Зүрхэнэй эмшэд аргалһан үхибүүдтэеэ
Буряад Уласай Н.Семашкын нэрэмжэтэ клиническэ больницын зүрхэ-һудаһанай үбшэнүүдэй таһаг Хүүгэдэй зүрхэнэй үдэр үнгэргөө. Иимэ хэмжээ Ородой Холбоото Уласай Элүүрые хамгаалгын яаманай ахамад кардиохирург Лео Бокерия үүсхэжэ, нёдондо Москва хотодо үнгэргэһэн байна. Харин мүнөө жэл энэ хэмжээндэ гүрэнэймнай 27 можонууд, тэрэ тоодо Буряад Улас эдэбхитэй хабаадаба.
Энэ үдэр тус эмнэлгын газарта зүрхэндөө операци хүүлэһэн үхибүүд уригдаа. Һайндэр зүрхэ-һудаһанай үбшэнүүдэй таһагай 25 жэлэй ойн баярта зорюулагдаа. Тиин эдэ үдэрнүүдтэ “Ногоон больница” гэһэн хэмжээнэй хаа-хаанагүй үнгэргэгдэжэ байгаа хадань, үхибүүд эмшэдтэеэ модохонуудые тарибад.
Түүхэтэ үдэр
Зүблэлтэ үедэ майн 19-дэ эдир пионернүүдэй һайндэр тэмдэглэгдэдэг бэлэй. Мүнөө үеын залуушуул, эдиршүүл тус һайндэр тухай мэдэхэшьегүй байгаа ёһотой. Зүгөөр Хүүгэдэй зүрхэнэй үдэр тус түүхэтэ үдэртэ дашарамдуулагдаа бэшэ. Энэ үдэр американ эмшэд - хирург Альфред Блэйлок болон кардиолог Елен Тауссиг хоёр түрүүшынхиеэ зүрхэндэ операци хэжэ, тэрэ үеын эмнэлгын хүгжэлтэдэ горитойхон хубитаяа оруулһан байгаа.
- Эдэ эмшэд юундэ үхибүүдэй нюур хүхэбтэр гээшэб гэжэ шэнжэлжэ эхилээ. Шалтагаанииень элирүүлхын тула лаборатори соогоо нохойнууд дээрэ шэнжэлэлгын туршалгануудые хэжэ, шэнэ арга һанаһан байха юм. Уушханай гол һудаһан (артери) руу шуһанай ябаса һайжаруулха операци хэгдэдэг болоо. Энэ хадаа тэрэ үеын эмнэлгын тон ехэ хүгжэлтэ байгаа. Гэхэ зуура зүрхэндэ операци эгээл түрүүн Роберт Кросс үшөө 1939 ондо хэжэ эхилһэн юм, - гэжэ хүүгэдэй кардиохирург Владимир Ильинов мэдээсэбэ.
Зүрхэ аргалалгын хүгжэлтын эхин
Н.Семашкын нэрэмжэтэ больницада 1999 ондо шуһа гүйлгэдэг оньһон түхеэрэлгэ худалдажа абаһанай ашаар зүрхэндэ олоор операцинуудые хэдэг болоо. Тэрэ үедэ хүүгэдэй зүрхэ аргалха талаар орёохон байдал тогтоод байгаа. Түлбэригүйгөөр эмшэлэлгын түб газарнуудта эльгээхэ квотын тон үсөөнөөр үгтэхэдэнь, үбшэн үхибүүд удаан саг соо ээлжээгээ хүлеэжэ байха аргагүй ха юм даа. Тиимэһээ тус больница Новосибирскын шуһанай гүйдэлэй үбшэнүүдэй эрдэм-шэнжэлгын институдтай хэлсээ баталһан юм. Тэндэһээ дүршэл ехэтэй олон эмшэд хоёр дахин ерэжэ, Улаан-Үдэдэ 37 үхибүүдтэ операцинуудые, тэрэ тоодо шэнэ ангио-аргаар хээ бэлэй.
- Эгээл тэрэ үедэ манай хирургнууд Москва, Новосибирск хотонуудта энэ шэглэлээр һуралсал гаража байгаа. Новосибирскын эмшэдэй хоёрдохиёо ерэхэдэнь, манайхид тэдэнэй хүтэлбэри доро операцинуудые хэжэ дүршэһэн юм. Новосибирскын эмшэд манай кардиохирургнуудта харгы нээжэ, тэрэ гэһээр эндээ хүүгэдэй зүрхэндэ операци хэдэг болообди, - гэжэ 28 жэлэй туршада тус больницада зүрхэ эмшэлжэ байһан Ольга Володарская мэдээсэбэ.
Зүрхэнэй үбшэтэй үхибүүдые олоор эмшэлхэ арга олгогдоо. Нёдондонһоо эхилжэ, энэ эмнэлгын газарта үхибүүдые шалган абадаг болоходонь, ажал эршэдээ. Эгээл түрүүшын операцинуудые Буряадта хэжэ эхилһэн Владимир Ильинов мүнөө сагта дүршэл ехэтэй хүүгэдэй кардиохирург болонхой.
- Тусхай бэрхэшээл гэхэдэ, амяараа хүүгэдэй зүрхэ эмнэлгын таһаггүйбди. Багашуул томошуултай адли нэгэ таһагта аргалуулагдана. Тиихэдээ таһагнай үбшэнтэнөөр дүүрэнхэй. Теэд үхибүүд эгээл түрүүн эмшэлэгдэхэ ёһотой ха юм, - гэжэ Владимир Ильинов тайлбарилба.
Дары түргэн туһаламжын хэрэгтэй болоходо, үхибүүд гүрэнэйнгөө түбэй эмнэлгын газарнууд руу эльгээгдэнэ. Харин халта хүлеэд гэхэ арга боломжотой үхибүүд болзороо хүлеэгээд, эндээ, Улаан-Үдэдөө, аргалагдана. Һүүлэй үедэ эгээл багахан үхибүүдтэ операци хэдэг болонхой. Хоёршье килограмм шэгнүүртэй нялха үхибүүдые аргалха аргатай болонхой.
Өөрын нэрэтэ модонуудые тариба
Үхибүүд бүхы наһандаа модо тарижа байһандал, өөртөө модохонуудые шэлэн абажа, бэлдэгдээд байһан нүхэнүүд руу үндэһөөрнь һуулгажа эхилбэ. Тариһан модохонуудаа уһалжа, өөрынгөө нэрэтэй тэмдэгхэнүүдые газар руу зообо. Тиигэжэ өөһэдын модохонуудтай болобо гээшэ. Зүрхэ-һудаһанай үбшэнүүдэй таһагые даагша Баатар Дониров үхибүүдые түрэлхидтэйнь амаршалжа, үшөө 25 жэл үнгэрхэдэ, эдэ модонуудайнгаа хажууда дахин уулзажа байхыень дурадхаба. Тиихэдэ тус һалбари 50 жэлэйнгээ ойн баяр тэмдэглэхэ болоно бшуу.
Үхибүүд модохонуудые тариба
- Тиихэ сагта эдэ модохонуудтнай үндэр томо модод болоод байха. Таанад, магад, өөһэдынгөө хүүгэдые дахууланхай ерэхэт. Харин бидэ, таанадай эмшэд, наһатайнууд болонхойшье һаа, үшөө аргалха, эмнэхэ шадалтай зандаа таанадтаяа эндэ зогсохобди. Мүнөө таанад үетэн сасуутанһаа юугээршье дутуугүй, адли элүүр энхэ болоо гээшэт. Хүбүүд, сэрэгэй албашье хааха, тамирааршье бэеэ һорихо аргатайт, - гэжэ Баатар Аюржанаевич тэмдэглээ.
Энхэ элүүр болоһон үхибүүд
Данила хүбүүн анхан ямаршье үбшэгүй, энхэ элүүр, ушугаар бэеэ һорижо ябаа. 8 наһатай болоод байхадань, нэгэтэ һорилгын үедэ гэнтэ зүрхэниинь хадхан үбдэшэһэн юм. Тиигэжэ 2016 ондо тэрээндэ операци хэгдээ, жэлэй туршада зүрхэнэй эмшэд шэнжэлэн шалгаа. Мүнөө Данила хүбүүхэн дахин ушугай секцидэ ябана, хэнһээшье дутуугүйгөөр бэеэ һорижо, амжалта туйлажа эхилэнхэй.
Олег хүбүүн түрэхэһөө зүрхэ муутай (порок) байгаа юм. Хүүгэдэй кардиолог Лариса Гатыповагай харууһан доро ходол эмшэлүүлһэн. 9-тэй болоходонь, Владимир Ильинов хонходожо, операцида орохыень дурадхаһан юм.
- Владимир Николаевич ходол бидэндэ хонходожо, энхэ элүүрыемнай мэдэжэ байгаа. 2017 ондо аргада орообди, бэеэ гамнажал ябанабди. Анхандаа халта ябаад лэ, гурбадахи дабхарта гарахадаа, эсэшэдэг һэн. Теннис наадахадаа, баһал эсэхэ. Операциин һүүлээр теннистээ ходол алгадангүй ябадаг болонхой, гүйдэг, харайдаг. Эсэхэеэ болёо, - гэжэ эжынь хөөрэнэ.
Олон зон соо аягүйрхэжэ, бэшүүрхэжэ байнгүй, нэгэ басагахан урагша-хойшоо гүйнэ, бүхы зонтой гэрэл зурагаа буулгуулна. Энэ хадаа Ангелина гээшэ, 3-4-тэйхэн хаш.
- 2015 ондо гэнтэ басагандамни зүрхэнэй порок гэһэн үбшэн элирүүлэгдээ. Мэгдээбди, сошообди, айгаашьебди. Теэд манай эмшэд тон һайн, дээдын арга боломжотой дүй дүршэлтэй байна. Жэл болоод лэ, Владимир Ильинов операци хээ. Эмшэд бидэниие ходол шалгажа, туһатай зүбшэл үгэжэ байдаг. Ямар һайн саг болоо гээшэб! Элдэб янзын оньһон түхеэрэлгэнүүд, һайн һанаатай, нигүүлэсхы сэдьхэлтэй эмшэд байха, - гэжэ Ангелина Раднаевагай эжы хэлэбэ.
Юля Гатаповагай дүрбэтэйхэн байхадань, зүрхэнэй үбшэн элирүүлэгдээ. Шалгалта, шэнжэлэлгын үе дабажа, хоёр жэл болоод, шэнэ аргаар ангио-операци хэгдээ. Больницада нэгэл сүүдхэ хэбтээд, гэртээ табигдаа.
Ангио-операци бүтээдэг хирург Зоригто Балханов бэеэ анхаржа байхыень бүгэдэндэ захяа.
- Хэрбэеэ сээжынгээ гэнтэ хадхаа, аягүй болоо һаань, түргэн туһаламжада мэдүүлхэ ёһотой. Юундэб гэхэдэ, инфаркт үбшэнэй алтан заршам бии юм. Хоёр сагай хугасаада эмнэлгын туһа хүргөө һаа, аргалагдажа болохо. Харин 12 сагай хугасаада абараагүй һаа, тон аймшагтай ушар тохёолдохо. Тиимэһээ ами наһаяа утадхажа, удаан ажаһууха гээ һаа, бэеэ гамнажа, анхаржа ябаха шухала, - гэжэ тэрэ мэдээсэбэ.
Баярые булта хүргөө
Модо тариһанай удаа эмшэд айлшадаа больница шадархи эдеэнэй газар урижа хүндэлбэ. Хүүгэдэй зүрхэнэй үдэртэ зорюулагдаһан зурагуудай харалганда шалгарагшад шангуудта хүртэбэ. Харин энэ һайндэртэ хабаадаһан үхибүүдтэ бултандань энхэ элүүр болоһоной үнэмшэлгэ барюулагдаа.
Түрэлхидэй зүгһөө Баргажанай Адаг тосхонһоо ерэһэн Надя басагаханай эжы баярай үгэнүүдые хэлэбэ.
- Манай эндэ, Улаан-Үдэдэ, иимэ арга хэдэг болоһониинь ямар гоё гээшэб! Аяар холын хари газар ошонгүй, нютаг дээрээ ямаршье гаргашагүйгөөр эмшэлүүлнэбди. Бидэ таанадтаа ехэ баярые хүргэнэбди. Ходол энхэ элүүр, амжалта дүүрэн ябыт даа! – гэжэ Надиин эжы баяраа мэдүүлбэ.
Надя басагахан эхынгээ умай соо оройдоол 6 һара байгаад, болзорһоо урид мүндэлшэһэн юм. Тиихэдээ 990 грамм шэгнүүртэй үхибүүн хэдэн үбшэтэй байгаа. Дүрбэ һаратайдань зүрхэнэй үбшэн элирүүлэгдээ, уушханай баһал үбшэнтэй. Зүрхэндөө операци хүүлэхэдэнь, аминиинь хаагдахаа болинхой. Үдэр бүхэндэ амилжа ядажа, зободог һэн. Харин мүнөө хахад жэлэй нэгэл дахин амяа абажа ядаа. 4-тэй болоодүйхэн Надя мүнөө эндэ ерэһэн үхибүүдтэй суг хамта наадана.
Бэрхэшээлнүүд баһал бии
Үхибүүдэй зүрхэ эмшэлхэ өөһэдын таһаг байгуулхаһаа гадна томошуулайшье таһаг үргэдхэхөөр. Зүрхэ-һудаһанай һалбариин нэгэ томо байшан нээбэл, Буряад Уласай зүрхэ аргалалгын һалбари тон ехээр хүгжэхэ һэн. Эндэмнай зүрхэнэй бүхы шахуу янзын үбшэнүүд аргалагдана. Гансал зүрхэ һэлгэхэ операци болон түрэхэһөө хүндэ үбшэнүүдые гүрэнэй түб эмнэлгын газарнуудта хэдэг. Манай эмшэдэй арга боломжо хизаарлагданхай: зүрхэндэ операци хэхэдэ, тон үнэ сэнтэй түхеэрэлгэнүүд хэрэгтэй, мүн гүрэнэй мүнгэн дэмжэлтын квото тон үсөөнөөр үгтэнэ.
- Бидэ мүнөө 260 операци хэнэбди гэжэ шангаар хэлэнэбди. Теэд энэмнай олон бэшэ, үшөө олоор хэхэ аргатайбди. Ээлжээншье үсөөн, оройдоол 2-3 долоон хоногто үбшэнтэн хүлеэдэг. Манай ажаһуугшад нютаг дээрэмнай элдэб арга бүтээгдэдэг гэжэ мэдэдэг. Бидэ Ород гүрэнэй түб руу ошохыень дурадхадагбди. Зүгөөр бүхы үбшэнтэнэй 90 гаран хубинь Улаан-Үдэдөөл аргалуулхаяа хүсэдэг, - гэжэ зүрхэ-һудаһанай таһагые даагша Баатар Дониров онсолбо.
Хүүгэдэй зүрхэнэй үдэр бүхы олониитын, түрэлхидэй анхарал энэ үбшэндэ татахын тула эмхидхэнэ. Жэл бүхэндэ манай гүрэндэ үбшэн зүрхэтэй 20 мянгаад үхибүүд түрэдэг. Түрэлхид энэ үбшэ аргалхаар, эмшэд дары түргэн туһаламжа хүргэжэ шададаг гэжэ мэдэхэ ёһотой. Зүрхэ- һудаһанай үбшэн хадаа эгээл аюултай үбшэнүүдэй нэгэн гээшэ. Гэбэшье бүхыдөө аргада ороһон үхибүүдэй 97 хубинь тон энхэ элүүр болодог юм.
Энэл үдэрэй 3 сагта тус больницын зүрхэ-һудаһанай таһагай эмшэд Москва хотодо эмхидхэгдэһэн зүблөөндэ видео-холбоогоор хабаадаа. 27 можонуудай эмшэд зүбшэлсэжэ, Нижний Новгород хотодо байһан зургаатайхан Саша хүбүүхэниие аргалха онол арга тухай зүбшэлсэбэ. Зүблөөн иимэ аргаар, мүн олоной хабаадалгатайгаар түрүүшынхиеэ үнгэргэгдэбэ гээшэ.
Хойто жэлһээ Хүүгэдэй зүрхэнэй үдэр үргэдхэгдэжэ, уласхоорондын хэмжээндэ гаргагдахаар хараалагдаба. Америкын, Скандинавиин гүрэнүүдэй болон Беларусиин томо клиникэнүүд хабаадуулагдаха түсэбтэй.
Цырегма Сампиловагай гэрэл зурагууд