Хошон үгэ, шог хөөрөө зохёогшодой ба шог ёгто зураг зураашадай дунда “Хошон үгэ” гэһэн урилдаа “Буряад үнэн” Хэблэлэй байшан эмхидхэдэг заншалтай. Тиигэжэ майн 16-да энэ урилдаанда онсо шалгарһан зоноо урижа, шангуудые барюулба.
Буряад арад хошон үгэдэ эльгэтэй, бэе бэеэ дэгээдэхэһээ эхилээд, шоглон ёгтолходоо, ехэ дуратай байдаг. Буряадта мэдээжэ болонхой “Хүхюу буряад” гэжэ урилдаандал “Хошон үгэ” сониной хуудаһанууд дээрэ уншажа, эгшэтэрээ энеэлдэхэ арга үгтэнэ.
“Хошон үгэ” гэһэн урилдаан гурбан шэглэлээр эмхидхэгдэһэн байгаа. “Ябаган зугаа” гэһэн номинацида гурбадахи һуури Сэнгэ Ринчинов, 2-дохи һуури - Дашама Доржиева, Лубсан Цыренов, 1-дэхи һуури – Цырендондок Зандраев абаа. Харин «Басни» гэжэ шэглэлээр 3-дахи һуурида Эдуард Будаев, Дамдин Дамбиев, 2-дохи һуурида – Басаа Валера, 1-дэхи һуурида Цыпилма Дубчинова гараһан байна. «Шог зураг» гэжэ шэглэлээр Виталий Цыбиков түрүүлээ.
“Буряад үнэн” Хэблэлэй байшанай захирал Баяр Балданов урилдаанда хабаадаһан эдэ зондоо баяраа мэдүүлхэдээ, иигэжэ тэмдэглэбэ: “Манай сонин уншахаһаа гадуур, үргэлжэ бэшэжэ байдаг, конкурснуудтамнай эдэбхитэйгээр хабаададаг тандаа баяраа хүргэнэб. Мүнөө буряад хэлээр уншаха зомнайшье үсөөржэ байнхай. Түрэлхи хэлэн дээрээ бэшэхэ, оршуулха зон үгы шахуу. Тиибэшье буряад хэлэ сахин хүгжөөлгын асуудалнууд шиидхэгдэнэ. Буряад Уласай Болбосоролой болон эрдэм ухаанай сайд Баяр Жалсановай эдэбхи үүсхэлээр Буряадай гүрэнэй ехэ һургуулида буряад хэлэнэй багшанарые бэлдэхынь тулада 10 нэмэлтэ һуури эмхидхэгдэнэ. Энэ хэрэгтэ гүрэнһөө мүнгэн һомологдоно. Тиигэхэдэнь буряадаар бэшэхэ ба оршуулха шадабаритай 2-3 мэргэжэлтэдые бэлдүүлхэ хүсэлтэйбди. Гадна аймагай сонинуудта буряад хэлэн дээрэ хабсаргалта хэхэ түсэб бии”.
Буряад арадай хүндын ехэ бэлэг болохо сэнхир номин хадагтай хамта тусхай бэлэгүүд урилдаанда урдалһан зондо барюулагдаа.
“Хошон үгэдэ” шалгарһан зоной нэрэ “Буряад үнэн” сонин уншагшадта үнинэй танил юм. Заха холын Захааминай мэдээ Лубсан Цыренов, яруунаархин тухай Эдуард Будаев, Бэшүүрэй һонин Цырендондок Зандраев, Хэжэнгэһээ мэдээсэл Дашама Доржиева болон бусад дуулгажал байһаар. Эдэ бэшээшэднай үшөө захил хэхэ талаар ажал эршэтэйгээр ябуулдаг юм. Илангаяа Шэбэртын эдэбхитэн Цырендондок Зандраев хүршэ нютагуудаар ябажа, захил олоор хүүлэнэ. Нютагай байгууламжын түлөөлэгшэд абаһан шагналаарнь энэ ахатанаа амаршалхаяа ерэһэн байна. Тиихэдэ нютагаархинаа дэмжэхэ хүсэлтэйгөөр арадай дархан Валерий Цыбиков энэ шан барюулгын ёһололдо мүн лэ оролсоо.
Авторай гэрэл зураг