Загарай аймагта «Эрхим газар хахалагша-2018» гэһэн мүрысөөн үнгэрөө. Буряад Уласаймнай дунда мэргэжэлэй һуралсалай эмхинүүдэй оюутад трактор хүлэг унажа, газар хахалха шадабаряараа мүрысэбэ. Энэ урилдаан Новоильинск тосхондо оршодог Уласай һалбаринуудай хоорондын техникумэй талмай дээрэ эмхидхэгдээ.
Һүүлэй арбан жэлэй туршада ажалай мэргэжэлэй дүршэл харуулһан харалган үнгэргэгдөөгүй байгаа. Анхан сагта энэ хэмжээ ябуулга жэл бүхэндэ эмхидхэгдэдэг һааб даа. Тиигэжэ һэргээгдэһэн энэ мүрысөөндэ Зэдэ, Мухар-Шэбэр, Бэшүүр, Ивалга, Хори, Хэжэнгэ, Загарай аймагуудһаа бүхыдөө 12 хүн хабаадаа.
Буряад Уласай Хүдөө ажахын болон эдеэ хоолой яаманай таһагай дарга Владимир Вахруновой тэмдэглэһээр, иимэ урилдаануудые эмхидхэхэ гээшэ мүнөө сагта тон шухала болоно.
- Һүүлэй үедэ хүдөө ажахынуудта залуу мэргэжэлтэд тон үсөөн болонхой. Тракторист, механизаторнууд дунда зэргээр 50-60 наһатайнууд. Саашадаашье иимэ байгаа һаань, газараа хахалха, таряа тариха ажалшад бүри олдохоёошье болижо магад. Тиимэһээ энэ харалганууд амин шухала юм: залуушуулые дэмжэхэ хэрэгтэй, - гэжэ тэрэ мэдээсэбэ.
Буряадай хүдөө ажахын үйлэдбэридэ хэрэгтэй ажалшадые бэлдэдэг дунда мэргэжэлэй һуралсалай эмхинүүд ажалаа һайнаар ябуулна гэжэ энэ үнгэргэгдэһэн мүрысөөн гэршэлнэ. Бүхыдөө тэрэ хоёр шатаар эмхидхэгдээ. Түрүүн оюутад трактораар ябаха, годируулха, уйтан газараар гараха, байрадань оруулха болон жолоодолгын бусад шадабаринуудаа харуулаа. Харин хоёрдохи шатадань хабаадагшад газар хахалаа. Тиихэдэнь сэхээр, тэгшээр хахална гү, анзаһаяа хэды шэнээн гүнзэгыгөөр газар руу оруулнаб гэхэ мэтэ шалгагдаа. Халта һарюу хахалбал, хажуу тээшэнь гаргабал, сэгнэлтэ доошолуулагдажа, муугаар хахалагшад мүрысөөнһөө болюулагдадаг байгаа.
“Эрхим газар хахалагша” мүрысөө эмхидхэһэн техникумэй захирал Виктор Киреевэй хэлэһээр, һурагшадынь ажалгүй үлэдэггүй юм.
- Манай һуралсалай эмхи хүдөө ажахын һалбарида сэхэ хабаатай. Хүдөө ажахын механигууд, трактористнууд, жолоошод, эдеэ шанагшад болон бусад мэргэжэлтэдые бэлдэнэбди. Һүүлэй 5 жэлэй хугасаада оюутаднай һуралсалай һүүлээр ажалгүйшүүлэй тоодо нэгэшье ороогүй юм. Энэнь бидэнэй мүнөө сагта тон хэрэгтэй мэргэжэлтэдые бэлдэдэгые гэршэлнэ, - гэжэ Виктор Киреев тэмдэглэбэ.
Хүдөө ажахын мэргэжэлдэ һуража байһан оюутад хоёр шата дабабад. Һүүлэй һүүлдэ илагшад тодоржо, шангуудта хүртөө. “Эрхим газар хахалагша-2018” гэһэн нэрэ зэргэдэ Уласай һалбаринууд хоорондын техникумэй 3-дахи курсын оюутан Антон Колесников хүртөө. Удаадахи шангай һууринуудые энэл һургуулиин Владислав Скуратов Руслан Шурыгин хоёр эзэлээ. “Сэхэ мүр” гэһэн шэглэлээр М.Ербановай нэрэмжэтэ хүдөө ажахын колледжын Хэжэнгын таһагай һурагшад шалгараа. “Эрхим жолоошон” гэжэ шэглэлээр дахяад Владислав Скуратов шалгаржа, илажа гараа.
Иван Подберёзкинай гэрэл зураг