Түнхэн аймагай Аршаан hууринда бодхоогдожо байhан Отошо бурханай дүрсэ хүшөө барилгада туhаламжын тоглолто-марафон майн 19-дэ 16.00 сагта Улаан-Үдэ хотодо, П.И. Чайковскиин нэрэмжэтэ урлалай колледждо үнгэргэгдэхэнь.
Эндэ мэдээжэ дуушад Сэдэб Банчикова, Елена Мохосова, Билигма Ринчинова, Вера Шобосоева, Доржо Шагдуров, Эдуард Жагбаев, Александр Хандажапов болон бусад аялгата буряад дуунуудаа хангюурдаха, урма ехэтэй хатарнуудшье харагшадай нюдэ баярлуулха.
Харагшад тоглолтын биледэй ара таладань нэрэ обогоо бэшэжэ, тусхай хайрсаг соо орхиходонь, Отошо бурханай дүрсэ хүшөө нээлгэндэ зорюулагдаhан хуралда тэдэнь оруулагдажа, уншагдаха юм. Эмхидхэгшэд энэ хэмжээ ябуулгада эдэбхитэйгээр хабаадахые арад зоноо уряална.
Отошо бурхан аршааншадта туһалха
Эм домто Аршаамнай элдэб олон хото, нютаг, гүрэнүүдэй, мүн Буряад Уласайнгаа арад зониие аргалжа, эмнэжэ байдаг гэжэ мэдээжэ. Отошо бурхандаа зальбаржа, үнэн зүрхэнhөөн үбшэ хабшаяа эмнэхэбди гэжэ этигэжэ, сэдьхэлээ сэбэрлэжэ, бэеэ арюудхажа, хүсэ шадал олохомнай шухала.
Отошо бурханай эди шэди ехэ шанга юм гэдэг. Этигэжэ хандаhан хүн тэрээндэнь хүртэжэ, заатагүй эмнэгдэдэг. Аршаан hууринда Отошо бурханай дүрсэ хүшөө бодхоогдожо, олон зондо буян болохо, бэеын ба сэдьхэлэй энхэ элүүр бэлэглэн үршөөжэ байхань дамжаггүй.
Хадын зоной үүсхэл
Угаа уhанда хаяагүй, урма зоригтой хонгоодор угсаатан энэ жэлдэ Сагаан hарын найр наада түрүүшынхиеэ эб хамта үнгэргэжэ, саашадаа жэл бүри Аха, Түнхэн, Захаамин, Алайр дүрбэн аймагайнгаа ниитын ажабайдалда шадал зэргээрээ туhалжа байха тухай хэлсээ баталhан юм. Тиигэжэ Хонгоодорнуудай эмхи Түнхэн аймагай Аршаан hууринда бодхоогдожо байhан Отошо бурханай дүрсэ хүшөө барилгада туhалха зорилготойгоор концерт-марафон үнгэргэхэ гэhэн дурадхал зүбшөөгдөө. Түнхэн аймагһаа уг гарбалтайшуулай «Саяан» эблэл иимэ үүсхэл гаргаһан байгаа.
Отошо бурхандаа зальбаржа, бурхантай буянтай, урагшатай, амжалтатай ябахамнай болтогой!
Хонгоодорнуудай эмхи