722
Буряад Уласай Арадай Хуралай суглаанай бага танхимда тоо бодолгоор Бүхэроссиин олимпиадада илагшадые баяр ёһололой оршондо шагнаба.
Тоо бодолгоор Бүхэроссиин гурбан олимпиада үнгэргэгдэһэн байна. «Дважды Два» гэһэн зохёохы лабораториин шэглэлээр тоо бодолгоор Бүхэроссиин XXII олимпиадада эхин классуудай бэлиг талаантай үхибүүд хабаадаа. Тиихэдэ Санкт-Петербургын эхин һургуулинуудай IV олимпиада болон тоо бодолгоор һурагшадай Санкт-Петербургын олимпиада үнгэргэгдэһэн байна.
Буряад Уласай болбосоролой болон эрдэм ухаанай сайдай орлогшо – юрэнхы болон нэмэлтэ һуралсалай хорооной түрүүлэгшэ Валерий Поздняков, МиКЭБИ жасын хүтэлбэрилэгшэ Юрий Гатанов, 3-дахи Лингвистическа гимназиин, 59-дэхи Ородой гимназиин, 33-дахи гимназиин, 1-дэхи,19-дэхи, 22-дохи һургуулинуудай һурагшад, багшанар болон түрэлхид шагналгын баяр ёһололдо хабаадаа.
«Бүхэроссиин хэмжээндэ иимэ олон үхибүүдэй тоо бодолгоор шалгарһандань ехэ урматай. Эрдэм мэдэсэеэ шалгаха мүрысөөндэ хабаадалга хадаа хүндэтэйшье, харюусалгатайшье», - гэжэ Валерий Поздняков сугларагшадые амаршалба.
Буряад уласай 28 һурагшад дипломуудаар шагнагдаба. Тиихэдэ бэлиг талаантай үхибүүдые һурган хүмүүжүүлдэг багшанартань Буряад Уласай болбосоролой болон эрдэм ухаанай яаманай баярай бэшэгүүд барюулагдаа.
Тоо бодолгоор һурагшадай Санкт-Петербургын олимпиадада Ородой Холбоото Улас дотор олимпиадын бүхы даабаринуудые дүүргэһэн хоёр һурагшадай нэгэниинь хадаа Улаан-Үдын 19-дэхи һургуулиин долоодохи классай һурагша Дмитрий Минеев болоно. Байгша оной июнь һарада 7-дохи, 8-дахи классуудай 95 һурагшадай тоодо Дмитрий Минеев Буряад Уласаа Сочи хотодо түлөөлхэ юм.
Буряад Уласай болбосоролой болон эрдэм ухаанай яаманай хэблэлэй албанай гэрэл зураг
