Буряад Уласай хүгжэлтэдэ аяншалгын һалбари горитой ехэ нүлөө үзүүлхэ ёһотой. Буряад Уласай Толгойлогшо Алексей Цыденовэй дэргэдэхи Аяншалга хүгжөөлгын зүблэлэй үсэгэлдэр үнгэрһэн ээлжээтэ зүблөөн дээрэ иимэ зорилго табиха тухай хэлэгдээ.
- Аяншалга хүгжөөлгын ашаар уласай бюджедтэ олзо оршын хэмжээн жэл бүри дээшэлхэ болоно. Гадна ажалта һууринууд байгуулагдаха. Гэхэ зуура, зүб мүрөөр нютаг дээрээ аяншалга хүгжөөхэ, богони болзор соо үрэ дүнтэйгөөр ажал ябуулха шухала, - гэжэ Алексей Цыденов онсолон тэмдэглээ.
Буряад Уласай Толгойлогшын хэлэһээр, аяншалга гээшэ юрын үйлэ хэрэг бэшэ, харин уласай хүгжэлтын үндэһэн боложо үгэхэ ёһотой.
Дүрбэ һарын туршада хэгдэһэн ажал хэрэгүүдэй тоосоо Аяншалгын яаманай сайд Мария Бадмацыренова зүблэлэй зүблөөн дээрэ хэбэ. Сибириин болон Алас Дурнын аяншалгын ажал эрхилэгшэдтэ мэдээсэлэй турнуудые дурадхаһан байха юм. Тэрэ хэмжээнэй дүнгөөр “Туи-Тревел” гэһэн уласхоорондын аяншалгын эмхитэй суг ажал ябуулха тухай хэлсээ баталагдаа. Хүүгэдэй аяншалгын “Минии Ород гүрэн” гэһэн программа бэелүүлдэг можонуудай тоодо Буряад Улас оронхой. Тэрэнэй шугамаар Буряад руу гүрэнэй түб можонуудһаа болон Ураалһаа октябрь - ноябрь һарануудта 1000 гаран эдир аяншалагшад ерэхээр хараалагдана.
Гэхэ зуура, “Байгалай домогууд” гэһэн түсэл гүрэнэй дэмжэлтэдэ хүртөө.
Аяншалга хүгжөөлгын талаар ажал ябуулхадаа, нэн түрүүн хэдэн бэрхэшээлнүүдые дабаагүй һаа, энэ хэмжээн дүүрэнээр бэелүүлэгдэхэгүй гэжэ мэдээжэ.
Нёдондо жэлэй тоо бүридхэлөөр, Буряадта 473 мянгаад аяншалагшад амараа. Энэ болбол ганса эмхинүүдэй бүридэлдэ абтагдаһан зоной тоо баримта мүн. Аяншалга һайнаар хүгжөөхын тулада тааруу оршон байдал зохёохо шухала. Эндэ нэн түрүүн бог шоройн асуудал тобойн гарана.
- Байгалай эрьеэр болон аяншалгын харгы замаар хаяатай нобшо ноохой амаржа ябаһан аяншалагшадта муу бодол түрүүлнэ. Энэмнай ажаһуугшадай болон олзын хэрэг эрхилэгшэдэй өөһэдын соёл гэршэлнэ. Аяншалгын талаар олзын хэрэг эрхилэгшэд саг соогоо бог шоройгоо сэбэрлэнэгүй. Нобшо суглуулха, усадхаха ажалай түлөө нютагай өөһэдын хүтэлбэри харюусанагүй. Харин хаягдаһан нобшо саг соо суглуулаагүй һаа, яла ашагдаха гэжэ гансал сүүдэй зарганууд харуулна, - гэжэ аяншалгын сайд мэдээсэбэ.
Буряад Уласай аяншалгын сайд Мария Бадмацыренова
Гадна Мария Бадмацыреновагай тэмдэглэһээр, аяншалгын талаар олзын хэрэг эрхилэгшэдтэ нобшо ноохой суглуулжа, үгы хэхэ хэрэгтэ гаргашалагдаһан мүнгэн зөөринь бусаагдаха болоо. Тусхай хэлсээ баталагдажа, иимэ ажал ябуулһан тухай гэршэлэгдэбэл, 300 мянга хүрэтэр мүнгэн тэхэрюулэгдэхэ юм. Нютагай байгууламжануудай аяншалгын байра байдал түхеэрбэлнь, болбосоруулһан талмайнуудые барибалнь, Аяншалгын яаман баһал мүнгэн зөөреэр дэмжэхэ юм.
Аяншалгын газар руу ошодог харгы замуудай хажуугаар хаягдаһан нобшо арилгаха талаар Буряад Уласай Ойн ажахын болон харгын яаман харюусалга абажа, Аяншалгын яамантай суг ажал ябуулха тухай сайд дурадхаба. Богтой тэмсэлгын талаар хэдэн дурадхалнууд оруулагдаа. Тиихэдэ аяншалагшадые байлгадаг үмсын гэр байранууд бүридхэлдэ абтагданагүй. Тиимэһээ захиргаанууд шалгалта хэжэ, аяншадые хүлеэн абадаг зониие шангалха ёһотой.