Буряад Уласай ойн ажахын һалбариин асуудалнуудые шиидхэлгэ, удаан болзорой мүнгэ зөөри оруулалгын түсэлнүүдэй аша үрэ, ой ашаглаха һалбарида олониитын хиналта – эдэ болон бусад амин шухала асуудалнуудаар Буряад Уласай Толгойлогшо майн 14-дэ сурбалжалагшадтай уулзалга үнгэргөө.
Ой модон хулгайгаар отологдоно
Алексей Цыденовэй хэлэһээр, ой модон хуули бусаар отологдоно. «Жэлэй туршада 10 сая кубометр модо отолхо аргатайбди, харин бодото дээрээ 3 сая кубометр бэлдэгдэнэ. Тиихэдэ ехэнхи ушарта нарһан сабшагдана. Шэнэһэн 5-6 хуби болодог», - гэжэ уласай хүтэлбэрилэгшэ тэмдэглэбэ.
Мүнөө Буряад орондо «Ой модо үйлэдбэрилгэ, болбосоруулга» гэһэн шэглэлээр 1449 эмхи бүридхэлдэ абтанхайшье һаа, оройдоол хахадынь ажалаа эрхилнэ.
«Хуулиин ёһоор ажалаа ябуулдаггүй олзын хэрэг эрхилэгшэд уласай һанда налог татабари түлэдэггүй, хуулита ажалай һууринуудые байгуулдаггүй. Үнгэрһэн жэлдэ кубометр модоной түлөө дунда зэргын сэн Шэтэ можодо 128 доллар, Эрхүүдэ - 132 доллар, Буряад Уласта 63 доллар байгаа. Энэ хадаа хулгай болоно. Модо бэлдэгшэд модо худалдахадаа, мүнгэ гартаа абажа, ямаршье татабари түлэнэгүй, хуулиин ёһоор хүнүүдые ажалда абанагүй», - гэжэ Алексей Самбуевич хэлэбэ.
Хүнүүдэй гэмэлтэхэдэ, ажалаар хангагша тэдэнэй түлөө харюусанагүй. Зон ажалда ороһон дансагүйгөөр хүдэлхэ баатай болоно.
Тиихэдэ хуули бусаар отологшод модоной үлэгдэлнүүдые усадхадаггүй, модо тариха талаар ажал ябуулдаггүй. Тиимэһээ ойн түймэрнүүд гарана, модонууд хатана.
«Манай зорилго - ойн жаса гуримтай болгохо. Нэгэдэхеэр, модо бэлдэдэг эмхинүүд хуулиин ёһоор ажалаа ябуулха ёһотой. Тиигэбэл ой сэбэрлэхэ, модо тариха, ажалай һууринуудые байгуулха юм. Ойдо хуули эбдэһэн ушарта ойн харуулшад харюусаха”, - гэжэ Алексей Цыденов хэлэбэ.
Түлбэритэ юумэн гамтай байдаг
Ой модо бэлдэхэ, үйлэдбэрилхэ һалбарида хүдэлдэг эмхинүүд хэлсээнэй ёһоор ажалаа ябуулдаг юм. Юуб гэхэдэ, хэлсээнэй али нэгэ хубида дүрим эбдэбэл, хэлсээн болюулагдадаг. Тиимэһээ ой модо хүлһэлжэ, түлбэритөөр ашаглагшад ойн түймэрнүүдые һэргылхэ, модо тариха талаар ажал хэхэ ёһотой.
«Ой модо түлбэритөөр ашаглаха хэлсээнэй эрилтэнүүд нилээд шанга юм. Энэ шэглэлээр ажал ябуулха гэбэл, модо үйлэдбэрилгэдэ мүнгэеэ оруулһанай удаа ой ашаглаха аргатай. Гадна ажалшадтаа салин түлэхэ, тайрадаһануудые болон бусад үлэгдэлнүүдые усадхаха, модо тариха ёһотой юм», - гэжэ Буряадай Толгойлогшо тайлбарилба.
Мүнөө ойн һалбарида Сэлэнгын ЦКК-гай болон «МТК-Дженькей» компаниин мүнгэ зөөри оруулха талаар түсэлнүүд түрүүдэ тоологдоно. Үшөө гурбан түсэл бэлдэгдэжэ байнхай юм.
Тиихэдэ мүнгэ зөөри оруулагшадай болон ажаһуугшадай эрхэ дүүрэн сахиха хэрэгтэй гэжэ Алексей Цыденов онсолоо. «МТК-Дженькей» компани «Буряад Уласта ойн ажахы болон ой модоной үйлэдбэри хангаха байгууламжын комплекс» гэһэн түсэл бэелүүлхэ. Тиигэжэ 753 сая түхэриг оруулха түсэбтэй. Шэнэһэн модо бэлдэлгэдэ Захаамин гү, али Ярууна аймагта ой модон түлбэритөөр ашаглалгада тушаагдаха юм. Хитадай компани завод барилгада 32 сая түхэриг һомолонхой.
«Энэ талаар олон асуудалнууд гарана. Ярууна аймагай ажаһуугшадта мүнгэ зөөри оруулалгын түсэлэй удха, энэ компанида ямар эрилтэнүүд табигданаб гэжэ тайлбарилжа үгэхэбди. Тиимэһээ ой ашаглагшадые дэмжэжэ, энэ баялигаа зүбөөр хэрэглэжэ эхилхээр болоо», - гэжэ Алексей Цыденов хэлэбэ.
Зүбшөөгдөөгүй хэмжээн – арадай аша туһада бэшэл
«МТК-Дженькей» компани Захаамин аймагта ой модо бэлдэхэнь гэжэ, энэ шиидхэбэриие буруушаажа, ой модо аршалагшад майн 14-дэ Улаан-Үдэ хотодо хуулита бэшэ хэмжээ ябуулга үнгэргэһэн байна.
Энээн тухай уласай хүтэлбэрилэгшэ иигэжэ хэлэбэ:
«Байгша ондо Буряад Уласай Арадай Хуралай һунгамалнууд, Захаамин аймагай засаг дарга һунгагдаха. Тиимэһээ зарим хүнүүд тохёолдоһон байдал һамбаашалжа, өөрынгөө тала хараһан байна. «МТК-Дженькей» компанитай хэлсээн баталагданхай гэжэ үнинэй мэдээжэ. Теэд энэ асуудал мүнөө һунгалтын лэ урда гаража ерэбэ. Ажаһуугшадай ой модоёо, байгаалияа аршалха гэһэн үнэн сэхэ эрмэлзэл заримашуул хэрэглээ. Энэ ябадал хэн үүсхээб гэжэ мэдээжэ. Бидэ тэдэниие хараадаа абанхайбди».
Захаамин аймагта ой модо аршалха олониитын зүблэл байгуулагдаха
Майн 11-дэ Буряад Уласай Засагай газарай түлөөлэгшэд Захаамин аймагай ажаһуугшадтай уулзаһан байна. Уулзалгын дүнгүүдээр, Ой модо аршалха олониитын зүблэл байгуулха шиидхэбэри абтаа. Алексей Цыденов энээнииень бүри мүһэн дэмжэһэн байна.
Зүблэлэй бүридэлдэ аймагай бүхы һомонуудай түлөөлэгшэд болон олониитын ажал ябуулагшад орохо юм. Тэдэ ойн харуулшадтай хамта ажаһуугшад, ниигэмэй эмхинүүд, фермернүүд, олзын хэрэг эрхилэгшэд, түлбэритөөр ашаглагшад хаана модо бэлдэхэб гэжэ элирүүлдэг байха.
«Ой модо ашаглаха һалбарида олониитын хиналта эмхидхэхэ гэһэн аймагай үүсхэл ехэ һайн. Мүнөө ойдо тохёолдоһон байдал - өөһэдымнай ажал. Тиимэһээ гуримшуулха хэрэгтэй. Энэ үүсхэл дэмжэнэб. Иимэ зүблэл уласай бүхы аймагуудта байгуулха шухала», - гэжэ Алексей Цыденов хэлэбэ.