гэһэн удхатай ха. Эгээл тиимэһээ Түгнын “Даша Чойнхорлин” дасанда шэрээтын шэрээдэ Вандан ламын залагдаха үдэр, апрелиин 29, саһатай байһаниинь һайшаалтай. Гэбэшье үдын хойно наран бултайжа, гансата газар дэлхэй сэлмээ бэлэй.
Түгнын талада эгээл түрүүн һэргээгдэн бодоһон Харгааһата нютагай дэргэдэхи Түгнын түб дасанда һүүлэй жэлнүүдтэ шэрээтэнэр үргэлжэ һэлгэгдэжэ байгаа. Ламанарай тэндэ хуралнуудые хурахань хоморой болонхой һэн. Тиимэһээ Буддын шажанай заншалта Сангхын Бандида хамба лама Дамба Аюшеев Ивалгын дасанай Жуд дуганай лама Вандан Будаевые Түгнын дасан руу энэ жэлэй эхин багаар эльгээгээ. Эдэбхитэй залуу ламбагай Түгнын дасанда түбхинэхэтэеэ сасуу нютагай зонтой эбээрээ хэлсэжэ, дасанай дэргэдэхи хуушаржа үмхи болоһон гэрнүүдые шэнэлхэ, дасанай дотор талыень дулаалха гэхэ мэтын эмхидхэлэй ажал эрхилһэн байна. Гадна хуралнуудаа үргэлжэ хуража байгаа. Тиихэдэнь гар утаһанай Вайбер гэжэ сүлжээндэ нютагаархин тусхай бүлэг байгуулаад, үргэлөө даадхаһанаа мэдүүлжэ байгаа. Ороһон мүнгөөр Вандан Будаев барилгашадай зэбсэг худалдажа абаа, хоол баридаг газарай орой шэнэлээ, Согшон дуганай дотор талыень шабуулаа...
Харин шэрээдэнь һуулгаха ёһололой урдахана аймагай захиргаанай хүдэлмэрилэгшэд, Галтай, Хошуун-Үзүүр, Нарһата, Боом, Хүсөөтэ болон бусад нютаг һууринуудһаа ажаһуугшад дасанаа хүрэжэ, субботнигуудые хэһэн байна. Харин нютагаархинай омогорхол дүүрэнээр “манай Гэсэр” гэдэг фермер Илья Гармаев, мүн Базаржап Гомбоев, Баясхалан Дугаржапов, Цыденбал Цыбиков гэгшэд дасанай шэрээтэдэ шэнэ гэр бодхообо. Энэ гэрэй евро-сонхонуудые Буряад Уласай Арадай Хуралай һунгамал Зоригто Цыбикмитов абажа үгөө. Тиихэдэ 110 хони нютагай фермернүүд дасандаа даадхаа.
11.00 сагһаа Түгнын түб дасанда хурал эхилээ. Вандан Будаевые Түгнын түб дасанай шэрээтын санда баталһан Бандида хамба лама Дамба Аюшеевэй гар табилгатай зарлиг дид-хамба Дагба Очиров уншаба. Тэрэшэлэн ламанар мандала бэлэглээ. Дасанай жиндагууд хадагуудые шэрээтэдээ баряа.
Буряад Уласай Толгойлогшын орлогшо – Буряад Уласай Толгойлогшын болон Засагай газарай Захиргааниие ударидагша Баир Цыренов, Буряад Уласай Арадай Хуралай һунгамалнууд Бата Семёнов, Зоригто Цыбикмитов, Мухар-Шэбэр аймагай засаг дарга Владимир Молчанов болон сомонуудай дарганар энэ хэмжээндэ хабаадаа. Дамба-Даржаа Заяевай нэрэмжэтэ Буддын шажанай ехэ һургуулида Вандан Будаевтай суг һураһан нүхэдынь, дасануудай шэрээтэнэр мүн лэ оролсоо.
Түгнын талада батаар түбхинэхэмни, даажа абаһан дасанаа үргэхын тулада оролдохоб гээд, Вандан Будаев олоной урда хэлэһэн байна. Хүгжэлтын талаар олон тоото түсэбүүдтэй шэнэ шэрээтэдээ амжалта хүсэе!