891
Ородой Холбоото Уласай Юрэнхылэгшэ Владимир Путинай хүтэлбэри доро Санкт-Петербург хотодо майн 24-26-най үдэрнүүдтэ эдэй засагай уласхоорондын хуралдаан үнгэргэгдэнэ. Энэ хэмжээ ябуулгада Буряад Уласай Толгойлогшо Алексей Цыденов хабаадана.
Бүхы дэлхэйн, тэрэ тоодо Ородой Холбоото Уласай эдэй засагай һалбарида шиидхэхэ шухала асуудалнуудаар хуралдаанда хэлсэхэ юм. Дэлхэйн гүрэнүүдэй, Ородой Холбоото Уласай можо нютагуудай, дэлхэйн томо эмхинүүдэй хүтэлбэрилэгшэд, мэргэжэлтэ шүүбэришэд энэ хэмжээ ябуулгада хабаадаха.
Санкт-Петербургын эдэй засагай уласхоорондын хуралдаандай пленарна суглаанда Ородой Холбоото Уласай Юрэнхылэгшэ Владимир Путин, Франциин Юрэнхылэгшэ Эммануэль Макрон, Япониин Премьер-министр Синдзо Абэ, Уласхоорондын валютын жасын захирал-зонхилогшо Кристин Лагард болон бусад элидхэхэ юм.
Бурядай түлөөлэгшэдэй бүридэлдэ Засагай газарай Түрүүлэгшын эдэй засагай хүгжэлтын талаар орлогшо Игорь Зураев, эдэй засагай яаманай сайд Александр Бардалеев, мүнгэ зөөри оруулалгын талаар сайд Антон Виноградов, аяншалгын сайдай орлогшо Евгений Малыгин ороһон байна. Буряад Уласай Толгойлогшо Алексей Цыденов «Ород гүрэнэй эдэй засагай хүгжэлтын зам: зорилгонууд болон шиидхэбэринүүд» гэһэн панельна сессидэ хабаадаха. Энэ хэмжээ ябуулгада Ородой Холбоото Уласай Засагай газарай нэгэдэхи вице-премьер, Эдэй засагай яаманай сайд Антон Силуанов, Ородой Холбоото Уласай Тоололгын танхимай түрүүлэгшэ Алексей Кудрин, Уласхоорондын валютын жасын захирал-зонхилогшо Кристин Лагард, Центробанкын хүтэлбэрилэгшэ Эльвира Набиуллина, Ородой Холбоото Уласай эдэй засагай хүгжэлтын сайд Максим Орешкин гэгшэд элидхэхэ юм.
Тиихэдэй Буряадай хүтэлбэрилэгшэ «Международный межотраслевой баланс и транспортные коридоры» болон «Энергетическая панель» гэһэн панельна сессинүүдтэ хабаадаха. Эдэ сессинүүдтэ Ородой Холбоото Уласай Засагай газарай вице-премьер Максим Аксенов, хуби ниилүүлһэн нээмэл «РЖД» бүлгэмэй юрэнхы захирал Олег Белозеров, Ородой Холбоото Уласай транспотын сайд Евгений Дитрих, хуби ниилүүлһэн нээмэл «НК «Роснефть» бүлгэмэй хүтэлбэрилэгшэ Игорь Сечин болон бусад элидхэхэ.
Санкт-Петербургын эдэй засагай уласхоорондын хуралдаанда Буряад Уласай Засагай газар «Росконгресс» жаса болон «Ородой Холбоото Уласай юристнуудай эблэл» гэһэн бүхэроссиин олониитын эмхитэй уласта мүнгэ зөөри оруулха болон уласта үйлэдбэрилэгдэһэн эд бараа хари гүрэнүүдтэ наймаалга дээшэлүүлхэ талаар хэлсээ баталха гэжэ түсэблэгдэнхэй. Тиихэдэ Буряадай транспортын-логистикын болон инженернэ хангалгын байгууламжа хүгжөөхэ талаар хуби ниилүүлһэн нээмэл «РЖД» бүлгэмтэй, эдэй засагай, мүнгэ зөөри оруулалгын болон ниигэмэй бодолго улас дотор бэелүүлхэ талаар ажал суг ябуулха тухай «ВТБ» бүлгэмтэй, Байгал далай аршалха, Байгаалай байгаалиин хизаар хүгжөөхэ талаар « Байгал далай» жасатай хэлсээнүүдые баталха гэжэ хараалагдана. Тиихэдэ Буряадта шэнэ түсэлнүүдые бэелүүлхэ талаар Холын хараата эдэбхи үүсхэлэй агентствэтэй, ниигэмэй-эдэй засагай һалбарида суг ажал ябуулха талаар «Желдорреммаш» бүлгэмтэй хэлсээнүүдые баталха гэжэ түсэблэгдэнхэй.
Санкт-Петербургын эдэй засагай хуралдаанай уласхоорондын хэмжээндэ Буряад Уласай Толгойлогшо Алексей Цыденов «Новотранс» компаниин, «Газпромбанк», «Сбербанк» бүлгэмүүдэй хэмжээ ябуулгануудта хабаадаха. Тиихэдэ хуби ниилүүлһэн нээмэл «МРСК-Сибири» бүлгэмэй түлөөлэгшэдтэй уулзажа, «Росси - Япон» гэһэн талмайда хүрэхэ юм.
Санкт-Петербургын эдэй засагай уласхоорондын хуралдаан дэлхэйн эдэй засагай болон олзын хэрэг эрхилэлгын һалбарида ехэ удха шанартай юм. Энэ хэмжээ ябуулга 1997 ондо эмхидхэгдэжэ эхилээ, харин 2006 онһоо Ородой Холбоото Уласай Юрэнхылэгшын хүтэлбэри доро үнгэргэгдэнэ. Һүүлэй хори жэлэй туршада хуралдаан бүхы дэлхэйдэ, тэрэ тоодо Ородой Холбоото Улас дотор эдэй засагай һалбариин асуудалнуудые шиидхэдэг шухала талмайнуудай нэгэн болонхой.
Буряад Уласай Засагай газарай хэблэлэй албанай гэрэл зураг
