Үзэсхэлэнэй үедэ
Буряад Уласай Үндэһэтэнэй музейн дэргэдэ “Алтарганые угтуулан” гэһэн үзэсхэлэн-харалган дэлгэгдээ. Хоёр үдэрэй туршада үргэлжэлһэн энэ хэмжээ ябуулгада уран гартанай бүтээлнүүд табигдаа.
Бүгэдэ Буряадаймнай “Алтаргана” наадан хоёр жэлэй нэгэ удаа үнгэргэгдэдэг заншалтай. Энэ ехэ наадандаа бэлдэжэ, хэдэн шэглэлээр мүрысөөнүүд, харалганууд эмхидхэгдэдэг. Тээмэндэ дуунай, үльгэршэдэй, арадай аман зохёолой, дангинанарай, уран оёдолшодой болон бусад харалганууд үнгэрөө бэлэй. Тэндэ илагшад Эрхүү хотодо мүнөө жэл үнгэргэгдэхэ “Алтаргана” нааданда Буряад ороноо түлөөлхэ эрхэтэй болоо.
Гар урлалай бүхы янза болон һалбаринуудай бүтээлнүүд энэ үзэсхэлэндэ хабаадаба. Дүн хамта 500-гаад ажал музейн 3 томо танхим соо дэлгэгдээ. Уран гартанай бүтээлнүүдэй үзэсхэлэниие Буряад Уласай соёлой сайд Соёлма Дагаева нээгээ.
- Мүнөө жэлэй энэ харалган “Музейдэ һүни” гэһэн хэмжээнтэй тудаа. Таанад, уран дархашуул, музейн ажалтай холбоотойт: бүтээлнүүдтнай музейн үзэсхэлэндэ дэлгэгдэдэг. Тиин харагшадай нюдэ баярлуулжа, сэдьхэлдэмнай һайхан бодол, хүсэл, эрмэлзэл түрүүлдэг. Жэл бүхэндэ ажалнуудыетнай хүлеэн абадагбди. Юундэб гэхэдэ, таанад угсаатанаймнай соёл урлалай хэзээ нэгэтэ мартагдаһан ямар нэгэ һонин зүйл заатагүй харуулдаг гээшэт, - гэжэ Соёлма Баяртуевна тэмдэглэбэ.
Харалган-үзэсхэлэн дүрбэн шэглэлээр үнгэргэгдөө: модоор, түмэрөөр, зөөлэн эдээр (мориной дэлһэн, һэеы, бүд, арһан) уран бүтээл болон буряад зураг гээд хубаарилагдаа.
Үзэсхэлэн оройдоол хоёр үдэрэй туршада дэлгэгдээшье һаа, “Музейдэ һүни” хэмжээнтэй тудажа, ехэ олон зон тэрэниие хаража шадаа. Арадай уран бэлигэй уласай түбэй уран зурагай таһагые даагша Саржана Эрдынеевагай тэмдэглэһээр, “Алтаргана” нааданда хабаадаха дуратайшуул жэл бүри олошоржол байдаг.
- Мүнөө жэлэй харалганда Захаамин нютагай суута дархашуул Нохоровтоной уг залгамжалагша Билигто Нохоров түрүүшынхиеэ хабаадана. Уран дархан мүнгөөр зүйлнүүдые бүтээдэг юм. Ажалнуудые харахадаа, мүнөө жэл заатагүй шүүхэбди гэжэ найдахаар. Мүн “Буряад зураг” гэһэн шэглэлээр ехэ олон бүтээлнүүд дурадхагдаа, - гэжэ Саржана Дашинимаевна мэдээсэбэ.
Арадай уран бэлигэй уласай түбэй дэргэдэ урданай буряад уран зурагай дүршэлтэ хэшээлнүүд һүүлэй хэдэн жэлнүүдэй туршада эмхидхэгдэдэг. Тэрэ һуралсалда Буряадаймнай уран зураашад, уран гартан хабаадуулагдадаг. Энэ һургуули гараһан уран зураашад Инна Гомбоева болон Алтына Намсараева тус шэглэлээр уран зурагай ехэ һонин ажалнуудые энэ харалганда табяа. Мүн лэ Буряадтаа мэдээжэ болоһон модошо дархан мүнөө жэлэй харалганда һонин ажалнуудые дурадхаа. Арадай ёһо заншалда зорюулжа, модоор дархалһан бүтээлнүүдые харахада, юрэ гоёшоохоһоо гадна һонин мэдээсэл абамаар, гүнзэгы ехэ удха шанарыень ойлгомоор байна.
Үзэсхэлэндэ буряад арадаймнай уран дархашуулай ямар бүтээл үгыб даа! Үнэхөөрөөшье, эдэ бүгэдые хаража байхадаа, буряад угсаатамнай ямар бэлиг шадабаритай, ямар уран гартай, ямар баян һанал бодолтой гээшэб гэжэ гайхан бахархахаар.
Мухар-Шэбэр аймагай Галтайн дунда һургуулиин багша Цындыма Бальжинимаева хониной нооһоор бүтээһэн зүйлнүүдые табяа.
Багша хоёр жэлэй туршада һургуулиингаа үхибүүдые иимэ юумэндэ һургана. Хөөрэлдэһөөр байтараа, уран гартанай энэ бэлиг дамжуулха үхибүүдшье үсөөрөө юм байна гэжэ мэдэбэбди.
- Анхан минии ангида 16 басагад ябажа, уран оёдолдо һурадаг һэн. Мүнөө дунда наһанай оройдоол 4 басагад үлэнхэй. Һургуулидамнай бү- хыдөө 47 һурагшад һурана, - гэжэ багша мэдээсэбэ.
Тиибэшье тэрэ байһан үхибүүдтээ мэдэхэ эрдэмээ, шадаха дүршэлөө дамжуулһан байна.
Уран гартан үзэсхэлэнэй үедэ дүршэлэй хэшээлнүүдые харуулаа. Ярууна аймагай Үльдэргэ нютагай уран зурагай багша Цыренханда Цыдыпова ташуур гүрэжэ, бултаниие һонирхуулба. Тэрэ “Алтарганада” хэдэн дахин хабаадаһан юм. Уран дархашуулай бүтээлнүүдээр ехэ һонирходог.
- Ямар юумэн дэлгэгдэнэгүйб гэжэ элирүүлээд, мүнөө жэл хониной нооһоор энэ хибэс бүтээгээб. Гурбан хониной нооһон ороо, бүхэли зунаа хээб, ехэ ажалтай юумэн. Ёһо заншал һургуулида заадаг хадаа өөрын һуралсалай түсэл зохёонхойб. Тиигэжэ үхибүүдтээ заадаг зүйлнүүдые эндэ нэхэжэ, зурагта оруулааб. Найман тахил, манай эндэхи ургамалнууд, амитад, Эрын гурбан наадан эндэ зураглагданхай, - гэжэ багша тайлбарилба.
Буряадтаа мэдээжэ болоһон, дүрбэн тэгшэ бэлигтэй Цыпелма Батурова бүтээһэн хүүхэлдэйнүүдые дэлгэнхэй.
- “Тоонто” ансамбльтай хари гүрэнөөр гастрольдо ябахадаа, элдэб янзын дурасхаалай бэлэгүүдые болон хүүхэлдэйнүүдые дархалжа, бага-сага наймаа хэдэг байгаабди. Тиигэжэ 18 жэлэй туршада хүүхэлдэйнүүдые бүтээнэб. Ехэ һонин юумэн даа: нэгэ хүүхэлдэйн нюдэн гунигтай, нүгөөдэнэйнь нюдэн баяртай болохо. Тэдээнтэеэ хөөрэлдэхэһөө наанахан бүтээхэш. Олон янзын болодог. Илангаяа мүнөө сагта буряад хэлэ мэдэхэгүй үхибүүдэй наадахаар, хэлэ шудалхада хэрэгтэй хүүхэлдэйнүүд бии, - гэжэ Цыпелма Цыдендоржиевна хөөрэнэ.
Үзэсхэлэн түгэсэбэшье, “Алтаргана” нааданай харалганда хабаадаха дуратайшуулай ажалнуудые шэлэн абалга үргэлжэлхэ юм.
Уран гартанай уран бүтээлнүүд дура буляана
Уран гартанай харалганай шүүгшэдэй бүлэгэй гэшүүн, арадай уран бэлигэй ажал ябуулагшадай холбооной түрүүлэгшэ Надежда Донсоруноватай үзэсхэлэнэй үедэ уулзажа, һанамжаарнь һонирхоһон байнабди.
- Надежда Галсановна! Та 2002 онһоо “Алтаргана” нааданай харалганда Буряадай түлөөлэгшэдые шэлэн абалгада хабаадалсанат. Мүнөө жэлэй харалган урдахи жэлнүүдэйхидэ орходоо, юугээрээ ондоо гээшэб?
- Мүнөө жэлэй үзэсхэлэн юугээрээ онсоб гэхэдэ, эндэ буряад арадаймнай урлалай бүхы шэглэлнүүд элбэгээр дурадхагданхай. Олон янзын шэглэлэй бүтээлнүүд нюдэ баярлуулна. Сэхыень хэлэхэдэ, мүнөө сагай дархашуулда урлахада бэлэн болоо: элдэб хэрэгсэлнүүд, түхеэрэлгэнүүд элбэгээр наймаанда байдаг. Харин урдандаа гар дороо байһан лэ юумээр зохёожо, хэрэгтэй юумэеэ бэдэржэ бүтээдэг байгаа бшуу.
- Танай һанамжаар, ямар зүйл һүүлэй жэлнүүдтэ һэргээгдээ гээшэб?
- Һүүлэй үедэ түмэршэ дархашуул ехэ олон болоо. Эндэ Даша Намдаковой амжалта бусад дархашуулые зоригжуулжа болоо. Зүблэлтэ сагай үедэ би түмэр шудхаха үйлэ тон хүшэр, орёо гэжэ һанадаг һэм. Теэд ехэ нарин, һонирхолтой ажалнууд эндэ дэлгэгдээ. Би Юрий Эрдынеевэй ажалнуудые ехэ һайшаадагби. 2016 оной “Алтарганада” ехэ һонин бүтээл харуулаа һэн. “Жэргэмэл” гэжэ нэрэтэй, зүгөөр тэндэнь дүрбэн дүрсэ: үбгэн, аша хүбүүн, морин, нохой. Наһатай үбгэжөөл өөдэн гараа үргөөд, юуб даа заажа байна. Бэшэниинь булта тэрэ зааһан зүг руунь харанхай. Жэргэмэл үгы. Гэбэшье бүтээлэй удхаар жэргэмэл дээрэ жэргэн ниидэжэ, дуугаа дуулажа байһандал үзэгдөө һэн. Иимэ нарин, гүнзэгы удхатай ажалнууд байна.
- Мүнөө ямар бүтээл дурыетнай буляагаа гээшэб?
- Хүн бүхэнэй дура һанал ондоо гүб даа. Тэрэ пулхагар хасартай хүүхэлдэйнүүд ямар хөөрхэн гээшэб! Хасархануудыень таалажал байхаар. Вероно хотодо гэрэй сонхо доро Джульеттын дүрсэ табяатай. Тэрэниие эльбэһэн хүн инаг дуратай, жаргалтай болохо гэжэ ямар нэгэ һанаамгай хүн зохёогоо. Тиихэдэнь хүгшэн залуугүй ута ээлжээндэ зогсодог. Харин иимэхэн пулхагар хасартай хүүхэлдэйнүүдые табяад, тэдэниие эльбэһэн хүндэ аза талаан, зол жаргал ерэхэ гэбэл, олон зоной анхарал татаха, аяншалагшадые һонирхуулхал. Үшөө ямар гоё хибэс бүтээгдэнхэйб! Иимэ ажал би хаанашье хараагүйб. Худалдажа абамааршье һайхан зүйл байна.
- Һайнта даа, Надежда Галсановна!
Түмэр шудхажа дархалһан бүтээлнүүд