Ага тойрогой уран зохёолшод
Һолонго мэтэ шэмэглээ
Агын тойрогой Ж.Балданжабоной нэрэмжэтэ уран зохёолой нэгэдэлэй хүтэлбэрилэгшэ Батор Шагдаровтай уран зохёолшо Надежда Гармаевагай хөөрэлдөөгөөр 2018 оной сэтгүүлэй 2-дохи дугаар эхилнэ. Бүхэдэлхэйн ирагуу найрагай үдэртэ зорюулагдаһан энэ хөөрэлдөөн соо нэгэдэлэй 70 жэлэй ажал ябуулга тухай хуряангыгаар үгтөө. 1947 ондо байгуулагдаһан энэ бүридэлые мэдээжэ уран зохёолшо Жамьян Балданжабон, 1967 онһоо 1992 он болотор Арсалан Жамбалон хүтэлбэрилһэн бэлэй.
Мүнөө сагта хэд уран зохёолшод тодорон гаранхай, алтан үлгы – Агаяа суурхуулжа байнаб гэһэн асуудал илангаяа шухала ха. Нэрлэбэл, хэр үнинһөө мэдээжэ Батожаргал Гармажапов, Цыденжаб Цыриторон (Мухар-Шэбэртэ наһаараа байгаашье һаа, нютаг гээшэ нангин гэе), мэдээжэ оршуулагша Мүнхэ Очиров, Сэсэг Дамбаева, Цыбикмит Дамдинжапова, Жаргал Жербаев (Түнхэн нютагһаа гарбалтай), Дугарма Батоболотова, Жаргал Олзобоева, Жаргалма Жамбалова, Цындема Бабуева, Светлана Махабадорова гээд хамта дээрээ 30-аад хүн нэгэдэлдэ ороно гэжэ Батор Бадмаевич хөөрэһэн байна.
Эдэ авторнуудай олониинь “Буряад үнэндэ”, “Байгал” сэтгүүлдэ шүлэг, зохёолнуудаа толилуулжа, монгол үндэһэтэ уншагшадай дунда мэдээжэ болоһон, энээн тухайгаа һанажа, һайхан үгөөр дурсажа ябадагынь һайшаалтай юм. Үнэндөө дэмжэлгэ абаһан газартаа мэндые, баяраа хүргэхэдөө, хүн гээшэ үшөө ехэ хүсэ орожо, шадал шандааһаяа нэмэжэ ябадаг ёһотой.
Агын зохёолшодой баглаа шүлэгүүд, рассказууд дугаарыемнай зундаа һалбарһан һолонго мэтэ шэмэглэбэл даа. Байдал зарсашоогүй, хүлгөө сэдьхэлтэй хүбүүд, хүүхэн дангина ирагуу найрагшад зохёохы эрмэлзэлдэ абтаһаар, зориһоор лэ урагшаа...
Нүүдэлшэд
Энэ дугаарһаа эхилжэ, Буряадай мэдээжэ прозаик Александр Лыгденовэй “Нүүдэлшэд” гэһэн уран һайханай-баримтата туужа толилолгоёо эхилбэбди. Монголой хаашуулай хоорондоо эбээ таһаржа, ехэ хёморол үзэгдэхэ сагай үеэр Халха Монголой дайдаар ажамидаржа байһан олон тоото отог зон, тэрэ тоодо сартуулнууд Ара Монголой дайда руу (мүнөөнэй Буряадай урда аймагуудай газар) бодхуултажа ерэһэн. Энэ ехэ нүүдэл зуугаад жэлэй хугасаа соо, 1720 ондо Хитад Ород гүрэн хоёрой хоорондохи хилын хаагдатар шахуу үргэлжэлһэн. 1630 ондо Сэцэн хаанай аха дүү болохо долоон нүхэдөө дахуулжа гараһан сартуул обогой түрүү сайд Хүлэгэ гээшэ энэ ехэ нүүдэлэй эхи табиһан гээд түүхын номууд соо хэлэгдэдэг.
“Сартуулнуудые Дунда Азиһаа Чингисхаан Монголой газар дайда руу туужа асарһан гэжэ һанадагби. Энэ домог зохёол соогоо оруулхадаа, уран һайханай-баримтата туужа гэжэ нэрлэһэмни үндэһэтэй”, - гээд, бэлигтэй прозаик тайлбарилан бэшэнэ.
Гүрэнэй ажалда һаатахаяа болижо, наһанай амаралтада гараад байхадаа, түүхын “тогоон” соо бодолоо бисалгажа, уран гуурһанайнгаа хубилгаан шэдиие харуулха сагынь тулажа ерээ ха юм даа, Александр Галсаннимаевичта. Хүлэгэ хүтэлбэрилэгшын хүлгөөтэ замаар захын газар, Ара Монгол руу арад зоноо хүтэлһэн тухайнь уншаха гээ һаа, энэ дугаараймнай хуудаһануудые һэхэн һонирхыт гэжэ уряалнабди.
“Буряадай уран зохёолшодой шэнэ бүтээлнүүд” гэһэн гаршаг доро Нина Ленхобоева-Артугаевагай “Афган дайнай дэбтэрһээ” гэһэн хэһэг шүлэгүүд толилогдоо.
Манай литэ
Иимэ ниитэ гаршаг доро Буряадай элитэ ирагуу найрагша Даша Дамбаевай 80 жэлэй, Буряадай мэдээжэ прозаик Цыден-Жап Жимбиевэй 90 жэлэй ойдо зорюулагдаһан статьянуудые мүнөө Москва хотодо ажаһуудаг Андрей Румянцев бэшээ юм. Оршуулгыень Надежда Гармаева хэһэн байна. Дурсалганууд хэзээдэшье сэнтэй. Зохёолшодой дүрэ шарай үе залган мүнхэлхэ гээшэ буянтай һайхан хэрэг.
Яхад зохёолшо – хүндэтэ айлшамнай
Ород Уласай можонууд хоорондын зохёохы харилсаа хүгжөөхэдэ, оршуулганууд угаа удхатай гээшэ. Саха-Яхадай уран зохёолшо Евдокия Иринцеева-Огдо олон тоото номуудай автор, Яхад Уласай «Кэскил» сониной ахамад редактор юм. 2016 ондо Лондондо үнгэргэгдэһэн “Нээмэл Еврази-2016” гэһэн мүрысөөндэ “Мамонтёнок Мэник” гэһэн онтохонуудайнь ном илажа, хүүгэдтэ зорюулагдаһан эрхим зохёол гэжэ нэрлэгдээ һэн. Евдокиягай зохёохы ажал ябуулгые буряад уг гарбалтай нүхэрынь Александр Сократович Иринцеев үнэн зүрхэнһөө дэмжэдэг заншалтай.
Яхад уран зохёолшод ехэ эдэбхитэй, зоригтой, уласхоорондын хэмжээндэ зохёолнуудаа табидаг заншалтай. “Байгал” сэтгүүлдэмнай Евдокия Иринцеева-Огдо «Дуратай хадаа, дуранһаань бү арса” гэһэн мүнөөнэй ажабайдалһаа һабагшатай туужаяа дурадхаа юм. Сэтгүүлэй харюусалгата тушаалтан Надежда Гармаева энэ туужые оршуулаа.
Монголой уран зохёолшодой бүтээлнүүд
Үе сагууд соогуур удха үнгэеэ хэзээдэшье буурахагүй, хэлбэришэгүй сэнтэй зохёолнууд монгол туургата арадуудай һан жасада бии гээшэ. Чадраабалын Лодойдамбын “Тунгалаг Тамир” роман хэзээ уншаа бэлэйбибди? Һургуулиин шабинар ябахадаал ааб даа. Ухаандаа шэнээр һэргээн уншаха гэхэдэ, энэ ном номой сангуудташье үгы шахуу болонхой, тиимэһээ монгол байдалые сэсэгы гоёор, сэсэн оньһон үгэнүүдтэйгээр, аажам үргэнөөр, абьяас һайханаар харуулһан зохёолые дахинаа уншахадаа, ондоо нюдөөр, ондоо мэдэрэлээр сэдьхэлнай халина бэшэ гү? Энэ ехэ захатые шэнээр мэдэрэн уншыт, заатагүй хужарлахат, заяагаа баяжуулхат.
Монголой алдарта ирагуу найрагша Ринчинэй Чойномой “Буряад” гэһэн найраглалда талархалай харюу болгон, Монголой буряад гарбалтай эрхэтэн Лубсанай Оюунсэсэг “Сэмжүүхэй” гэһэн шүлэглэмэл поэмэеэ дурадхаа юм. “Буряад” найраглалай бэшэгэй маягта тааруулан, инагай ошо бадаруулан гулгуулһан мүрнүүдыень Р.Чойном үнэхөөрөө дуулаһан, соносоһон һаа, сэдьхэлээ хэды халяан баясаха һэм...
Бараг даа гэһээр байтарни,
Барантаба гээшэ ха, наһамни.
Чойномни гэһээр ябатарни,
Шортоо түрмэдэ һалаа гэлсэбэ.
Үбдэжэ, зобожо тулиһыешни
Хожомой хожомынь дуулаа һэм.
Забдажа эльгээһэн захяануудайш
Засагта хаагдаһыень мэдээ һэм.
Үлгэн дайдадаа ханилха
Үйлэ табисуурай дутаа хада,
Үндэр хүхэ тэнгэридээ
Хун шубууд болоод уулзуужамди –
гээд, Л.Оюунсэсэг халуун инаглалай мүрнүүдые һубарюулна.
Гутай нютагай домогууд
Эрдэмтэн Г.Н.Очирова арадай аман үгэ суглуулха, дасануудай түүхэ, бөө шажаниие шэнжэлэн шудалха талаар ехэ хэмжээнэй ажал хэһэн намтартай. Ш-Н.Хубитуевай “Хори буряадай түүхэ”, “Бишыхан записка”, “Шэдитэ хүүр”, “Аршаанай дуһал”, “Миларайбын намтар”, Агван Доржиевай “Дэлхэйе тойрожо бүтэһэн домог” гэһэн суута номуудые хуушан монголшо эрдэмтэн оршуулһан габьяатай. Энэ удаа түрэл Бэшүүр аймагай Гутай һууринайнгаа үбгэд, хүгшэдһөө 1975 ондо буулгажа бэшэһэн һонин домогуудаа сэтгүүлдэмнай толилуулхыень дурадхаа һэмди.
Буддын шажаниие шэнжэлдэг хубилгаан эрдэмтэн Б.Д. Дандарон Г.Н. Очирова (зүүн гарһаа), Н.Д. Болхосоева шабинартаяа 1972 он
“Хайрата үбгэд, хүгшэдтэйгөө дахинаа уулзаһан, нюур шарайень хаража байһандли болоноб. Урдандаа ямар мүргэлтэй байгааб, үнэншэмөөр, үнэншэхөөр бэшэшье домогууд, хаана, хэзээ юу дуулаһанаа нюунгүй хөөрэһыень бэшэжэ абаа һэм”, - гээд, Галина Номогоновнагай хөөрэхэдэ, “Эртынгээ домогуудые суглуулһантнай эрдэни-зэндэмэни мэтэл...” гэжэ үнэн зүрхэнһөө дэмжээбди.
Гутайн баабай – ороной тэнгэри,
дайдын эзэн.
Даашагүй дамбартай,
Дабашагүй нугалууртай,
Хун сагаан хони
Хубилгажа байналби,
Хуби заяа эрижэ байнаб,
- гэжэ урдын бөө бөөлэгшэ бэлэй гэжэ Бадма Очиров (1895 оной) хөөрэжэ үгэһэн байна. Иимэ хөөрөөнүүд олон. Түгэсхэлынь удаадахи дугаарта гараха.
Эртэ урдын оюун ухаанай сан нөөсэһөө Гунгаажалцанай «Эрдэниин сан субашид» толилолго дугаарһаа дугаарта үргэлжэлһөөр. Энэ удаа «Мэргэн һайниие, дээдэ ехэсые танихын аймаг” гэһэн хэһэг үгтэбэ.
Эгүүридэ һайн хүндэ үшүүхэн туһалбал,
Эгүүридэ тэрэнииень мартангүй,
ашыень харюулаад,
Эртэ сагта ундаа хүрэһэн хаанда
Нэгэ долоогоно үгэһэн хүн
Эсэстээ тэрэ хаанай түрын
дундуурые эзэлһэн үльгэр мэтэ.
***
Магтахадань, дэмы баярлан
хүхирүүтэнгүй,
Муушалхадань, дэмы хонсорон
шантарангүй,
Магад, өөрынгөө һайниие
алдангүй ябаха гээшэ
Манлай һайн хүнэй жама
ёһын шэнжэ.
– гэһэн иимэрхүү удхатай мүрнүүд сан субашидые шэмэглэнэ.
Галина БАЗАРЖАПОВА-ДАШЕЕВА, “Байгал” сэтгүүлэй эрхилэгшэ